ରାଜ୍ୟସଭା ଉପାଧ୍ୟକ୍ଷ ପ୍ୟାନେଲ ପୁନର୍ଗଠିତ, ବିଜେଡ଼ି ସାଂସଦ ସସ୍ମିତ ପାତ୍ର ସାମିଲ

ନୂଆଦିଲ୍ଲୀ: ରାଜ୍ୟସଭା ଉପାଧ୍ୟକ୍ଷ ପ୍ୟାନେଲ ପୁନର୍ଗଠିତ । ପୁନର୍ଗଠନ କଲେ ରାଜ୍ୟସଭା ଅଧ୍ୟକ୍ଷ ଭେଙ୍କୟା ନାଇଡୁ । ପ୍ୟାନେଲରେ ବିଜେଡି ସାଂସଦ ଡ. ସସ୍ମିତ ପାତ୍ର ସାମିଲ ଅଛନ୍ତି । ସସ୍ମିତଙ୍କ ବ୍ୟତୀତ ଏହି ପ୍ୟାନେଲରେ ଅଛନ୍ତି ସାଂସଦ ଭୁବନେଶ୍ୱର କଲିତା, ଇନ୍ଦୁବାଲା ଗୋସ୍ୱାମୀ, ଡ. ଏଲ୍ ହନୁମନ୍ଥିଆ, ଟି ସିବା, ସାଂସଦ ଭି. ବିଜୟସାଇ ରେଡି ମଧ୍ୟ ସଦସ୍ୟ ରହିଛନ୍ତି । କିଛି ଜଣଙ୍କୁ ନୂଆ ଭାବେ ଯୋଡା ଯାଇଥିବା ବେଳେ ଆଉ କିଛି ପୂର୍ବ ସଦସ୍ୟଙ୍କୁ ଏହି ପ୍ୟାନେଲରେ ପୂର୍ବଭଳି ରଖାଯାଇଛି । ଆସନ୍ତାକାଲିଠାରୁ ମୌସୁମୀ ଅଧିବେସନ ଆରମ୍ଭ ହେବାକୁ ଯାଉଛି । ଏହାକୁ ଦୃଷ୍ଟିରେ ରଖି ରାଜ୍ୟସଭା ଅଧ୍ୟକ୍ଷ ତଥା ଉପରାଷ୍ଟ୍ରପତି ଭେଙ୍କୟା ନାୟିଡୁ ଏହି ପ୍ୟାନେଲ ପୁନର୍ଗଠନ କରିଛନ୍ତି । ଉଲ୍ଲେଖଯୋଗ୍ୟ, ଉପରାଷ୍ଟ୍ରପତି ତଥା ରାଜ୍ୟସଭା ଅଧ୍ୟକ୍ଷ ଭେଙ୍କୟା ନାଇଡୁଙ୍କ ପାଇଁ ମୌସୁମୀ ଅଧିବେଶନରେ ଶେଷ ଅଧ୍ୟକ୍ଷତା ହେବ । କାରଣ ଅଗଷ୍ଟ ୧୦ ତାରିଖରେ ତାଙ୍କ କାର୍ଯ୍ୟକାଳ ଶେଷ ହେଉଛି ।