ଆଜିଠୁ ବାରବାଟୀରେ ଲିଜେଣ୍ଡସ ଲିଗ୍ ମ୍ୟାଚ୍, ମୁହାଁମୁହିଁ ହେବେ ମଣିପାଲ ଟାଇଗର୍ସ ଓ ଭିଲୱାରା କିଙ୍ଗ୍ସ

ନନ୍ଦିଘୋଷ ବ୍ୟୁରୋ: ଆଜିଠୁ କଟକର ବାରବାଟୀ ଷ୍ଟାଡିୟମରେ ଲିଜେଣ୍ଡସ କ୍ରିକେଟ୍ ଲିଗ୍ ମ୍ୟାଚ୍ । ପ୍ରଥମ ଦିନରେ ମୁହାଁମୁହିଁ ହେବେ ମଣିପାଲ ଟାଇଗର୍ସ ଓ ଭିଲୱାରା କିଙ୍ଗ୍ସ । ସନ୍ଧ୍ୟା ୭ଟାରୁ ଆରମ୍ଭ ହେବ ମ୍ୟାଚ୍ । ମଣିପାଲ୍ ଟାଇଗର୍ସକୁ ହରାଇ ପ୍ରତିଶୋଧ ନେବା ଲକ୍ଷ୍ୟରେ ପଡ଼ିଆକୁ ଓହ୍ଲାଇବ ଭିଲଓ୍ବାରା କିଙ୍ଗ୍ସ । ଗତକାଲି ଉଭୟ ଟିମ ଆସି ଭୁବନେଶ୍ବରରେ ପହଞ୍ଚିଥିଲେ ।

ଆଜି କଡ଼ା ସୁରକ୍ଷା ଭିତରେ ହୋଟେଲ ମେ ଫେୟାରରୁ ଖେଳାଳିଙ୍କୁ ବାରବାଟୀ ନିଆଯିବ । ମ୍ୟାଚ ପୂର୍ବରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଛନ୍ତି ଲିଜେଣ୍ଡସ୍ କ୍ରିକେଟର । ସମସ୍ତ ଖେଳାଳିଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶା ଲେଖାଥିବା ଜର୍ସି ପ୍ରଦାନ କରିଛନ୍ତି । ଏହା ସହିତ ମ୍ୟାଚ ପାଇଁ ଶୁଭେଚ୍ଛା ଜଣାଇଛନ୍ତି ।

ଆସନ୍ତାକାଲି ଗୁଜୁରାଟ ଜିଆଣ୍ଟସ ଓ ଭିଲଓ୍ବାରା କିଙ୍ଗ୍ସ ମଧ୍ୟରେ ଦ୍ବିତୀୟ ମ୍ୟାଚ ଏବଂ ୨୯ ତାରିଖରେ ଇଣ୍ଡିଆ କ୍ୟାପିଟାଲ୍ସ ଓ ମଣିପାଲ ଟାଇଗର୍ସ ମଧ୍ୟରେ ତୃତୀୟ ଲିଗ୍ ମ୍ୟାଚ ହେବ । ସୁରୁଖୁରୁରେ ମ୍ୟାଚ ପାଇଁ ପ୍ରସ୍ତୁତି କରାଯାଇଛି । ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ମ୍ୟାଚ ବେଳେ ଯେପରି କୌଣସି ବିଶୃଙ୍ଖଳା ସୃଷ୍ଟି ନହେବ ସେଥିପ୍ରତି ଗୁରୁତ୍ବ ଦିଆଯାଇଛି ।