ବିବାହ ଉତ୍ସବରେ ଦୁଲୁକିଲା କୁସମେଲ ଗାଁ, ଜଳକନ୍ୟାର କନ୍ୟାଦାନ କଲେ ସ୍ଥାନୀୟ ବିଧାୟକ
ଝାରସୁଗୁଡ଼ା: ହାତରେ ମେହେନ୍ଦୀ ପାଦରେ ଅଳତା। ବାହା ବେଦୀରେ ବସିଛି ଜଳକନ୍ୟା। ଦୁଲୁକିଲା ଗାଁ ଦାଣ୍ଡ । ହାତଗଣ୍ଠି ପଡିବା ପରେ ସାଜ ସାମାନ ନେଇ ସ୍ବାମୀଘରକୁ ଯିବେ । ଦିନେ ମହାନଦୀର ପ୍ରଖର ସ୍ରୋତ ବଦଳେଇ ଥିଲା ଠିକଣା । ଆଉ ଆଜି ଠିକଣା ପାଇଛି ଝାରସୁଗୁଡ଼ା ଜିଲ୍ଲା ରେଙ୍ଗାଲି କୁସମେଲ ଗାଁର ଜଳକନ୍ୟା ସୋନୀ ଯାଦବ । ୫ ପୂର୍ବେ ଝାରସୁଗୁଡ଼ା ଜିଲ୍ଲା ରେଙ୍ଗାଲି ଥାନା କୁସମେଲ ଗାଁ ନିକଟରେ ଶାଖା କେଲୋ ନଦୀ ସଙ୍ଗମସ୍ଥଳରୁ ଉଦ୍ଧାର କରିଥିଲେ ଧରମ ବାପା ସନ୍ୟାସୀ କାଲୋ । ନୂଆ ଜୀବନ ପାଇବା ପରେ ଆଜି ପଡ଼ୋଶୀ ରାଜ୍ୟ ରାୟଗଡ ଜିଲ୍ଲା ଧରମଜୟଗଡ଼ ପୁରୁଷୋତ୍ତମ ସିଂହ ଯାଦବଙ୍କ ହାତ ଧରିଛନ୍ତି ସୋନୀ । ଆଉ ବାହାଘରରେ କନ୍ୟାଦାନ କରିଛନ୍ତି ବ୍ରଜରାଜନଗର ବିଧାୟକ କିଶୋର ମହାନ୍ତି ଓ ତାଙ୍କ ପତ୍ନୀ ଅଳକା ।
ଚନ୍ଦ୍ରହାସିନୀ ଦେବୀ ପୀଠକୁ ଦର୍ଶନ ପାଇଁ ଆସି ନିକଟସ୍ଥ ମହାନଦୀରେ ଖସିପଡ଼ିଥିଲେ ସୋନୀ । କୁସମେଲ ଗାଁର ମତ୍ସ୍ୟଜୀବୀ ସନ୍ନ୍ୟାସୀ କାଲୋ ଗଭୀର ମହାନଦୀରୁ ତାଙ୍କୁ ଜୀବିତ ଅବସ୍ଥାରେ ଉଦ୍ଧାର କରି ଦେଇଥିଲେ ନୂଆ ଜୀବନ । ସାଢ଼େ ପାଞ୍ଚ ବର୍ଷ କାଳ ଦମ୍ପତି ତାଙ୍କୁ ପାଳିବା ସହ ଆତ୍ମନିର୍ଭରଶୀଳ କରାଇଛନ୍ତି । ଆଜି ଏମିତି ଏକ ଝିଅର କନ୍ୟାଦାନ କରିବାର ସୁଯୋଗ ପାଇଥିବାରୁ ଉଭୟ ବିଧାୟକ ଓ ତାଙ୍କ ପତ୍ନୀ ନିଜକୁ ସୌଭାଗ୍ୟଶାଳୀ ମନେକରିଛନ୍ତି । କୋଭିଡ୍ କଟକଣା ଭିତରେ ଭୋଜିଭାତ ସହ ବେଶ୍ ଧୂମ୍ଧାମ୍ରେ ବିବାହ ସମ୍ପନ୍ନ ହୋଇଛି।
