୨୦୪ ଫୁଟର କାଠ ଜାହାଜ: ଦାମ ଶୁଣିଲେ ହୋସ୍ ଉଡିଯିବ
କଚ୍ଛ: ମାଣ୍ଡବୀରେ ଏମିତି ଏକ କାଠ ଜାହାଜ ତିଆରି ହେଉଛି ଯାହା ବିଷୟରେ ଯିଏ ବି ଶୁଣୁନ୍ତି ଆଶ୍ଚର୍ଯ୍ୟ ହୋଇଯାଉଛନ୍ତି । ୨୦୪ ଫୁଟ ଉଚ୍ଚାର ଏହି ଜାହାଜରେ ରହିଛି ସବୁ ପ୍ରକାର ଅତ୍ୟାଧୁନିକ ସୁବିଧା । ଏଥିରେ ଅଛି ୯ଟି ଘର । କାଠ ବୋଟ୍ ତିଆରି ପାଇଁ ମାଣ୍ଡବୀ ବେଶ ପ୍ରସିଦ୍ଧ । ଦେଶର ବିଭିନ୍ନ ପ୍ରାନ୍ତରୁ କାଠ ବୋଟ୍ ପାଇଁ ଏଠାକୁ ଅର୍ଡର ଆସିଥାଏ । ଏଥର ଅର୍ଡର ଆସିଛି ଦୁବାଇରୁ । ସେଠିକାର ଜଣେ ବେପାରୀ ମାଛମରା ବୋଟ୍ ପାଇଁ ମାଣ୍ଡବୀର ବୋଟ୍ କାରିଗରଙ୍କୁ ବହୁତ ବଡ ଅର୍ଡର ଦେଇଛନ୍ତି ।
ବର୍ତ୍ତମାନ ସୁଦ୍ଧା ୧୭୦ରୁ ୧୮୦ ଫୁଟ ଲମ୍ବର ଜାହାଜ ମାଣ୍ଡବୀରେ ତିଆରି ହୋଇଛି । ହେଲେ ଏଥର ତିଆରି ହେଉଥିବା ଜାହାଜ ୨୦୪ ଫୁଟ୍ ଉଚ୍ଚା ଜାହାଜ ।
୧୭ ମାସ ହେଲା ଜାହାଜର କାମ ଚାଲିଛି । ୨୧ ମାସରେ ଏହାର କାମ ଶେଷ ହେବାକୁ ଥିଲା । ହେଲେ ଆହୁରି ଅଧିକ ୩ରୁ ୪ ମାସ ଲାଗିବ ବୋଲି କାରିଗର କହିଛନ୍ତି । ଜାହାଜକୁ ତିଆରି କରୁଥିବା କାରିଗରଙ୍କ ମତରେ କାମ ଆରମ୍ଭ ହେବା ପରେ ମାଲିକଙ୍କ ଡିମାଣ୍ଡ ବଢ଼ି ଯାଇଥିଲା । ଜାହାଜରେ କିଛି ନୂଆ କରିବାକୁ ସେ ବାରମ୍ବାର ଅର୍ଡର ଦେଉଥିଲେ । ଯେଉଁଥି ପାଇଁ ଏହାକୁ ନିର୍ଦ୍ଧାରିତ ସମୟରେ ସାରିବା ସମ୍ଭବ ହୋଇପାରିବନି । ଏଥିପାଇଁ ଆହୁରି ୪ ମାସ ଅଧିକ ସମୟ ଲାଗିବ । ଜାହାଜକୁ ଏମିତି ତିଆରି କରାଯାଉଛି ଏଥିରେ ଦୁବାଇ ମାଲିକ ଚାହିଁଲେ, ନିଜ ହିସାବରେ ଇଞ୍ଜିନ ଫିଟ୍ କରିପାରିବେ ।
ଜାହାଜରେ ରହିଛି ୯ଟି କୋଠରୀ । ୨ଟି ଷ୍ଟାର୍ ରୁମ୍ ଥିବା ବେଳେ ୨ଟି ଫ୍ରିଜର ରୁମ୍ ରହିଛି । ଏହାସହ ବୋଟ କର୍ମଚାରୀଙ୍କ ପାଇଁ ୨ଟି ରୁମ୍ ରହିଛି । ଜାହାଜ ଉପରେ ରୋଷେଇ ଘର ସହ ୩ଟି କୋଠରୀ ରହିଛି ।
ଯେତେବେଳେ ଜାହାର ନିର୍ମାଣ ପାଇଁ ଅର୍ଡର ଆସିଥିଲା ଏହାର ମୂଲ୍ୟ ୬.୫ କୋଟି ଟଙ୍କା ଥିଲା । ଯାହା ବଢ଼ି ଏବେ ୧୦ କୋଟି ଟଙ୍କାରେ ପହଞ୍ଚିଛି । ଜାହାଜ ମାଲିକ ଏଥିରେ କିଛି ପରିବର୍ତ୍ତନ କରିବାକୁ କହିବାରୁ ଏହାର ମୂଲ୍ୟ ଅଧିକ ୩.୫ କୋଟି ଟଙ୍କା ବଢ଼ି ଯାଇଛି ।
