ଜ୍ୟୋତିରାଦିତ୍ୟ ଓ ଦିଗ୍ବିଜୟ ରାଜ୍ୟସଭାକୁ ନିର୍ବାଚିତ
ଭୋପାଳ: ମଧ୍ୟପ୍ରଦେଶରେ ଅନୁଷ୍ଠିତ ରାଜ୍ୟସଭା ନିର୍ବାଚନର ଫଳାଫଳ ଘୋଷଣା ସରିଛି । ମଧ୍ୟପ୍ରଦେଶରେ ଗୋଟିଏ ସିଟ୍ରେ କଂଗ୍ରେସ ବିଜୟୀ ହୋଇଥିବା ବେଳେ ଅନ୍ୟ ୨ଟି ସିଟରେ ବିଜେପି ବିଜୟୀ ହୋଇଛି । ବିଜେପି ପକ୍ଷରୁ ବିଜୟୀ ହୋଇଥିବା ପ୍ରାର୍ଥୀଙ୍କ ମଧ୍ୟରେ ରହିଛନ୍ତି ଜ୍ୟୋତିରାଦିତ୍ୟ ସିନ୍ଧିଆ ଓ ସୁମେର ସିଂହ ସୋଲାଙ୍କି ।
ଅନ୍ୟପକ୍ଷରେ କଂଗ୍ରେସ ମଧ୍ୟ ଗୋଟିଏ ରାଜ୍ୟସଭା ଆସନ ହାତେଇବାରେ ସକ୍ଷମ ହୋଇଛି । କଂଗ୍ରେସ ପ୍ରାର୍ଥୀଭାବେ ରାଜ୍ୟସଭାକୁ ନିର୍ବାଚିତ ହୋଇଛନ୍ତି ପୂର୍ବତନ ମୁଖ୍ୟମନ୍ତ୍ରୀ ତଥା ଦଳର ବରିଷ୍ଠ ନେତା ଦିଗବିଜୟ ସିଂହ । ମଧ୍ୟପ୍ରଦେଶରେ ମୋଟ ୩ ଟି ଆସନ ନେଇ ଭୋଟଗ୍ରହଣ ହୋଇଥିବା ବେଳେ ଉଭୟ କଂଗ୍ରେସ ଓ ବିଜେପି ପକ୍ଷରୁ ୨ ଜଣ ଲେଖାଏଁ ପ୍ରାର୍ଥୀ ମଇଦାନକୁ ଓହ୍ଲାଇଥିଲେ ।
କାହାକୁ ମିଳିଲା କେତେ ଭୋଟ?
ରାଜ୍ୟସଭା ନିର୍ବାଚନରେ ବିଜେପିର ଜ୍ୟୋତିରାଦିତ୍ୟ ସିନ୍ଧିଆଙ୍କୁ ୫୬ ଭୋଟ ମିଳିଥିବା ବେଳେ ସୁମେର ସିଂହ ସୋଲାଙ୍କିଙ୍କୁ ୫୫ ଭୋଟ ପାଇଛନ୍ତି । ଏତଦ୍ ବ୍ୟତୀତ କଂଗ୍ରେସ ଦିଗବିଜୟ ସିଂହ ୫୭ ଖଣ୍ଡ ଭୋଟ ପାଇଛନ୍ତି । ଅପରପକ୍ଷରେ ଫୁଲ ସିଂହ ବରେୟାଙ୍କୁ ୩୬ ଖଣ୍ଡ ଭୋଟ ମିଳିଛି । ଏବଂ ୨ଟି ଭୋଟ ନାକଚ ହୋଇଛି ।
