ବାଛୁରୀକୁ ଗୁହାଳରୁ ଟାଣି ଆଣିଲା ବାଘ, ଗତ ଏକ ସପ୍ତାହ ହେବ ଗାଁରେ ଆତଙ୍କ
ନୂଆପଡ଼ା: ଜିଲ୍ଲାରେ ପୁଣି ବାଘ ଆତଙ୍କ । ବାଛୁରୀକୁ ଗୁହାଳରୁ ଟାଣି ଆଣିଲା ବାଘ । ନୂଆପଡ଼ା ରେଞ୍ଜ ଅଧିନ ଆମାନାରା ପଂଚାୟତ ମୁଷରଙ୍ଗୀ ସଂରକ୍ଷିତ ଜଙ୍ଗଲ ଅଞ୍ଚଳର ଘଟଣା । ତରିଆମହୁଆଭଟା ଗାଁରେ ପୁଣି ବାଘ ଏକ ବାଛୁରୀକୁ ମାରି ଖାଇଛି । ହୁମନ ନାଏକ ନିଜ ଗାଈ ଓ ବାଛୁରୀକୁ ଗୁହାଲରେ ବାନ୍ଧି ରଖିଥିଲେ । ଆଜି ସକାଳୁ ବାଛୁରୀ ଗୁହାଳରେ ନଥିଲା ।
ପରିବାର ଲୋକେ ଖୋଜା ଖୋଜି କରିବାରୁ ଘର ବାଡ଼ି ପଟେ ବାଛୁରୀର ମୃତଦେହ ପଡିଥିଲା । ଘଟଣାସ୍ଥଳରେ ବାଘର ପଦଚିହ୍ନ ଠାବ କରିବା ସହ ପରିପାଶ୍ବିକ ସ୍ଥିତିରୁ ବାଛୁରୀକୁ କଲରାପତରିଆ ବାଘ ଶିକାର କରିଥିବା ଲୋକେ ଅନୁମାନ କରିଛନ୍ତି । ଗାଁରେ ୫ ମାସ ହେବ ବାଘ ଆତଙ୍କ ଜାରି ରହିଛି । ଗତ ଏକ ସପ୍ତାହ ହେବ ଗାଁରେ ପୁଣି ବାଘ ଉପସ୍ଥିତି ଲୋକେ ବାଛୁରୀ ଶିକାର ପରେ ଅନୁମାନ କରୁଛନ୍ତି ।
ଏବେ ଗାଁ ଲୋକେ ବାଘ ଭୟରେ ରହୁଛନ୍ତି । ଏବେ ବନ ବିଭାଗ କର୍ମଚାରୀ ଘଟଣା ସ୍ଥଳରେ ପହଞ୍ଚି ବାଛୁରୀର ମୃତଦେହକୁ ଜବତ କରି ତଦନ୍ତ ଆରମ୍ଭ କରିଛି ।
