ଫେଲ ମାରିଲା ମହାନାଳ ଯୋଜନା: ପାଣିରେ ପଡ଼ିଲା କୋଟି କୋଟି ଟଙ୍କା

ଫେଲ ମାରିଲା ମହାନାଳ ଯୋଜନା । ପାଣିରେ ପଡ଼ିଲା କୋଟି କୋଟି ଟଙ୍କା । କିଛି ଘଣ୍ଟା ବର୍ଷାରେ ବୁଡ଼ିଲା ବାଲେଶ୍ଵର । ଦୟନୀୟ ଅବସ୍ଥାରେ ସହରବାସୀ । ବର୍ଷପୂର୍ତ୍ତି ଉତ୍ସବରେ ମସଗୁଲ ମ୍ୟୁନିସିପାଲଟି କର୍ତ୍ତୃପକ୍ଷ । ଭଲକରି ଦେଖନ୍ତୁ ଏଇ ଦୃଶ୍ୟକୁ କେମିତି ଉବୁଟୁବୁ ହେଉଛି ବାଲେଶ୍ୱର । କଂଗ୍ରେସଗଳି, କୌଶଲ୍ୟା ମେମୋରିଆଲରୁ ମଠାସାହି ରାସ୍ତା, ଏକତା ନଗର, ନୂଆସାହି ସବୁଠି ଲହଡ଼ି ମାରୁଛି ଡ୍ରେନ ପାଣି । ଏପରିକି ବାଲେଶ୍ୱର ଅସ୍ଥିଶଲ୍ୟ କେନ୍ଦ୍ରରେ ପାଣି ପଶି ହନ୍ତସନ୍ତ ରୋଗୀ ଓ ତାଙ୍କ ସମ୍ପର୍କୀୟ । ହସପିଟାଲ ଭିତରେ ହାତ ଗୋଡ଼ ଟେକି ଚେୟାର ବସିଛନ୍ତି ଲୋକେ । କଂଗ୍ରେସ ଗଳିରେ ପାଣି ପଶି ଯିବାବେଳେ ଲୋକେ ନାହିଁ ନଥିବା ଅସୁବିଧାର ସମ୍ମୁଖି ହୋଇଛନ୍ତି ଲୋକେ । ବାଲେଶ୍ବରବାସୀ ପାଣି କାଦୁଅରେ ହନ୍ତସନ୍ତ ହୋଇଥିବାବେଳେ ୧୫୦ ବର୍ଷ ପୂର୍ତ୍ତି ଉତ୍ସବ ପାଳୁଛି ମ୍ୟୁନିସିପାଲିଟି । ଯାହାକୁ ଲୋକେ କଡ଼ା ସମାଲୋଚନା କରିଛନ୍ତି ।

ତଳିଆ ଅଞ୍ଚଳରେ ଲୋକଙ୍କ ଘରେ ପାଣି ପଶି ଲୋକଙ୍କ ଦୁର୍ଦ୍ଦଶା ବଢିଛି । ନୂଆସାହି ଉପ ଡାକଘର ମଧ୍ୟରେ ମଙ୍ଗଳବାର ୩ ଫୁଟରୁ ଅଧିକ ପାଣି ପଶି ଯାଇଥିଲା । ଫଳରେ ଡାକଘରରେ ଥିବା ବହୁ ଗୁରୁତ୍ୱପୁର୍ଣ୍ଣ ଦସ୍ତାବିଜ୍ ପାଣିରେ ଓଦା ହୋଇ ନଷ୍ଟ ହୋଇଯାଇଛି । ପୋଷ୍ଟ ଅଫିସରେ ଗଛିତ ଥିବା ଲୋକଙ୍କ ଟଙ୍କା ମଧ୍ୟ ପାଣିରେ ଭିଜି ଯାଇଛି । ପାଣି କମିବା ପରେ ଓଦା ଟଙ୍କା ଓ ଦସ୍ତାବିଜ୍ ସବୁ ଶୁଖାଯାଇଛି । ପୋଷ୍ଟ ଅଫିସରେ ପ୍ରାୟ ୧ ଲକ୍ଷ ୮ ହଜାର ଟଙ୍କା ଗଛିତ ଥିଲା । ସେଥି ମଧ୍ୟରୁ ୧ ଲକ୍ଷ ଟଙ୍କା ଜମାକାରୀ ନେଇଥିବା ବେଳେ ବାକି ଟଙ୍କା ପୋଷ୍ଟ ଅଫିସ ସାରା ମେଲାଇ ଶୁଖାଇବା ଦୃଶ୍ୟ ଦେଖିବାକୁ ମିଳିଛି । ତ୍ରୁଟି ପୂର୍ଣ୍ଣ ଡ୍ରେନେଜ ବ୍ୟବସ୍ଥା ପାଇଁ ବାଲେଶ୍ବରର ତେଲେଙ୍ଗା ସାହି, ଭାସ୍କରଗଞ୍ଜ, ନୂଆସାହି, ଓଟି ରୋଡରେ ଲୋକେ ଜଳବନ୍ଦୀ ଜୀବନ ବିତାଇଛନ୍ତି ।