ସରଗରମ ବିହାର ରାଜନୀତି, ଜେଲ୍ ଭିତରୁ ନୀତିଶଙ୍କୁ ତାତ୍ସଲ୍ୟ କଲେ ଲାଲୁ
ବିହାର: ସରଗରମ ବିହାର ରାଜନୀତି । ନିର୍ବାଚନ ଯେତିକି ପାଖେଇ ଆସୁଛି ଆରୋପ ପ୍ରତ୍ୟାରୋପର ମାତ୍ରା ସେତିକି ବଢିବାରେ ଲାଗିଛି । ମୁଖ୍ୟମନ୍ତ୍ରୀ ନୀତିଶ କୁମାର ମଧ୍ୟ ପ୍ରଚାର ରାଲିରେ ବିରୋଧୀଙ୍କ ଉପରେ ପ୍ରବଳ ବର୍ଷୁଛନ୍ତି । ସେରଘାଟୀ ବିଧାନସଭା କ୍ଷେତ୍ରରେ ରାଲି ସମୟରେ ତେଜସ୍ୱୀ ଯାଦବଙ୍କ ୧୦ ଲକ୍ଷ ସରକାରୀ ଚାକିରି ଘୋଷଣାକୁ ତୀବ୍ର ସମାଲୋଚନା କରିଛନ୍ତି ନୀତିଶ । ତେଜସ୍ୱୀଙ୍କୁ ତାତ୍ସଲ୍ୟ କର ସେ କହିଛନ୍ତି କିଛି ଲୋକ କେବଳ କହିବା ଜାଣନ୍ତି, ହେଲେ ଲୋକଙ୍କ କାମ ଆସିବାବେଳେ ଦେଖା ଦିଅନ୍ତି ନାହିଁ ।
ଲାଲୁ ଯାଦବଙ୍କୁ ଯେତେବେଳେ ଜେଲ ହେଲା, ସେତେବେଳେ ପତ୍ନୀ ରାବିଡି ଦେବୀଙ୍କୁ କ୍ଷମତାରେ ବସାଇଦେଲେ । ହେଲେ ଜନତା ଜାଣିଛନ୍ତି ଏହି ମହିଳା ମୁଖ୍ୟମନ୍ତ୍ରୀ ରାଜ୍ୟର ମହିଳାଙ୍କ ପାଇଁ କଣ କରିଛନ୍ତି ! ସେପଟେ ଜେଲରେ ଥିବା ଲାଲୁ ଯାଦବ ନୀତିଶଙ୍କ ଏହି ମନ୍ତବ୍ୟର ଜବାବ ଦେଇଛନ୍ତି । ନୀତିଶଙ୍କୁ ଟ୍ୱିଟ୍ କରି ଲାଲୁ କହିଛନ୍ତି, ‘ସେ ବୁଢା ହୋଇ ଗଲେଣି । ଏବେ ବିଶ୍ରାମ ନେବାର ବୟସ ଆସିଯାଇଛି । ସେଥିପାଇଁ ସେ ଏଣୁତେଣୁ ଗପି ଚାଲିଛନ୍ତି ।’
ସୂଚନାଯୋଗ୍ୟ ଯେ, ପ୍ରଥମ ଥର ପାଇଁ ଏହି ବିଧାନସଭା ନିର୍ବାଚନରେ ଲାଲୁ ଅନୁପସ୍ଥିତ ରହିବେ । ଆସନ୍ତା ୨୮ ଅକ୍ଟୋବରରେ ପ୍ରଥମ ପର୍ଯ୍ୟାୟରେ ୭୧ ବିଧାନସଭା ଆସନ ପାଇଁ ଭୋଟିଂ ହେବ । ଏହି ୭୧ ଆସନରେ ୧ ହଜାର ୬୬ ଜଣ ପ୍ରାର୍ଥୀ ସେମାନଙ୍କ ଭାଗ୍ୟ ନିର୍ଦ୍ଧାରଣ କରିବେ । ଏଥିପାଇଁ ସମସ୍ତ ଦଳ ଭୋଟରଙ୍କୁ ମନାଇବାକୁ ନିଜର କଳବଳ କୌଶଳ ଜାରି ରଖିଛନ୍ତି ।
