ଭୁବନେଶ୍ୱରରେ ଆପାର୍ଟମେଣ୍ଟ, ସୁନ୍ଦରଗଡ଼ରେ ଆଲିସାନ ବିଲ୍ଡିଂ । ଠକେଇ ଟଙ୍କାରେ ଅଏସ୍ କରୁଥିଲେ ଜ୍ୟୋସ୍ନା ଖୁଣ୍ଟିଆ। ଫେରାର 420 ମହିଳାଙ୍କୁ ଧରିବାକୁ ଚଢ଼ାଉ ଜାରି ରଖିଛି ବଡଗଡ଼ ଥାନା ପୋଲିସ। ଫ୍ରିଜ ହୋଇଛି ଆକାଉଣ୍ଟ, ଜାରି ହେବ ଲୁକ୍ ଆଉଟ ସର୍କୁଲାର । ଭଲକରି ନଜର ପକାନ୍ତୁ ଏହି ମହିଳା ଜଣଙ୍କ ଉପରେ। ସଉକ ପୁରା କରିବା ପାଇଁ ଲୋକଙ୍କ ଝାଲବୁହା ଧନକୁ ଚଳୁ କରିଦେଉଥିଲେ ଏହି ମହିଳା । ନାଁ ଜ୍ୟୋସ୍ନା ଖୁଣ୍ଟିଆ । ବଡଗଡ଼ ଅଞ୍ଚଳରେ ରହୁଥିଲେ । ବରମୁଣ୍ଡା ଅଞ୍ଚଳରେ କନ୍ସଲଟାନ୍ସୀ କରିଥିଲେ । କୋଟି କୋଟି ଟଙ୍କା ଠକେଇ ଅଭିଯୋଗରେ ଫେରାର ଥିବା ଜ୍ୟୋସ୍ନା ମ୍ୟାଡାମଙ୍କ ବିରୋଧରେ ଜାରି ହେବ ଲୁକ ଆଉଟ ସର୍କୁଲାର । ଫ୍ରିଜ ହୋଇଛି ଆକାଉଣ୍ଟ । ରାଜ୍ୟର ୧୦ ରୁ ଉର୍ଦ୍ଧ୍ବ ଜିଲ୍ଲାର ଚାକିରି ଆଶାୟୀ ଯୁବକ ଯୁବତୀଙ୍କ ଠାରୁ ମହିଳା ଜଣଙ୍କ ଠକେଇ କରିଛନ୍ତି କୋଟି କୋଟି ଟଙ୍କା । ଆଉ ମ୍ୟାଡାମଙ୍କ ଠକେଇ ସିଣ୍ଡିକେଟରେ ଯୋଡି ହୋଇ ପ୍ରାଣ ହରାଇଛନ୍ତି ଡ୍ରାଇଭର ବିଦ୍ୟାଧର ସାହୁ । ଚାକିରି ଆଶାୟୀ ପ୍ରାର୍ଥୀ ତାଙ୍କୁ ଅପହରଣ କରି ନେବା ପରେ ମାନସିକ ଓ ଶାରୀରିକ ନିର୍ଯ୍ୟାତନା ପାଇଁ ସେ ଆତ୍ମହତ୍ୟା କରିଛନ୍ତି । ତେବେ ଏଥିରେ ସମ୍ପୃକ୍ତ ଥିବା ଜ୍ୟୋସ୍ନା ଖୁଣ୍ଟିଆଙ୍କୁ ପୋଲିସ ଧରିଲେ ଅନେକ ରହସ୍ୟ ଉପରୁ ପର୍ଦ୍ଦା ହଟିପାରିବ ।
ପୂର୍ବରୁ ଏହି ଘଟଣାରେ ଗଜପତି ଜିଲ୍ଲା ପାରଳାଖେମୁଣ୍ଡି ଓ ଗୁରାଣ୍ଡିର ଦିଲ୍ଲୀପ କୁମାର, ଦୀପକ ସାହୁକାର , ରବୀନ୍ଦ୍ର ବେହେରା ଓ ରମେଶ ବେହେରାଙ୍କୁ ଗିରଫ କରାଯାଇଛି । ଅଭିଯୁକ୍ତ ମାନଙ୍କୁ ଅପହରଣ, ନିର୍ଯ୍ୟାତନା, ଆତ୍ମହତ୍ୟା ପାଇଁ ପ୍ରବର୍ତ୍ତାଇବା ଦଫାରେ ଗିରଫ କରିଛି ପୋଲିସ। ମୃତ ବିଦ୍ୟାଧର ଚାକିରି ଦେବାର ପ୍ରଲୋଭନ ଦେଖାଇ ସେମାନଙ୍କ ଠାରୁ ପାଖାପାଖି କୋଟିଏ ଟଙ୍କା ନେଇଯାଇଥିଲେ । ଟଙ୍କା ନେଇ ସେ ଜ୍ୟୋସ୍ନା ଖୁଣ୍ଟିଆଙ୍କୁ ଦେଇଥିଲେ। ପରେ ତାଙ୍କର ମୃତ୍ୟୁ ହେବା ପରେ ଅପହରଣକାରୀ ମାନେ ତାଙ୍କ ମୃତଦେହକୁ ଚନ୍ଦକା ଜଙ୍ଗଲ ରେ ଫିଙ୍ଗି ଚାଲିଯାଇଥିଲେ। ଧମକ ପୂର୍ଣ୍ଣ କଲ ରେକର୍ଡ଼ିଂ, ସିସିଟିଭି, ଟୋଲ ଗେଟ ଫାସ ଟ୍ୟାଗରୁ ମିଳିଥିବା ତଥ୍ୟ ଆଧାରରେ ଅଭିଯୁକ୍ତ ପାଖେ ପହଞ୍ଚିଥିଲା ପୋଲିସ। ବିଭିନ୍ନ ସ୍ଥାନରେ ଚଢ଼ାଉ ସମୟରେ ଶତାଧିକ ପିଲାଙ୍କ ସାର୍ଟିଫିକେଟ, ଫେକ ଆପଏଂଟମେଣ୍ଟ ଲେଟର, ଫେକ ଷ୍ଟାମ୍ପ, ନକଲି ଚେକ୍ ଦେଖି ପୋଲିସର ଅକଲ ଗୁଡୁମ ହୋଇଛି।
