ନୂଆଦିଲ୍ଲୀ: ଓମିକ୍ରନ ଓ କୋଭିଡ ବିପଦ ବଢିବା ପରେ ଦିଲ୍ଲୀରେ ବଢିଛି କଟକଣା । ୫୦ ପ୍ରତିଶତ ତଥା ଅଧା ଯାତ୍ରୀରେ ମେଟ୍ରୋ ଟ୍ରେନ ଚାଲିବାକୁ ଥିବା ବେଳେ ଛିଡା ହୋଇ ଯାତ୍ରାକୁ ନିଷିଦ୍ଧ କରାଯାଇଛି। ଦିଲ୍ଲୀ ବିପର୍ଯ୍ୟୟ ପ୍ରଶାସନ କର୍ତ୍ତୃପକ୍ଷ ବା ଡିଡିଏମଏର ନିର୍ଦ୍ଦେଶ କ୍ରମେ ଏହି ନିଷ୍ପତ୍ତି କାର୍ଯ୍ୟକାରୀ କରାଯାଇଛି।
ମେଟ୍ରୋ ସେବାରେ ଏଭଳି କଟକଣା ଲାଗୁ ଯୋଗୁଁ ସମସ୍ୟାରେ ପଡିଛନ୍ତି ଯାତ୍ରୀ। ବୁଧବାର ସକାଳେ ଲୋକମାନେ ଅଫିସ ଯିବା ଲାଗି ମେଟ୍ରୋରେ ପହଞ୍ଚିଥିଲେ। କିନ୍ତୁ କଟକଣା ପାଇଁ ସେମାନଙ୍କୁ ଲମ୍ବା ଲମ୍ବା ଲାଇନରେ ଛିଡା ହେବାକୁ ପଡିଥିଲା । ଦୀର୍ଘ ସମୟ ଧାଡିରେ ଛିଡା ହୋଇ ଅତିଷ୍ଠ ହୋଇଉଠିଥିଲେ ଯାତ୍ରୀ । ଏହି ଅବସରରେ କିଛି ଯାତ୍ରୀ କଟକଣା ବଦଳରେ ସରକାର ମେଟ୍ରୋ ସେବା ପୂରା ବନ୍ଦ କରିଦେବା ଉଚିତ୍ ବୋଲି କହିଥିଲେ ।
Long queues outside Delhi Metro's Shaheed Sthal (New Bus Adda) station in Ghaziabad, Uttar Pradesh as DMRC operates with 50% seating capacity and no standing passengers pic.twitter.com/0E1tJz4ZIS
— ANI UP/Uttarakhand (@ANINewsUP) December 29, 2021
ସେହିପରି ଡିଟିସିର ବସ୍ ମଧ୍ୟ ୫୦ ପ୍ରତିଶତ ତଥା ଅଧା ଯାତ୍ରୀରେ ଚାଲିବ । ଯାତ୍ରୀମାନେ ଠିଆ ହୋଇ ବସରେ ଯାତ୍ରା କରିପାରିବେ ନାହିଁ । ସଂକ୍ରମଣକୁ ଦୃଷ୍ଟିରେ ରଖି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ସହରରେ ୟେଲୋ ଆଲର୍ଟ ଜାରି କରିଛନ୍ତି। ଏହି ଆଲର୍ଟ ଅନୁସାରେ ସହରରେ ସ୍କୁଲ, କଲେଜ, ସିନେମା ଓ ଜିମ୍ ଆଦି ବନ୍ଦ ରହିବ। ଦିଲ୍ଲୀ ମେଟ୍ରୋ ରେଲ କର୍ପୋରେସନ ବା ଡିଏମଆରସି ନେଟଓ୍ବର୍କର ବର୍ତ୍ତମାନ ସୀମା ରହିଛି ୩୯୨ କିଲୋମିଟର ଏବଂ ୨୮୬ଟି ମେଟ୍ରୋ ଷ୍ଟେସନ ରହିଛି ।
ସେପଟେ ମୁମ୍ବାଇରେ ବାୟୁର ଗୁଣବତ୍ତା ଖରାପ ହୋଇଥିବା ବେଳେ କୋଭିଡ ଓ ଓମିକ୍ରନ ସଂକ୍ରମଣ ବୃଦ୍ଧି ପାଇଛି। ମାସ୍କ ପିନ୍ଧିବା ଲାଗି ବିଶେଷଜ୍ଞମାନେ ଲୋକଙ୍କୁ ପରାମର୍ଶ ଦେଇଛନ୍ତି । ମୁମ୍ବାଇରେ ୧୬୭ରୁ ଅଧିକ ଓମିକ୍ରନ ସଂକ୍ରମିତ ଚିହ୍ନଟ ହୋଇଥିବାବେଳେ ବାୟୁ ପ୍ରଦୂଷଣ ଅଧିକ ଚିନ୍ତାଜନକ ପରିସ୍ଥିତି ସୃଷ୍ଟି କରିଛି ।
