ପୋଲିସ ସୁରକ୍ଷା ନୁହେଁ ଈଶ୍ୱରଙ୍କ ଉପରେ ଥିଲା ମହାତ୍ମା ଗାନ୍ଧୀଙ୍କ ଭରସା
ନୂଆଦିଲ୍ଲୀ: ଗାନ୍ଧୀ ଗୋଟିଏ ଯୁଗର ନାଁ । ଯେଉଁ ଯୁଗ ପ୍ରତିଟି ଭାରତୀୟଙ୍କ ଲାଗି ଅଭୁଲା, ଅବିସ୍ମରଣୀୟ । ଖଦି ଧୋତି ପିନ୍ଧୁଥିବା ଜଣେ ମଣିଷଙ୍କ ଲାଗି ଭାରତ ଏକ ହୋଇଥିଲା । ଆଉ ଇଂରେଜ ଶାସନରୁ ମୁକ୍ତ ହୋଇଥିଲା । ଆଜି ସେହି ଦେଶର ପିତା ମହାତ୍ମା ଗାନ୍ଧୀଙ୍କ ତିରୋଧାନ ଦିବସ । ଆଜି ସିନା ଗାନ୍ଧୀ ନାହାଁନ୍ତି କିନ୍ତୁ ତାଙ୍କ ସ୍ମୃତି ଅଛି । ଗଗନ ପବନ ଗାନ୍ଧୀଙ୍କ ନାରାରେ ଗୁଞ୍ଜରିତ ହେଉଛି ।
ଆମରଣ ଅନଶନ, ଆନ୍ଦୋଳନ ଦ୍ୱାରା ଇଂରେଜ ଉପରେ ଚାପ ପକାଇଥିଲେ ବାପୁଜୀ । ଶେଷରେ ବ୍ରିଟିଶ୍ ସରକାର ଦେଶ ଛାଡ଼ିଯିବା ସହ ଭାରତ ସ୍ୱାଧୀନତା ଲାଭ କରିଥିଲା । ପରାଧୀନ ଭାରତରେ ଗାନ୍ଧୀଜୀଙ୍କ ପରାକ୍ରମ ଆମେ ସମସ୍ତେ ଜାଣିଛେ । ଆସନ୍ତୁ ଜାଣିବା ଭାରତ ସ୍ୱାଧୀନତା ପାଇବା ପରେ କଣ ଥିଲା ଗାନ୍ଧୀଜୀଙ୍କ ଆଭିମୁଖ୍ୟ ।
ସ୍ୱାଧୀନ ଭାରତର ଉପପ୍ରଧାନମନ୍ତ୍ରୀ ଓ ଗୃହମନ୍ତ୍ରୀ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କୁ ଏକଦା ଗାନ୍ଧୀଜୀ ଧମକ ଦେଇ କହିଥିଲେ, ଯଦି ପ୍ରାର୍ଥନା ସଭାକୁ ଆସୁଥିବା କୌଣସି ବ୍ୟକ୍ତିଙ୍କ ଯାଞ୍ଚ ହେବ ତ ମୁଁ ସେଇଠି ଆମରଣ ଅନଶନ ଆରମ୍ଭ କରିବି । ଯାହାକୁ ନେଇ ପଟେଲଙ୍କ ସମେତ ପୂରା ନେହରୁ ସରକାର ଭୟଭୀତ ହୋଇ ପଡ଼ିଥିଲା । ସମସ୍ତେ ଜାଣିଥିଲେ ବାପୁ ଯାହା କହୁଛନ୍ତି, ତାହା କରି ହିଁ ରହିବେ । ଆଉ ସେହି ବୟସରେ ଅନଶନ ମହାତ୍ମା ଗାନ୍ଧୀଜୀଙ୍କ ସ୍ୱାସ୍ଥ୍ୟ ପ୍ରତି ଖରାପ ହୋଇପାରେ । ତେଣୁ, ବାପୁଜୀଙ୍କ ଇଚ୍ଛାକୁ ସମ୍ମାନ ଜଣାଇ ଗାନ୍ଧୀଜୀଙ୍କ ସୁରକ୍ଷା ପାଇଁ କୌଣସି ବିଶେଷ ବ୍ୟବସ୍ଥା ହୋଇ ନଥିଲା ।
ଦିଲ୍ଲୀର ବିଡଲା ହାଉସରେ ପ୍ରାର୍ଥନ ସଭାରେ ବାପୁଜୀ ସୁରକ୍ଷା ନେବାକୁ ମନା କରି ଦେଇଥିଲେ । କାରଣ ସେ ନିଜ ସୁରକ୍ଷା ଲାଗି ସରକାରୀ ସମ୍ବଳର ଉପଯୋଗ ବିପକ୍ଷରେ ଥିଲେ । ଅନ୍ୟପଟେ ବିଡଲା ହାଉସ୍ ଆଖପାଖରେ ସୁରକ୍ଷା ବ୍ୟବସ୍ଥା କରିବା ଲାଗି ସର୍ଦ୍ଦାର ପଟେଲ ଗାନ୍ଧୀଜୀଙ୍କୁ ଅନୁମତି ମାଗିଥିଲେ । ଯଦି ସେଦିନ ଯାଞ୍ଚ ବ୍ୟବସ୍ଥା ହୋଇଥାନ୍ତା ତ ଗୋଡସେ ବନ୍ଧୁକ ଧରି ବିଡ଼ଲା ଭବନର ଭିଡ଼ ଭିତରେ ପଶି ଗାନ୍ଧୀଜୀଙ୍କୁ ଗୁଳି କରିପାରି ନଥାନ୍ତା ।
