ବିଜେପି କାର୍ଯ୍ୟାଳୟ ସାମ୍ନାରେ ମହିଳାଙ୍କ ଆତ୍ମାହୁତି..!
ଲକ୍ଷ୍ନୌ: ଉତ୍ତରପ୍ରଦେଶ ରାଜଧାନୀ ଲକ୍ଷ୍ନୌରେ ମଙ୍ଗଳବାର ବିଜେପି ରାଜ୍ୟ କାର୍ଯ୍ୟାଳୟ ଫାଟକ ସାମ୍ନାରେ ଜଣେ ମହିଳାଙ୍କ ଆତ୍ମହତ୍ୟା ଉଦ୍ୟମ । ମହିଳା ଜଣକ ନିଜ ଦେହରେ ନିଆଁ ଲଗାଇ ଆତ୍ମହତ୍ୟା କରିବାକୁ ଚେଷ୍ଟା କରିଥିଲେ । ଏହି ଘଟଣା ଦେଖି ସେଠାରେ ଉପସ୍ଥିତ ଥିବା ସୁରକ୍ଷା କର୍ମୀ ଓ ଗଣମାଧ୍ୟମ କର୍ମଚାରୀମାନେ ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ । ତେବେ ମହିଳାଙ୍କୁ ଉଦ୍ଧାର କରାଯାଇ ସ୍ଥାନୀୟ ସିଭିଲ୍ ହସ୍ପିଟାଲରେ ଭର୍ତ୍ତି କରାଯାଇଛି । ହେଲେ ମହିଳା ଜଣଙ୍କ କାହିଁକି ଆତ୍ମହତ୍ୟା ଉଦ୍ୟମ କଲେ ତାହା ଏବେ ସୁଦ୍ଧା ସ୍ପଷ୍ଟ ହୋଇନାହିଁ । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହ ମେଡିକାଲରେ ମହିଳାଙ୍କୁ ପଚରାଉଚରା କରୁଛି । ମେଡିକାଲରୁ ମିଳିଥିବା ସୂଚନା ଅନୁଯାୟୀ ମହିଳାଙ୍କ ଅବସ୍ଥା ଗୁରୁତର ଅଛି ।
ହଜରତଗଞ୍ଜ କୋଟୱାଲୀରୁ ଏହି ଘଟଣା ସାମ୍ନାକୁ ଆସିଛି । ପୀଡିତା ମହିଳା ଜଣକ ହେଉଛନ୍ତି ୟୁପି ମହାରାଜଗଞ୍ଜର ଅଞ୍ଜନା ତିୱାରୀ । ସେ ଅଖିଳେଶ ତିୱାରୀ (୩୫) ନାମକ ଜଣେ ବ୍ୟକ୍ତିଙ୍କୁ ବିବାହ କରିଥିଲେ । ବିବାହର କିଛି ଦିନ ପରେ ଦୁହିଁଙ୍କ ମଧ୍ୟରେ ବିଚ୍ଛେଦ ହୋଇଥିଲା । ଏହାପରେ ମହିଳା ଜଣକ ଧର୍ମ ପରିବର୍ତ୍ତନ କରି ଆସିଫ୍ ନାମକ ଜଣେ ଯୁବକଙ୍କ ସହ ବିବାହ କରିଥିଲେ । ବିବାହ ପରେ ଆସିଫ୍ ରଜା ସାଉଦି ଚାଲି ଯାଇଥିଲେ । ତେବେ ମହିଳାଙ୍କ ଅଭିଯୋଗ ଅନୁଯାୟୀ, ଆସିଫ୍ଙ୍କ ପରିବାର ଲୋକ ତାଙ୍କୁ ଅକଥନୀୟ ନିର୍ଯାତନା ଦେଉଥିଲେ । ତେଣୁ ଏଥିରେ ଅତିଷ୍ଟ ହୋଇ ମହିଳା ଜଣକ ରାଜ୍ୟ ବିଜେପି କାର୍ଯ୍ୟାଳୟ ଗେଟ୍ ନମ୍ବର ଦୁଇ ସମ୍ମୁଖରେ ଦେହରେ ନିଆଁ ଲଗାଇ ଆତ୍ମହତ୍ୟା କରିବାକୁ ଉଦ୍ୟମ କରିଥିଲେ ।
ମହିଳା ଜଣକ କହିଛନ୍ତି, ସେ ଏହି ଘଟଣା ନେଇ ଥାନାରେ ଅଭିଯୋଗ କରିଥିଲେ କିନ୍ତୁ କୌଣସି ସୁଫଳ ମିଳି ନ ଥିଲା । ଫଳରେ ସେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଭେଟି ଦୁଃଖ ଜଣାଇବାକୁ ଚାହୁଁଥିଲେ । ହେଲେ ସେଥିରେ ମଧ୍ୟ ସେ ନିରାଶ ହେଲେ । ତେଣୁ ସେ ଆତ୍ମହତ୍ୟା କରିବାକୁ ଚେଷ୍ଟା କରିଥିଲେ ।
ଏହି ଘଟଣାକୁ ଦୃଷ୍ଟିରେ ରଖି ଯୋଗୀ ସରକାର କଠୋର ପଦକ୍ଷେପ ନେବାକୁ ଚିନ୍ତା କରୁଛନ୍ତି । ଏଭଳି ଘଟଣାକୁ ରୋକିବା ପାଇଁ ଏକ ଆକ୍ସନ୍ ପ୍ଲାନ୍ ପ୍ରସ୍ତୁତ କରିବାକୁ ମୁଖ୍ୟମନ୍ତ୍ରୀ ଦେଇଛନ୍ତି । ସୂଚନାନୁଯାୟୀ, ନିକଟ ଅତୀତରେ ମେରଠ, କାନପୁର ଏବଂ ଲଖିମପୁର ଖିରୀରେ ଝିଅମାନଙ୍କୁ ଠକିବା ଏବଂ ସେମାନଙ୍କୁ ପ୍ରତାରଣା କରିବା ଘଟଣା ବାରମ୍ବାର ସାମ୍ନାକୁ ଆସିଛି । ମେରଠ ଏବଂ ଲଖିମପୁରରେ ମହିଳାଙ୍କୁ ହତ୍ୟା ମଧ୍ୟ କରାଯାଇଛି ।
