ଏୟାର ଆମ୍ବୁଲାନ୍ସରେ ରାଞ୍ଚିରୁ ଲାଲୁ ଯାଦବଙ୍କୁ ନିଆଗଲା ଦିଲ୍ଲୀ ଏମ୍ସ

ନୂଆଦିଲ୍ଲୀ: ରାଞ୍ଚି ଏମ୍ସରେ ସ୍ୱାସ୍ଥ୍ୟାବସ୍ଥା ବିଗିଡ଼ିବା ପରେ ଲାଲୁ ପ୍ରସାଦ ଯାଦବଙ୍କୁ ଦିଲ୍ଲୀ ଏମ୍ସରେ ଭର୍ତ୍ତି କରାଯାଇଛି । ଲାଲୁଙ୍କୁ ସ୍ୱତନ୍ତ୍ର ଏୟାର ଆମ୍ବୁଲାନ୍ସ ଯୋଗେ ଦିଲ୍ଲୀ ନିଆଯାଇଥିଲା । ବିମାନବନ୍ଦରରୁ ଗ୍ରୀନ୍ କରିଡର କରି ଲାଲୁଙ୍କୁ ଏମ୍ସର କାର୍ଡିଓ ନ୍ୟୁରୋ ସର୍ଜନ ବିଭାଗରେ ଭର୍ତ୍ତି କରାଯାଇଛି । ତେବେ, ତାଙ୍କ ସ୍ୱାସ୍ଥ୍ୟାବସ୍ଥା ନେଇ ଦିଲ୍ଲୀ ଏମ୍ସ ପକ୍ଷରୁ କୌଣସି ବୁଲେଟିନ୍ ଜାରି କରାଯାଇନାହିଁ ।

ଏହା ପୂର୍ବରୁ ଲାଲୁଙ୍କ ପୁଅ ତେଜସ୍ୱୀ ଯାଦବ ବାପାଙ୍କ ସ୍ୱାସ୍ଥ୍ୟାବସ୍ଥା ଚିନ୍ତାଜନକ ଥିବା କହିଥିଲେ । ଲାଲୁଙ୍କ କିଡନୀ ୨୫ ପ୍ରତିଶତ କାମ କରୁଥିବା ଏବଂ ଫୁସଫୁସରେ ପାଣି ଜମିଥିବା କହିଥିଲେ ତେଜସ୍ୱୀ । ଅଧିକ ଚିକିତ୍ସା ପାଇଁ ଲାଲୁଙ୍କୁ ଦିଲ୍ଲୀ ଏମ୍ସ ନିଆଯାଇପାରେ ବୋଲି ସେ କହିଥିଲେ । ପୂର୍ବରୁ ୨୦୧୮ ମାର୍ଚ୍ଚରେ ଲାଲୁଙ୍କୁ ଏମ୍ସରେ ଭର୍ତ୍ତି କରାଯାଇଥିଲା ।

ଗୋ-ଖାଦ୍ୟ ଦୁର୍ନୀତିରେ ସଜ୍ଜା କାଟୁଥିବା ଲାଲୁଙ୍କ ଚିକିତ୍ସା ରାଞ୍ଚିସ୍ଥିତ ରିମ୍ସରେ କରାଯାଉଥିଲା । ସ୍ୱାସ୍ଥ୍ୟାବସ୍ଥା ବିଗିଡ଼ିବାରୁ ରିମ୍ସର ଉଚ୍ଚସ୍ତରୀୟ ବୋର୍ଡ ଲାଲୁଙ୍କୁ ଦିଲ୍ଲୀ ଏମ୍ସ ସ୍ଥାନାନ୍ତରଣ କରିବାକୁ ସୁପାରିସ୍ କରିଥିଲା ।