ଭଦ୍ରକ ଜିଲ୍ଲା ଚାନ୍ଦବାଲି ନାବାଳିକା ଦୁଷ୍କର୍ମ ଓ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ଗିରଫ, ୪ ଜଣଙ୍କୁ ଅଟକ ରଖି ପଚରାଉଚରା କରୁଛି ପୋଲିସ
ନନ୍ଦିଘୋଷ ବ୍ୟୁରୋ: ଭଦ୍ରକ ଜିଲ୍ଲା ଚାନ୍ଦାବାଲି ପଞ୍ଚାୟତ ଅଫିସ ପଛପଟୁ ନାବାଳିକାଙ୍କ କ୍ଷତବିକ୍ଷତ ମୃତଦେହ ଉଦ୍ଧାର ଘଟଣାରେ ମୁଖ୍ୟ ଅଭିଯୁକ୍ତ ଗିରଫ । ଜଗତସିଂହପୁରରୁ ଗିରଫ କଲା ପୋଲିସ । ଏହାସହ ୪ ଜଣଙ୍କୁ ଅଟକ ରଖି ପୋଲିସ ଘଟଣାର ତଦନ୍ତ ଚଲାଇଛି । ଘଟଣା ଘଟାଇବା ପରେ ମୁଖ୍ୟ ଅଭିଯୁକ୍ତ ଜଗତସିଂହପୁରକୁ ପଳାଇ ଯାଇଥିଲା ।
ଏପଟେ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି । ଗତକାଲି ଚାନ୍ଦବାଲିର ଏକ ପଞ୍ଚାୟତ ଅଫିସ ପଛପଟୁ ୧୦ ବର୍ଷର ନାବାଳିକାର କ୍ଷତବିକ୍ଷତ ମୃତଦେହ ଉଦ୍ଧାର ହୋଇଥିଲା । ଦୁଷ୍କର୍ମ ପରେ ତାକୁ ହତ୍ୟା କରାଯାଇଥିବା ପରିବାର ଲୋକେ ଅଭିଯୋଗ କରିଛନ୍ତି । ଏହି ଘଟଣାକୁ ନେଇ ସେଠାରେ ଉତ୍ତେଜନା ଦେଖା ଦେଇଛି । ଲୋକେ ରାସ୍ତା ଉପରେ ଟାୟାର ଜାଳି ପ୍ରତିବାଦ କରିଛନ୍ତି । ଲୋକଙ୍କ ଦାବି ହେଲା ବାଲିଗାଁ ଛକରେ ଥିବା ଦୋକାନ ସବୁ ଉଚ୍ଛେଦ ହେଉ । ସେଠାରେ ଚୋରା ମଦ କାରବାର ଚାଲିଛି । ନିଶାସକ୍ତ ଯୁବକଙ୍କ ଆଡ୍ଡା ଜମୁଛି । ଏଥିପାଇଁ ଏତେ ବଡ଼ ଘଟଣା ଘଟିଲା । ସେହି ସବୁ ଦୋକାନ ଭାଙ୍ଗିବାକୁ ଦାବି କରିଛନ୍ତି ସ୍ଥାନୀୟ ଲୋକେ ।
