ଦୁର୍ବଳ ହେବା ପରେ ଝାଡ଼ଖଣ୍ଡ ମୁହାଁ ଲଘୁଚାପ, ଏବେ ରାଜ୍ୟରେ କମିବ ବର୍ଷା ପ୍ରକୋପ

ଭୁବନେଶ୍ୱର: ଲଘୁଚାପ କମିବା ନେଇ ଆସିଲା ଆଶ୍ୱସ୍ତି ଖବର । ରାଜ୍ୟରେ ଦୁର୍ବଳ ହେଲା ଲଘୁଚାପ । ଅବପାତର ରୂପ ନେଇପାରିଲା ନାହିଁ ଲଘୁଚାପ । ସ୍ଥଳଭାଗ ଛୁଇଁ ଥିବାରୁ ଅବପାତର ରୂପ ନେଇପାରିଲା ନାହିଁ । ଏହା ଫଳରେ ଏବେ ଝାଡ଼ଖଣ୍ଡ ମୁହାଁ ହେଲା ଲଘୁଚାପ । ଗତ ୨୪ ଘଣ୍ଟାରେ ରାଜ୍ୟର ବିଭିନ୍ନ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ରେକର୍ଡ କରାଯାଇଛି । ୨୪ ଘଣ୍ଟାରେ ମାଲକାନଗିରିରେ ସର୍ବାଧିକ ୧୦୪.୯ ମିଲିମିଟର ବର୍ଷା ରେକର୍ଡ କରାଯାଇଛି ।

ସେହିଭଳି ଆଗାମୀ ୨୪ ଘଣ୍ଟା ମଧ୍ୟରେ କୋରାପୁଟ, ନବରଙ୍ଗପୁର, ମାଲକାନଗିରି, ସୁନ୍ଦରଗଡ ଓ ଦେବଗଡରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଲଘୁଚାପ ପ୍ରଭାବରେ ଗଲା ୨ଦିନ ହେବ ସାରା ରାଜ୍ୟରେ ବର୍ଷା ଜାରି ରହିଥିଲା । ବର୍ଷା ଯୋଗୁଁ ବିଭିନ୍ନ ସ୍ଥାନରେ ଜଳବନ୍ଦୀ ପରିସ୍ଥିତି ସୃଷ୍ଟି ହୋଇଥିଲା । ଏବେ ସେସବୁ ସ୍ଥାନରେ ସ୍ଥିତି ସୁଧୁରୁଛି । ସେପଟେ ଆସନ୍ତା ୨୩ ତାରିଖରେ ପୁଣି ଆଉ ଏକ ଲଘୁଚାପ ଆସୁଛି । ଏହାର ପ୍ରଭାବରେ ରାଜ୍ୟରେ ପ୍ରବଳ ବର୍ଷା ହୋଇପାରେ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି ।