ବିଜେପିକୁ ହରାଇବାକୁ ଟିଏମସି କାଫି: ମମତା ବାନାର୍ଜୀ
କୋଲକାତା: ମେଣ୍ଟ ନୁହେଁ ଏକାକୀ ଲଢ଼ିବ ଟିଏମସି । ୨୦୨୪ ଲୋକସଭା ନିର୍ବାଚନରେ ଟିଏମସି କୌଣସି ଦଳ ସହ ମେଣ୍ଟ କରିବ ନାହିଁ ବୋଲି କହିଛନ୍ତି ଟିଏମସି ସୁପ୍ରିମୋ ତଥା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ବିରୋଧୀ ଏକତା ପାଇଁ କଂଗ୍ରେସ, ଜେଡିୟୁ ସମେତ ବିଭିନ୍ନ ଦଳ ଆହ୍ୱାନ ଦେଇଥିବା ବେଳେ ମମତା ଏଥିରୁ ଓହରି ଯାଇଛନ୍ତି । ୨୦୨୪ ସାଧାରଣ ନିର୍ବାଚନରେ ଟିଏମସି ଏକା ଲଢ଼ିବ । ଆଗାମୀ ବର୍ଷର ଲୋକସଭା ନିର୍ବାଚନରେ କେବଳ ଲୋକଙ୍କ ସମର୍ଥନରେ ଦଳ ଲଢ଼େଇ କରିବ ବୋଲି ମମତା କହିଛନ୍ତି । ବିଜେପିକୁ ହରାଇବାକୁ ହେଲେ ଟିଏମସିକୁ ଭୋଟ୍ ଦେବା ଜରୁରୀ ବୋଲି ମମତା କହିଛନ୍ତି।
ଚେନ୍ନାଇରେ ଡିଏମକେର ଏକ ସଭାରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ ଯୋଗଦେଇ ବିରୋଧୀ ଏକାଠି ହୋଇ ନିର୍ବାଚନ ଲଢିବାକୁ ଆହ୍ବାନ ଦେଇଥିଲେ । ସେହିପରି ଜେଡିୟୁ ସୁପ୍ରିମୋ ତଥା ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ମଧ୍ୟ ବିରୋଧୀଙ୍କୁ ଏକାଠି ହୋଇ ନିର୍ବାଚନ ଲଢ଼ିବାକୁ ପୂର୍ବରୁ ଆହ୍ବାନ କରିଥିଲେ। କିନ୍ତୁ ଏବେ ମମତାଙ୍କ ଏପରି ନିଷ୍ପତ୍ତି ବିରୋଧୀ ଏକତାରେ କେଁ ପୂରାଇପାରେ ବୋଲି ରାଜୈନତିକ ସମୀକ୍ଷକ ମତ ଦେଇଛନ୍ତି ।
