ଦିଲ୍ଲୀରେ ବୈଠକ, ମହାରାଷ୍ଟ୍ରରେ ସରକାର, ଫର୍ମୁଲା କଣ ?

ନୂଆଦିଲ୍ଲୀ : ରାଜନୀତିକ ପଶାପାଲିରେ ହଲଚଲ ହେଉଛି ମହାରାଷ୍ଟ୍ର ରାଜନୀତି । କ୍ଷମତା ଅଳିନ୍ଦରେ ରହିବା ପାଇଁ ଆସନ ହାତେଇଥିବା ସମସ୍ତ ଦଳ ଏବେ ଆରମ୍ଭ କରିଛନ୍ତି ଗୋଟିଚାଳନା । ଫଳ ବାହାରିବାର ଦଶ ଦିନ ବିତିଯାଇଥିଲେ ସୁଦ୍ଧା ନିଜ ନିଜ ସଂଖ୍ୟା ଅହମିକାରେ ମାତି ସରକାର ଗଠନ ପାଇଁ କୌଣସି ପଦକ୍ଷେପ ନେଉନଥିବା ଦଳମାନେ ଏବେ ମହାରାଷ୍ଟ୍ର ଗାଦି ଦଖଲ ପାଇଁ କସରତ ଆରମ୍ଭ କରିଛନ୍ତି । ଏନେଇ ବିଜେପି ମୁଖ୍ୟ ଅମିତ ଶାହଙ୍କୁ ଦିଲ୍ଲୀ ବାସଭବନରେ ଭେଟିଛନ୍ତି ମୁଖ୍ୟମନ୍ତ୍ରୀ ଦେବନ୍ଦ୍ର ଫଡ଼ନବିସ୍ । ସେପଟେ ଏନସିପି ମୁଖ୍ୟ ଶରଦ ପାଓ୍ବାର କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧିଙ୍କୁ ମଧ୍ୟ ଦିଲ୍ଲୀରେ ଭେଟି ସରକାର ଗଠନ ନେଇ ଚୂଡ଼ାନ୍ତ ରୂପରେଖ ପ୍ରସ୍ତୁତ କରିବାର କାର୍ଯ୍ୟକ୍ରମ ରହିଛି । ତେବେ ମହାରାଷ୍ଟ୍ରରେ କିଏ ଗଢ଼ିବ ସରକାର ? ସଂଖ୍ୟା ଗରିଷ୍ଠତା ପାଇଥିବା ଦୁଇ ମେଣ୍ଟ ସହଯୋଗୀ ଶିବସେନା ଓ ବିଜେପି ପରସ୍ପର ଭିତରେ ବୟାନବାଜିକୁ ଛାଡ଼ିଦେଲେ ସରକାର ଗଠନ ନେଇ ଏଯାଏ କୌଣସି ଆନୁଷ୍ଠାନିକ ବୈଠକ କରିନାହାନ୍ତି ।

ତେଣୁ ଦଳୀୟ ଶୀର୍ଷ ନେତୃତ୍ବଙ୍କ ସହ ଆଜିର ବୈଠକ ପରେ ସରକାର ଗଠନ ନେଇ ନୂଆ ଫର୍ମୁଲା ବାହାରିବାର ଆଶା କରାଯାଉଛି । ଯଦିଓ ଶାହଙ୍କ ସହ ଫଡନବିସ୍‌ଙ୍କ ସାକ୍ଷାତ କେବଳ NDRF ଫଣ୍ଡକୁ ନେଇ କୁହାଯାଇଥିଲା, କିନ୍ତୁ ସୂତ୍ରରୁ ମିଳିଥିବା ଖବର ଅନୁସାରେ ସେନା ଦାବି କରୁଥିବା ୫୦-୫୦ ଫର୍ମୁଲାକୁ ନେଇ ଅମିତ ଶାହାଙ୍କ ସହ ଫଡନବିସ ଆଲୋଚନା କରିଛନ୍ତି । ଅନ୍ୟପଟେ ଶରଦ-ସୋନିଆଙ୍କ ସାକ୍ଷାତ, ସରକାର ଗଠନ ନେଇ ଶିବସେନା ସହ ମେଣ୍ଟ ପ୍ରସଙ୍ଗରେ ହେବ ବୋଲି ସୂଚନା ମିଳିଛି । ସେହିପରି ଆଜି ମହାରାଷ୍ଟ୍ର ରାଜ୍ୟପାଳଙ୍କୁ ଭେଟିବ ଶିବସେନା । ବର୍ତ୍ତମାନ ପରିସ୍ଥିତିରେ ଦଳର ଆଭିମୁଖ୍ୟ ନେଇ ରାଜ୍ୟପାଳଙ୍କୁ ଜଣାଇବ । ତେବେ ଏ ସବୁ ଗଣିତ ଭିତରେ ବର୍ତ୍ତମାନ ହଲଚଲ ହେଉଛି ମହାରାଷ୍ଟ୍ର ରାଜନୀତିର ସତରଞ୍ଜ ।

ସରକାର ଗଠନ ନେଇ କେତେବେଳେ ବି ବାହାରିପାରେ କୌଣସି ବି ଫର୍ମୁଲା । ତେବେ ନଭେମ୍ବର ୮ ତାରିଖରେ ଶେଷ ହେଉଛି ବିଧାନସଭା କାର୍ଯ୍ୟକାଳ । ରାଜନୀତି ପଣ୍ଡିତଙ୍କ ନଜର, ଆରମ୍ଭରୁ ବିରୋଧୀ ଆସନରେ ବସିବା ପାଇଁ କହୁଥିବା ଏନିସିପି ଏବେ କେଉଁ ଆଭିମୁଖ୍ୟ ଆପଣେଉଛି ? କଣ ସେନାକୁ ମୁଖ୍ୟମନ୍ତ୍ରୀ ପଦ ଦେଇ ଦ୍ବିତୀୟ ଫର୍ମୁଲା ଅର୍ଥାତ ସେନା+ଏନସିପି+କଂଗ୍ରେସ ମେଣ୍ଟରେ ଗଠନ ହେବ ମହାରାଷ୍ଟ୍ରରେ ସରକାର । ସେପଟେ ଆସନ୍ତାକାଲି ଫଡନବୀଶ ଏକା ଏହା ଶପଥ ନେବାର ଚର୍ଚ୍ଚା ମଧ୍ୟ ହେଲାଣି । ତେବେ ଆଉ ୨୪ ଘଣ୍ଟା ମଧ୍ୟରେ ମହାରାଷ୍ଟ୍ରରେ ଗଣିତ ସଜଡ଼ା ନହେଲେ ଘଡିକେ ଘୋଡା ଛୁଟିବା ସହ ଘୋଡ଼ା ବେପାର ହେବା ଥୟ । ')}