ତାରାତାରିଣୀ ମନ୍ଦିରରୁ ଚୋରି ଘଟଣା: ଏଯାଏଁ ଚୋରଙ୍କ ଟେର ପାଇଲାନି ପୋଲିସ

ପୁରୁଷୋତ୍ତମପୁର: ଗଞ୍ଜାମ ଜିଲ୍ଲାର ଅଧିଷ୍ଠାତ୍ରୀ ଦେବୀ ମାଆ ତାରାତାରିଣୀଙ୍କ ମନ୍ଦିରରୁ ଚୋରି ଘଟଣା । ବର୍ତ୍ତମାନ ସୁଦ୍ଧା ଚୋରକୁ ଧରିବା ଛାଡନ୍ତୁ, ଚୋରି ସମ୍ପର୍କରେ ସୁରାକ ପାଇବାକୁ ବି ସଫଳ ହୋଇନାହିଁ ପୁରୁଷୋତ୍ତମପୁର ଥାନା ପୋଲିସ । ତଦନ୍ତ କାଲି ଯେଉଁଠି ଥିଲା ଆଜି ସେଇଠି ଅଟକିଛି । ହେଲେ ପୋଲିସ ହାତ ଖାଲି ।

ଜିଲ୍ଲା ପ୍ରଶାସନ ଓ ପୋଲିସ ଅତ୍ୟନ୍ତ ବେପାରୁଆ ଢଙ୍ଗରେ ତଦନ୍ତ କରୁଥିବା ସେବାୟତମାନେ ଅଭିଯୋଗ କରିଛନ୍ତି । ମନ୍ଦିରର ବାହାର ପାର୍ଶ୍ଵ ଓ ମନ୍ଦିର ଭିତରେ ଲାଗିଥିବା ସିସିଟିଭି କ୍ୟାମେରା ଗତ କିଛି ମାସ ହେଲା ଅଚଳ ରହିଛି । ଗତକାଲି ସେହି ସମସ୍ତ କ୍ୟାମେରାକୁ କାଢ଼ି ନିଆଯାଇଛି । ମନ୍ଦିରର ଉନ୍ନୟନ କାର୍ଯ୍ୟ ନିମନ୍ତେ ସିସିଟିଭି କ୍ୟାମେରାକୁ ବାହାର କରିଦିଆଯାଇଥିବା ପ୍ରଶାସନ କହୁଥିବା ବେଳେ ସେଗୁଡିକ କୁଆଡ଼େ ଗଲା ମନ୍ଦିର ପ୍ରଶାସନ ପାଖରେ ଖବର ନାହିଁ । ମନ୍ଦିରର ଆଲୋକିକରଣ ବ୍ୟବସ୍ଥା ସମ୍ପୂର୍ଣ୍ଣ ରୂପେ ଫେଲ୍ ମାରିଛି । ସନ୍ଧ୍ୟା ହୋଇଗଲେ ମନ୍ଦିର ପରିସର ସମ୍ପୂର୍ଣ୍ଣ ଅନ୍ଧାର ହୋଇଯାଉଛି । ସେହିପରି ମନ୍ଦିରରେ ଆବଶ୍ୟକ ସଂଖ୍ୟକ ସୁରକ୍ଷାକର୍ମୀ ନାହାନ୍ତି । ଗତକାଲି ରୀତିନୀତିରେ ୧ ଘଣ୍ଟା ବିଳମ୍ବ ହୋଇଥିବା ବେଳେ ଆଜି ରୀତିନୀତି ଠିକ୍‌ ଭାବେ ଚାଲିଥିବା କହିଛନ୍ତି ମନ୍ଦିରର ପୂଜକ ।