ପ୍ରଶାସନ କରିପାରିଲାନି, ଗ୍ରାମବାସୀ କରି ଦେଖାଇଲେ ! ପାହାଡ଼ କାଟି ଝରଣାର ଗତି ବଦଳାଇଲେ…
ମାଲକାନଗିରି: ଗାଁ ମୁହାଁ ଏବେ ଝରଣାର ଝର । ସମ୍ଭବ କରି ଦେଖାଇଛି ପାହାଡି ମଣିଷ । ପ୍ରକୃତିର ଏହି ଅନନ୍ୟ ଶୋଭାରାଜି ଗାଁରେ ଦୃଶ୍ୟମାନ । ପ୍ରକୃତିର ଏହି ଅନନ୍ୟ ସମ୍ପଦକୁ ସଦୁପୋଯୋଗ କରି ପାରିଲା ନାହିଁ ପ୍ରଶାସନ । ଯାହାକୁ କରି ଦେଖାଇଲେ ମାଲକାନଗିରି ଜିଲ୍ଲା ଗୁମ୍ମାଝରଣ ବାସିନ୍ଦା ।
ବଣ ପାହାଡ ଘେରା ମାଲକାନଗିରି ଜିଲ୍ଲାରେ ଦେଖିବାକୁ ମିଳିଛି ପ୍ରକୃତିର ଏହି ଅନନ୍ୟ ଦୃଶ୍ୟ । କେଉଁଠି ସବୁଜ ସୁନ୍ଦର ଆକାଶ ଛୁଆଁ ବୃକ୍ଷରାଜ ତ କେଉଁଠି କୁଳୁ କୁଳୁ ନାଦରେ ପ୍ରବାହିତ ଝରଣା । ପ୍ରଶାସନର ପଦକ୍ଷେପକୁ ଆଉ ଅପେକ୍ଷା ନକରି ନିଜ ପାଇଁ ନିଜେ ଏମିତି କିଛି କାମ କରିଛନ୍ତି ଖଇରପୁଟ ବ୍ଲକ ଅନ୍ତର୍ଗତ ଗୁମ୍ମାଝରଣ ଗାଁ ବାସିନ୍ଦା । ପାହାଡ କାଟି ଗାଁ ପାଖକୁ ନେଇ ଆସିଲେ ଝରଣାର ଝର । ଝରଣାର କୁଳୁ କୁଳୁ ଶବ୍ଦ କରୁଥିବା ଝର ପାଣି ଯୋଗୁଁ ହସୁଛି ପାହାଡ଼ି ଅଞ୍ଚଳର କ୍ଷେତ । ୫୦ଟି ପରିବାର ଥିବା ଏହି ଗାଁରେ ପାଣିର ସମସ୍ୟା ଥିଲା ହେଲେ କେହି ବି ତାଙ୍କର ଗୁହାରି ଶୁଣି ନଥିଲେ । ଶେଷରେ ଗାଁ ଲୋକେ ଅଣ୍ଟା ଭିଡ଼ି ପାହାଡ଼ କାଟି ଧାର ଜରିଆରେ ଝରଣାର ଝରକୁ ଦେଖାଇଲେ ଗାଁର ବାଟ ।
ଏବେ ଗାଁର ଅତି ନିକଟତର ହୋଇପାରିଛି ଝରଣାର ଝର । ଲୋକଙ୍କ ଶୋଷ ମେଣ୍ଟିବା ସହ ହସୁଛି ଏହି ଗାଁର ହଜାର ହଜାର ଏକରର କ୍ଷେତ । ଗାଁର କ୍ଷେତରେ ଫଳୁଛି ଭଳି କି ଭଳି ପନିପରିବା । ଝରଣାର ଝର ଏବେ ଏହି ଗାଁ ପାଇଁ ପାଲଟିଛି ଅମୃତର ଝର । ପର୍ଯ୍ୟଟନସ୍ଥଳୀର ମାନ୍ୟତା ସହ ଉନ୍ନତି କରଣ ପାଇଁ ଦାବି ବାଢିଛନ୍ତି ବୁଦ୍ଧିଜୀବୀ । ଗ୍ରାମବାସୀଙ୍କର ଆପ୍ରାଣ ଚେଷ୍ଟା ଆଜି ଗାଁର ସବୁ ଆବଶ୍ୟକତା ମେଣ୍ଟାଇବା ସହ ଅନ୍ୟମାନଙ୍କ ପାଇଁ ପାଲଟିଛନ୍ତି ଉଦାହାରଣ ।
(ଇଶ୍ୱର ପଟନାୟକ)
