ପଥର ଭାଙ୍ଗି ଚଳୁଥିଲେ ଦୃଷ୍ଟିହୀନ ପରିବାର, ପ୍ରଶାସନ ବନ୍ଦ କରିଦେଲା ପଥର ଭଙ୍ଗା

ମାଲକାନଗିରି: ଖରା, ବର୍ଷା, ଶୀତ, ବର୍ଷ ତମାମ୍ ପଥର ଭାଙ୍ଗି ପରିବାର ଚଳାନ୍ତି ଦୃଷ୍ଟିହୀନ । ଆଖିକୁ ଦିଶୁନଥିଲେ ମଧ୍ୟ ହାତ ବୋଲ ମାନୁନଥିଲା । ସକ୍ଷମ ଅନୁସାରେ ପଥର ବାଡେଇ ପରିବାର ପ୍ରତିପୋଷଣ କରୁଥିଲେ ମାଲକାନଗିରି ଜିଲ୍ଲା କାଲିମେଳାର ପରିମଳ ସାନା । ହେଲେ ବନ ବିଭାଗ ପଥର ଭାଙ୍ଗିବା ଉପରେ ରୋକ୍ ଲଗାଇବା ପରେ ହାତ ଯୋଡି ବସିଛନ୍ତି ଏହି ଦୃଷ୍ଟିହୀନ । ସରକାରୀ ସହାୟତା ପାଇଁ ପ୍ରଶାସନକୁ କରିଛନ୍ତି ଗୁହାରୀ ।

ମାଲକାନଗିରି ଜିଲ୍ଲା କାଲିମେଳା ବ୍ଲକ ଭୁବନପାଲି ପଞ୍ଚାୟତ MV-୧୧୫ ଗାଁର ଏହି ପରିମଳ ସାନା । ବୟସ ପାଖାପାଖି ୬୦ ଛୁଇଁଲାଣି । ଆଖିକୁ ଦିଶୁନାହିଁ । ପଥର ପିଟିଲେ ପୂରୁଥିଲା ପେଟ । ଚଳୁଥିଲା ପୂରା ପରିବାର । ହେଲେ ବେଆଇନ ପଥର ଭଙ୍ଗା ଉପରେ MV-୭୯ ବନ ବିଭାଗର ରୋକ୍ ଲଗାଇବା ପରେ ଅସହାୟ ହୋଇପଡିଛନ୍ତି ଏହି ଦୃଷ୍ଟିହୀନ । ଆଉ ବର୍ଷେ ହେଲା କୌଣସି କମଧନ୍ଦା ନପାଇ ହାତବାନ୍ଧି ବସି ରହିଛନ୍ତି ।

ସପ୍ତମ ଶ୍ରେଣୀରୁ ପରିମଳଙ୍କର ଦୁଇ ଆଖି ନଷ୍ଟ ହୋଇଯାଇଛି । ମାତ୍ର କାହା ଉପରେ ନିର୍ଭର ନକରି ୨୫ ବର୍ଷ ହେଲା ନିକଟ ପାହାଡ଼ରେ ପଥର ବାଡେଇ ପରିବାର ପୋଷୁଥିଲେ ପରିମଳ । ମାତ୍ର ଏବେ ପଥର ବାଡେଇବା ବନ୍ଦ ହେବା ପରେ ପରିମଳଙ୍କ ପକ୍ଷେ ପରିବାର ଚଳାଇବା ମୁସକିଲ ହୋଇଯାଇଛି । ଆଉ ସରକାରୀ ସହାୟତା ପାଇଁ ପ୍ରଶାସନକୁ ଗୁହାରୀ କରିଛନ୍ତି । ଦୃଷ୍ଟିହୀନ ପରିମଳ କିପରି ପରିବାର ଚଳାଇବେ ତାହା ଏବେ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଥିବା ବେଳେ ସରକାରୀ ସହାୟତା ପାଇଁ ଦାବି କରିଛନ୍ତି ଗ୍ରାମବାସୀ ।