ବିଗିଡିବାରେ ଲାଗିଛି ରାଜଧାନୀର ଆଇନଶୃଙ୍ଖଳା, ସହରର ଛାତି ଉପରେ ଲୁଟେରାଙ୍କ ହଲ୍ଲାବୋଲକୁ ନେଇ ଚିନ୍ତାରେ ସହରବାସୀ

ଭୁବନେଶ୍ବର : ୨୫ ତାରିଖ ରାତିରେ ନିରଞ୍ଜନ ପଟ୍ଟନାୟକଙ୍କ ଘରୁ ଲୁଟ ଆଉ ଗତକାଲି ରାତିରେ ନୟାପଲ୍ଲୀ N2 ରେ ଥିବା ଆଉ ଏକ ଘରୁ ଲୁଟ ଉଦ୍ୟମ । ରାତି ପ୍ରାୟ ୧୧ ଟା ୩୫ ବେଳେ ନିରଞ୍ଜନଙ୍କ ପଡୋଶୀ ଘରେ ପଶିଛି ଚୋର । N 25 ପ୍ଲଟ ନମ୍ବର ରେ ପଶିଥିବା ବେଳେ ଏ ହେଉଛି ସିସିଟିଭି । ଦେଖନ୍ତୁ ମୁଣ୍ଡରେ କ୍ୟାପ ଲଗାଇ କିଭଳି ବୁଲୁଛି ଚୋର । ସିସିଟିଭିରେ ଚୋର ପଶିଥିବା ଦେଖି ସ୍ଥାନୀୟ ଲୋକେ ଏକାଠି ହୋଇ ପୋଲିସକୁ ଖବର ଦେଇଥିଲେ । ରାତି ଅଧରେ ନିଜେ ଭୁବନେଶ୍ୱର ଡିସିପି ମଧ୍ୟ ଘଟଣାସ୍ଥଳରେ ପହଁଚି ଚୋରକୁ କାବୁ କରିଥିଲେ । କିନ୍ତୁ ପୂର୍ବ ଲୁଟ ର ଅଭିଯୁକ୍ତ ସହ ଏ ଲୁଟେରାର କୌଣସି ସମ୍ପୃକ୍ତି ନଥିବା ଜାଣିବାକୁ ପାଇଛି ପୋଲିସ୍ । ତେବେ ଗୋଟିଏ ପଟେ ଉତ୍କର୍ଷ ଓଡିଶା ପାଇଁ ଛକ ବଜାରରେ ଚେକିଂ ବ୍ଲକିଂ କୁ ବ୍ୟାପକ କରାଯାଇଥିବା ବେଳେ ଲୁଟେରାଙ୍କ ଏଭଳି ହଲାବୋଲକୁ ସହଜରେ ଗ୍ରହଣ କରିପାରିନାହାନ୍ତି ସାଧାରଣ ଲୋକେ ।

ଲିଙ୍ଗରାଜ ଥାନା ସମନ୍ତରାପୁର ର ଶ୍ରୀରାମନଗର ରେ ଥିବା SBI ଏଟିଏମ ରେ ପଶି ୧୦ ଲକ୍ଷରୁ ଉର୍ଦ୍ଧ୍ବ ଟଙ୍କା ଲୁଟିନେଇଥିଲେ ଲୁଟେରା। କେବଳ ଟଙ୍କା ଲୁଟିନଥିଲେ ବରଂ ATM ମେସିନକୁ ତାଡି ନେଇ ଗଙ୍ଗୁଆ ନାଳରେ ଫୋପାଡିଥିଲେ । ସେହି କେସରେ ପୋଲିସ ଅଭିଯୁକ୍ତଙ୍କୁ ଏଯାବତ ଧରିପାରିନାହିଁ । ସେହିପରି ଧଉଳି ଥାନା ଲିଙ୍ଗିପୁର ମେଳନ ପଡିଆ ନିକଟରୁ ମିଳିଛି ମହିଳାଙ୍କ ଗଳିତ ମୃତଦେହ । ୧୦ ରୁ ୧୫ ଦିନ ପୂର୍ବରୁ ତାଙ୍କର ମୃତ୍ୟୁ ହୋଇଥିବା ବେଳେ ଦୟା ନଦୀ କୂଳରୁ ମୃତଦେହ ଜବତ କରାଯାଇଛି । ସ୍ଥାନୀୟ ଲୋକେ ଏହାକୁ ଦୁଷ୍କର୍ମ ସହ ହତ୍ୟା ବୋଲି ସନ୍ଦେହ କରୁଥିବା ବେଳେ ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିଛି । ସହର ବଢିବା ସାଙ୍ଗକୁ ଅପରାଧୀଙ୍କ ଅପରେସନ ର ଅନ୍ଦାଜ ପରିବର୍ତ୍ତନ ହେଉଥିବା ଦେଖି ଚିନ୍ତାପ୍ରକଟ କରିଛନ୍ତି ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକ ।