ଲୁଧିଆନା କୋର୍ଟ ବିସ୍ଫୋରଣ ମାମଲା, ଜର୍ମାନୀରୁ ମାଷ୍ଟରମାଇଣ୍ଡ ଗିରଫ

ଲୁଧିଆନା: ଗତ ଗୁରୁବାର ପଞ୍ଜାବସ୍ଥିତ ଲୁଧିଆନା କୋର୍ଟରେ ଏକ ବଡ଼ ଧରଣର ବିସ୍ଫୋରଣ ହୋଇଥିଲା । ଯେଉଁଥିରେ ଦୁଇ ଜଣଙ୍କ ମୃତ୍ୟୁ ହୋଇଥିବାବେଳେ ୬ ଜଣ ଗୁରୁତର ଭାବରେ ଆହତ ହୋଇଥିଲେ । ଏହି ବିସ୍ଫୋରଣର ମାଷ୍ଟରମାଇଣ୍ଡକୁ ଗିରଫ କରାଯାଇଛି । ଲୁଧିଆନା କୋର୍ଟ ବିସ୍ଫୋରଣ ପଛରେ ଏସଏଫଜେ ବା (ଶିଖ୍ ଫର୍ ଜଷ୍ଟିସ୍ ) ଆତଙ୍କବାଦୀ ସଂଗଠନ ଷଡ଼ଯନ୍ତ୍ର ରଚିଥିଲା । ବିସ୍ଫୋରଣ ଘଟଣାର ମାଷ୍ଟରମାଇଣ୍ଡ ତଥା ଏସ୍ଏଫଜେର ଜଶବିନ୍ଦର ସିଂ ମୁଲତାନୀଙ୍କୁ ଜର୍ମାନୀରୁ ଗିରଫ କରାଯାଇଛି । ଜଶବିନ୍ଦର ଲୁଧିଆନା ପରେ ଦିଲ୍ଲୀ ଏବଂ ମୁମ୍ବାଇରେ ବି ଆତଙ୍କବାଦୀ ଆକ୍ରମଣ କରିବା ପାଇଁ ଷଡଯନ୍ତ୍ର ରଚିଥିଲା । ଦିଲ୍ଲୀ, ମୁମ୍ବାଇରେ ଆତଙ୍କବାଦ ଆକ୍ରମଣ ପୂର୍ବରୁ ଜଶବିନ୍ଦରକୁ ଜର୍ମାନୀରୁ ଗିରଫ କରାଯାଇଛି ।

ଲୁଧିଆନା କୋର୍ଟ ବିସ୍ଫୋରଣ ଘଟଣାର ତଦନ୍ତ ସମୟରେ ଜଶବିନ୍ଦର ପାକିସ୍ତାନ କିମ୍ବା ଜର୍ମାନୀରେ ରହୁଥିବା ଜଣାପଡ଼ିଥିଲା । ଶିଖ୍ ଫର ଜଷ୍ଟିସ୍ ହେଉଛି ଭାରତର ଏକ ଆତଙ୍କବାଦୀ ଗୋଷ୍ଠୀ । ବାବର ଖାଲସାର ଆତଙ୍କବାଦୀ ହରବିନ୍ଦର ସିଂ ସାନ୍ଧୁ ଏବଂ ଲୁଧିଆନା ବିସ୍ଫୋରଣରେ ସମ୍ପୃକ୍ତ ଥିବା SFJର ବରିଷ୍ଠ ସଦସ୍ୟ ଜଶବିନ୍ଦର ସିଂ ବିଷୟରେ ପୂର୍ବରୁ ଗୁଇନ୍ଦା ସତର୍କ ସୂଚନା ଦେଇଥିଲା । ଜର୍ମାନୀ ପୋଲିସ ଏରଫର୍ଟ ସିଟିରୁ ଜଶବିନ୍ଦରକୁ ଗିରଫ କରିଛି ।