ପ୍ରେମିକାଙ୍କ ମାଆଙ୍କ ହାତ ଦେଖି କହିଲେ ସେଠି ବିବାହ କରାନ୍ତୁନି…
ଯାଜପୁର: ମନରେ ଭଲ ପାଇବା ଥିଲେ ପ୍ରେମ କେଉଁ ସ୍ତରକୁ ଯାଇପାରେ, କେଉଁ ମୋଡ଼ ନେଇପାରେ । ଏହାର ଉଦାହରଣ ଦେଖିବାକୁ ମିଳିଛି ଯାଜପୁରରେ । ଯାଜପୁର ରୋଡ୍ ଥାନା ଫେରୋକ୍ରୋମ ଗେଟ କଲୋନୀରେ ପ୍ରେମିକା ଘରକୁ ବାବା ବେଶରେ ଆସି ହଟହଟା ହୋଇଛନ୍ତି ଯୁବକ । ସୂଚନା ଅନୁସାରେ ପ୍ରେମିକାର ବାହାଘର ଠିକ୍ ହୋଇଯିବା ପରେ ଯୁବକ ଜଣଙ୍କ ବାବା ବେଶ ଧାରଣ କରି ଆସିଥିଲେ ।
ଯୁବତୀଙ୍କ ମାଆଙ୍କ ହାତ ଦେଖି ସ୍ଥିର ହୋଇଥିବା ଜାଗାରେ ବିବାହ ନକରିବାକୁ କହିଥିଲେ । ଏଥିସହ ଝିଅ ଯାହାକୁ ଭଲ ପାଉଛି ସେଠି ବାହାଘର କରନ୍ତୁ ବୋଲି କହିଥିଲେ ଯୁବକ । ପ୍ରେମିକ ବାବା ବେଶରେ ଆସି ପ୍ରବର୍ତ୍ତାଇବାକୁ ଚେଷ୍ଟା କରୁଥିବା ଯୁବତୀଙ୍କ ପରିବାର ଲୋକ ଜାଣିପାରିଥିଲେ । ପରେ ଅପରିଚିତ ବାବାଙ୍କୁ ସ୍ଥାନୀୟ ଲୋକ ପିଲାଚୋର ବୋଲି ସନ୍ଦେହ କରି ପୋଲିସ ଜମା ଦେଇଛନ୍ତି ।
ପୋଲିସ ଯୁବକ ଜଣଙ୍କୁ ଥାନାରେ ଅଟକ ରଖି ପଚରାଉଚରା କରୁଛି । ଯୁବକ ଜଣକ ଅନୁଗୁଳ ଅଞ୍ଚଳର ଯୁକ୍ତ ଦୁଇ କଲେଜ ଛାତ୍ର ବୋଲି ଜଣାପଡ଼ିଛି । ପ୍ରେମକୁ ଯୁବତୀଙ୍କ ପରିବାର ସ୍ୱୀକାର କରୁନଥିବାରୁ ଏଭଳି ଅଭିନୟ କରି ପ୍ରେମିକାଙ୍କ ଘରକୁ ଯାଇଥିବା ଯୁବକ ଜଣଙ୍କ କହିଛି ।
