ଲତା ମଙ୍ଗେସକର ପୁଣି ଅସୁସ୍ଥ, ଭେଣ୍ଟିଲେଟରରେ ଭର୍ତ୍ତି
ମୁମ୍ବାଇ: ସ୍ବାର ସାମ୍ରାଜ୍ଞୀ ଲତା ମଙ୍ଗେସକର ପୁଣି ଗୁରୁତର । ଭେଣ୍ଟିଲେଟରରେ ଚାଲିଛି ଚିକିତ୍ସା । କରୋନା ସଂକ୍ରମଣ ହେବା ପରେ ତାଙ୍କୁ ଜାନୁଆରୀ ୮ ତାରିଖରେ ମେଡିକାଲରେ ଭର୍ତ୍ତି କରାଯାଇଥିଲା । ଚିକିତ୍ସା ପରେ ସେ ସୁସ୍ଥ ହେବାରୁ ତାଙ୍କୁ ଭେଣ୍ଟିଲେଟରରୁ ବାହାରକୁ ଅଣା ଯାଇଥିଲା । ହେଲେ ସେ ପୁଣି ଗୁରୁତର ହୋଇପଡିଛନ୍ତି । ବର୍ତ୍ତାମାନ ତାଙ୍କୁ ଆଇସିୟୁରେ ରଖାଯାଇ ଭେଣ୍ଟିଲେଟରରେ ଚିକିତ୍ସା ଚାଲିଛି ।
ଲତା ମଙ୍ଗେସକରଙ୍କ ଚିକିତ୍ସା କରୁଥିବା ଡାକ୍ତର ପ୍ରତୀତ ସମଧାନୀ କହିଛନ୍ତି, ‘ଲତାଜୀଙ୍କ ସ୍ବାସ୍ଥ୍ୟ ପୁଣି ଥରେ ବିଗିଡିଛି । ତାଙ୍କୁ ତୁରନ୍ତ ଭେଣ୍ଟିଲେଟରକୁ ସ୍ଥାନାନ୍ତର କରାଯାଇଛି । ଏକ ଡାକ୍ତରୀ ଟିମ୍ ୨୪ ଘଣ୍ଟା ତାଙ୍କ ସ୍ବାସ୍ଥ୍ୟ ଉପରେ ନଜର ରଖିଛନ୍ତି ।’
୫ଦିନ ପୂର୍ବରୁ ମହାରାଷ୍ଟ୍ର ସ୍ବାସ୍ଥ୍ୟମନ୍ତ୍ରୀ ରାଜେଶ ଟୋପେ କହିଥିଲେ, ‘ଲତାଜୀଙ୍କ ସ୍ବାସ୍ଥ୍ୟରେ ଉନ୍ନତି ଘଟୁଛି । ମୁଁ ତାଙ୍କ ଚିକିତ୍ସା କରୁଥିବା ଡାକ୍ତରଙ୍କ ସହ କଥା ହୋଇଛି । କରୋନାରୁ ମୁକ୍ତ ହୋଇଥିବା ବେଳେ ନିମୋନିଆ ମଧ୍ୟ କମି ଯାଇଛି । ଏବେ ତାଙ୍କୁ କେବଳ ଅକ୍ସିଜେନ ଦିଆଯାଉଛି । ସେ ଆଖି ଖୋଲିବା ସହ ଡାକ୍ତରଙ୍କ ସହ କଥା ମଧ୍ୟ ହେଉଛନ୍ତି । କରୋନା ସଂକ୍ରମଣ ହେବା ପରେ ସେ କିଛି ମାତ୍ରାରେ ଦୁର୍ବଳ ହୋଇପଡିଛନ୍ତି ।’
ତେବେ ଲତାଜୀଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଥିବା ନେଇ ମିଛ ଖବର ପ୍ରଚାରିତ ହୋଇଥିଲା । ଏହାପରେ ଲତାଜୀଙ୍କ ପରିବାର ପକ୍ଷରୁ ଟ୍ବିଟ୍ କରି ଏମିତି ଖବରକୁ ଗୁଜବ ବୋଲି କହିଥିଲେ । ଦୟାକରି ଏମିତି ମିଛ ଖବର ପ୍ରଚାର ବନ୍ଦ କରିବାକୁ ତାଙ୍କ ପରିବାର ପକ୍ଷରୁ ଅନୁରୋଧ କରାଯାଇଥିଲା ।
