ବିଭିନ୍ନ ଗଣପର୍ବ ପୂର୍ବରୁ ଦେଶବାସୀଙ୍କୁ ସତର୍କ କରାଇଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ୨୧୫ ଦିନରେ ନମୋଙ୍କ ୧୭ ତମ ଉଦବୋଧନ

ନୂଆଦିଲ୍ଲୀ: କରୋନା ସାରା ବିଶ୍ୱକୁ କବଳିତ କରିଛି । ଏହା ଦ୍ୱାରା ଜନଜୀବନ ପ୍ରଭାବିତ ହୋଇଛି । ଏ ସବୁ ପରେ ମଧ୍ୟ ସ୍ୱାସ୍ଥ୍ୟ କର୍ମୀମାନଙ୍କ ପରିଶ୍ରମ ଏବଂ ଜନସାଧାରଣଙ୍କ ସହଯୋଗ କାରଣରୁ କରୋନାକୁ ନିୟନ୍ତ୍ରଣରେ ରଖାଯାଇଛି । ହେଲେ ଏଥିରେ ଖୁସି ହେବାର କାରଣ ନାହିଁ । କରୋନା ରୋଗର ନିରୂପଣ ପାଇଁ କୌଣସି ଔଷଧ ଆସିନାହିଁ  ।ତେଣୁ ଢିଲା ନ କରି ଅଧିକ ସତର୍କ ରହିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି । ବିଗତ ୨୧୫ ଦିନ ମଧ୍ୟରେ ୧୭ ଥର ପାଇଁ ମୋଦି ଦେଶବାସୀଙ୍କୁ ଉଦବୋଧନ ଦେଇଛନ୍ତି ।

ମଙ୍ଗଳବାର ସନ୍ଧ୍ୟା ୬ଟାରେ ଦେଶବାସୀଙ୍କୁ ସମ୍ବୋଧନ କରି ମୋଦି ଏହି କଥା କହିଛନ୍ତି । ନିଜ ବକ୍ତବ୍ୟରେ ମୋଦି ସନ୍ଥ କବୀର ଏବଂ ରାମ ଚରିତ ମାନସର ଉଦାହରଣ ଦେଇଥିଲେ । ସେ କବୀରଙ୍କ ପ୍ରସିଦ୍ଧ ପକ୍କି କ୍ଷେତି ଦେଖ କେ ଗରବ କିୟା କିଷାନକୁ ମନେ ପକାଇଥିଲେ । କହିଥିଲେ ବେଳେ ବେଳେ କ୍ଷେତରେ ପୂର୍ଣ୍ଣ ଫସଲ ଦେଖି କୃଷକ ଖୁସି ହୋଇ ଯାଇଥାଏ । ହେଲେ ଏହା ପରବର୍ତ୍ତୀ ସମୟରେ ବିଭିନ୍ନ କାରଣରୁ ନଷ୍ଟ ମଧ୍ୟ ହୋଇ ଯାଇଥାଏ । ତେଣୁ ଅମଳ ହୋଇଥିବା ଫସଲ ଯେ ପର୍ଯ୍ୟନ୍ତ ଘରକୁ ନ ଆସିଛି, ସେ ପର୍ଯ୍ୟନ୍ତ ସତର୍କ ରହିବା ଉଚିତ । ଠିକ୍ ସେହିପରି ଯେ ପର୍ଯ୍ୟନ୍ତ କରୋନାର ପ୍ରକୋପ ସମ୍ପୂର୍ଣ୍ଣ କମିଯାଇନାହିଁ । ଏହାର ପ୍ରତିଷେଧକ ଟୀକା ତଥା ଔଷଧ ବାହାରି ନାହିଁ ।  ସେ ଯାଏଁ ସତର୍କତାକୁ ଜାରି ରଖାଯାଉ ବୋଲି ନରେନ୍ଦ୍ର ମୋଦି କହିଛନ୍ତି । ଦେଶରୁ ଲକ୍ ଡାଉନ ସରିଛି, ହେଲେ କରୋନା ଭୂତାଣୁ ଯାଇନାହିଁ ବୋଲି କହି ମୋଦି କୋଭିଡ଼ ଭୟାବୟତା ସମ୍ପର୍କରେ ଗୁରୁତ୍ୱର ସହ ଉଲ୍ଲେଖ କରିଛନ୍ତି ।

ସେହିପରି ଭାରତ ସମେତ ଅନେକ ଦେଶ କରୋନା ଭ୍ୟାକସିନ୍ ନେଇ ପରୀକ୍ଷଣ ଜାରି ରଖିଛନ୍ତି । ଏ ଦିଗରେ ସକରାତ୍ମକ ଖବର ମଧ୍ୟ ଆସିବାରେ ଲାଗିଛି । ଅନୁରୂପ ଭାବେ ଭ୍ୟାକସିନ୍  ବାହାରିଲେ, ତାହା କିପରି ପ୍ରତିଟି ଭାରତୀୟ ପାଖରେ ପହଞ୍ଚିବ । ସେଥିପାଇଁ ସମସ୍ତେ ଧ୍ୟାନ  ଦେବା ଉଚିତ । ଏଥିପାଇଁ ସରକାରଙ୍କ ପକ୍ଷରୁ ସମସ୍ତ ଚେଷ୍ଟା କରାଯିବ ବୋଲି ପ୍ରଧାନମନ୍ତ୍ରୀ ଦେଶବାସୀଙ୍କୁ ଆଶ୍ୱସନା ଦେଇଛନ୍ତି।

ସେହିପରି ରାମଚରିତ ମାନସରେ ଶତ୍ରୁ, ଗତି ଏବଂ ବେମାରି(ରୋଗ)କୁ କଦାପି ହାଲୁକାରେ ନେବା ଉଚିତ ନୁହେଁ ବୋଲି କୁହାଯାଇଛି । ମାସ୍କ ପିନ୍ଧିବା ସହ ମାତ୍ର ୨ ଗଜର ଦୂରତା ଆମକୁ ମହାମାରୀ ଠାରୁ ଦୂରରେ ରଖିବ ବୋଲି ପ୍ରଧାନମନ୍ତ୍ରୀ କହିଛନ୍ତି । ବର୍ତ୍ତମାନ ନବରାତ୍ର ପୂଜା ଜାରି ରହିଛି । ଆଗକୁ ଦଶହରା ଆସୁଛି । ଶାରଦୀୟ ପୂଜା ପରେ ଦୀପାବଳି ମଧ୍ୟ ଆସିବ । ବିହାରର ପ୍ରସିଦ୍ଧ ଛଟ୍ ପର୍ବ ମଧ୍ୟ ଆଗକୁ ଆସିବ । ସେହିପରି ଗୁରୁନାନକ ଜୟନ୍ତୀ ମଧ୍ୟ ଆଗକୁ ଆସିବ । ଏହାକୁ କୋଭିଡ଼ କଟକଣା ମଧ୍ୟରେ ପାଳନ କରିବା ସହ ସତର୍କ ରହିବାକୁ ପ୍ରଧାନମନ୍ତ୍ରୀ ମୋଦି ଚେତାଇ ଦେଇଛନ୍ତି ।

କରୋନା ମୁକାବିଲା ପାଇଁ ଦେଶରେ ୯୦ ଲକ୍ଷ ଶର୍ଯ୍ୟା ପ୍ରସ୍ତୁତ ହୋଇ ରହିଛି । ପ୍ରାୟ ୧୨,୦୦୦ କ୍ୱାରଣ୍ଟାଇନ ସେଣ୍ଟରରହିଛି । ୨୦୦୦ ଲ୍ୟାବ୍ ରେ ଟେଷ୍ଟି ଚାଲିଛି । ଆଗାମୀ ଦିନରେ ଟେଷ୍ଟିଂ ସଂଖ୍ୟା ୧୦ କୋଟି ଛୁଇଁବାକୁ ଯାଉଛି । ସେବା ହିଁ ପରମ ଧର୍ମ । ଏହି ଥିରେ ବ୍ରତୀ ହୋଇ ସ୍ୱାସ୍ଥ୍ୟ କର୍ମୀ ସଫଳତାର ସହ କୋଭିଡ ମୁକାବିଲା କରିଥିବା ମୋଦି କହିଥିଲେ ।