ସାନଖେମୁଣ୍ଡିରେ ନିମ୍ନମାନର ପିଡିଏସ ଚାଉଳ ବଣ୍ଟନ

ଦିଗପହଣ୍ଡି : ଗଞ୍ଜାମ ଜିଲ୍ଲା ସାନଖେମୁଣ୍ଡିରେ ନିମ୍ନମାନର ପିଡିଏସ ଚାଉଳ ବଣ୍ଟନ । ଏନେଇ ଅଭିଯୋଗ ହେଉଥିଲେ ମଧ୍ୟ ଯୋଗାଣ ବିଭାଗ ନୀରବଦ୍ରଷ୍ଟା ସାଜିଥିବା ଅଭିଯୋଗ ହେଉଛି । ପୂର୍ବରୁ ଖଲିଙ୍ଗି ପଞ୍ଚାୟତରେ ନିମ୍ନମାନର ଚାଉଳ ବଣ୍ଟନ କରାଯାଇଥିବାରୁ ଅସନ୍ତୋଷ ଦେଖାଦେଇଥିଲା । ସେହିଭଳି ଚୁଡ଼ଙ୍ଗପୁର ପଞ୍ଚାୟତରେ ୩୦ କେଜି ଚାଉଳରେ ପ୍ରାୟ ୫୦୦ ଗ୍ରାମ ଧାନ ଗୋଡ଼ି ବାହାରିଥିବା ଅଭିଯୋଗ ହେଇଥିଲା । ବର୍ତ୍ତମାନ ଏରେଣ୍ଡ୍ରା ପଂଚାୟତରେ ନିମ୍ନମାନର ଚାଉଳ ଯୋଗାଇ ଦିଆଯାଉଥିବା ଅଭିଯୋଗ ହୋଇଛି l ଆଜି ସରକାରଙ୍କ ପକ୍ଷରୁ ପିଡିଏସ ଚାଉଳ ବଣ୍ଟନ କରାଯାଉଥିବା ବେଳେ ସେଥିରୁ ଧାନ, ଗୋଡ଼ି ମିଶା ଚାଉଳ ବାହାରିଥିଲା । ଫଳରେ ଚାଉଳ ଫେରାଇଛନ୍ତି ହିତାଧିକାରୀ l  ଗତ କିଛିମାସ ଏଭଳି ଚାଉଳ ମିଳୁଛି । ଏନେଇ ପ୍ରତିବାଦ ଓ ଅଭିଯୋଗ କଲେ ମଧ୍ୟ କୌଣସି କାର୍ଯ୍ୟକାରୀ ହେଉନାହିଁ ବୋଲି ଅଭିଯୋଗ କରିଛନ୍ତି ।  ଏନେଇ ବ୍ଲକ ଯୋଗାଣ ଅଧିକାରୀଙ୍କ ପ୍ରତିକ୍ରିୟା ମିଳିପାରିନାହିଁ ।