ଜାନୁଆରୀ ୧୮ ଯାଏ କୋଭିଡ୍ ଟିକାକରଣ ଏହି ରାଜ୍ୟରେ ସ୍ଥଗିତ

ମୁମ୍ବାଇ: ଭ୍ୟାକ୍ସିନେସନ୍ ଆରମ୍ଭରୁ ବିଭ୍ରାଟ । କୋ-ୱିନ୍ ଆପରେ ତ୍ରୁଟି । ବନ୍ଦ ହେଲା ଟିକାକରଣ । ଶନିବାର କୋଭିଡ୍ ଟିକାକରଣ ଆରମ୍ଭ ଦିନରେ ୨୮ ହଜାର ୫୦୦ ସ୍ୱାସ୍ଥ୍ୟକର୍ମୀଙ୍କୁ ଟିକା ଦେବାକୁ ମହାରାଷ୍ଟ୍ର ଲକ୍ଷ୍ୟ ରଖିଥିଲା । ପ୍ରଥମ ଦିନରେ ୧୮ ହଜାର ୩୩୮ ଜଣ ସ୍ୱାସ୍ଥ୍ୟ କର୍ମୀଙ୍କୁ ଭ୍ୟାକ୍ସିନ୍ ଦିଆଯାଇଛି । କୋ-ୱିନ୍ ଆପରେ ବୈଷୟିକ ଅସୁବିଧା ଯୋଗୁଁ ଟିକାକରଣ କମିଥିବା କର୍ତ୍ତୃପକ୍ଷ କହିଛନ୍ତି । ଏଥିସହ ୨ ଦିନ ବ୍ୟବଧାନ ପରେ ମଙ୍ଗଳବାର ଠାରୁ ପରବର୍ତ୍ତୀ ପର୍ଯ୍ୟାୟ ଟିକାକରଣ ଆରମ୍ଭ ହେବ ।

ଟିକାକରଣ ପରେ ମହାରାଷ୍ଟର ୧୦ ଜଣଙ୍କ ଠାରେ ସାମାନ୍ୟ ପାର୍ଶ୍ୱ ପ୍ରତିକ୍ରିୟା ଦେଖାଦେଇଛି । ତେବେ ରାଜ୍ୟରେ ଶନିବାର ସନ୍ଧ୍ୟା ସୁଦ୍ଧା କୋଭିଡ୍ ଟିକାର ସେଭଳି କିଛି ଗୁରୁତ୍ୱର ପାର୍ଶ୍ୱ ପ୍ରତିକ୍ରିୟା ମାମଲା ସାମ୍ନାକୁ ଆସିନାହିଁ । ମିଳିଥିବା ଟିକାକୁ ଆଗାମୀ ୨୮ ଦିନ ମଧ୍ୟରେ ଦିଆଯିବ ଏବଂ ଆଉ ଅଧିକ ଟିକା ଯୋଗାଇ ଦେବାକୁ ମହାରାଷ୍ଟ୍ର ସରକାର କେନ୍ଦ୍ରକୁ ଅନୁରୋଧ କରିଛନ୍ତି ।

ମୁମ୍ବାଇରେ ସର୍ବାଧିକ ୧ ହଜାର ୯୨୬ ଜଣ ଟିକା ନେଇଛନ୍ତି । ଯେତେବେଳେ କି ୪ ହଜାର ଜଣଙ୍କୁ ପ୍ରଥମ ଦିନରେ ଟିକା ଦେବା ପାଇଁ ଲକ୍ଷ୍ୟ ରଖାଯାଇଥିଲା । ତେବେ, କୋ-ୱିନ୍ ଆପରେ ବୈଷୟିକ ତ୍ରୁଟି ଯୋଗୁଁ ଶହେ ପ୍ରତିଶତ ଟିକାକରଣ ହୋଇପାରି ନଥିବା ଅଧିକାରୀ କହିଛନ୍ତି ।