ଦେଶରେ ୭ମ ପର୍ଯ୍ୟାୟ ମତଦାନ ଆରମ୍ଭ, ଚାଲିଛି ନେତାଙ୍କ ଭାଗ୍ୟ ପରୀକ୍ଷା

ନୂଆଦିଲ୍ଲୀ: ଆଜି ଦେଶରେ ସପ୍ତମ ତଥା ଅନ୍ତିମ ପର୍ଯ୍ୟାୟ ପାଇଁ ମତଦାନ ଆରମ୍ଭ ହୋଇଛି। ଏହି ପର୍ଯ୍ୟାୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମେତ ବହୁ ହେଭିୱେଟଙ୍କ ଭାଗ୍ୟ ପରୀକ୍ଷା ହେଉଛି।

ଏହି ପର୍ଯ୍ୟାୟରେ ୮ଟି ରାଜ୍ୟର ୫୭ଟି ଲୋକସଭା ଆସନରେ ଭୋଟିଂ ଚାଲିଛି। କଡା ସୁରକ୍ଷା ବ୍ୟବସ୍ଥା ମଧ୍ୟରେ ସକାଳ ସାଢ଼େ ୬ଟାରୁ ଆରମ୍ଭ ହୋଇଛି ମତଦାନ। ଆଜି ଉଭୟ ଉତ୍ତରପ୍ରଦେଶ ଏବଂ ପଞ୍ଜାବରେ ୧୩ଟି, ପଶ୍ଚିମବଙ୍ଗରେ ୯, ବିହାରରେ ୮, ଓଡିଶାରେ ୬, ହିମାଚଳ ପ୍ରଦେଶରେ ୪, ଝାଡଖଣ୍ଡର ୩ ଏବଂ ଚଣ୍ଡିଗଡ଼ର ଏକାକୀ ଲୋକସଭା ଆସନ ପାଇଁ ମତଦାନ ହେଉଛି ।

ବାରାଣାସୀରୁ ପ୍ରତିଦ୍ୱନ୍ଦ୍ୱିତା କରୁଥିବା ପ୍ରଧାନମନ୍ତ୍ରୀ ମୋଦୀ, ହିମାଚଳ ପ୍ରଦେଶର ହମିରପୁରରୁ କେନ୍ଦ୍ର ମନ୍ତ୍ରୀ ଅନୁରାଗ ଠାକୁର, ବିହାରର ପାଟନା ସାହିବରୁ ରବି ଶଙ୍କର ପ୍ରସାଦ ଏବଂ ହିମାଚଳ ପ୍ରଦେଶର ମଣ୍ଡିରୁ ଅଭିନେତା କଙ୍ଗନା ରଣାୱତଙ୍କ ଭାଗ୍ୟ ପରୀକ୍ଷା ଚାଲିଛି । କିଏ ମାରିବ ବାଜି ତାହା ନିର୍ଦ୍ଧାରଣ କରୁଛନ୍ତି ଜନତା।

କଂଗ୍ରେସର ମନୀଷ ତେୱାରୀ ଚଣ୍ଡିଗଡ଼ରୁ ପ୍ରତିଦ୍ୱନ୍ଦ୍ୱିତା କରୁଥିବାବେଳେ ବିକ୍ରମଦିତ୍ୟ ସିଂ ହିମାଚଳ ପ୍ରଦେଶର ମଣ୍ଡି ଏବଂ ବାରଣାସୀରୁ ଅଜୟ ରାୟ ପ୍ରତିଦ୍ୱନ୍ଦ୍ୱିତା କରୁଛନ୍ତି। ମମତା ବାନାର୍ଜୀଙ୍କ ଭଣଜା ତଥା ତୃଣମୂଳ କଂଗ୍ରେସ ସାଂସଦ ଅଭିଷେକ ବାନାର୍ଜୀ ହୀରାଖଣ୍ଡରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି।