କୋଟିଆରେ ଖୁବ୍ ଶୀଘ୍ର ସ୍ଥାପନ ହେବ ଥାନା

1 min read

କୋଟିଆ ସମେତ ସୀମା ବିବାଦରେ ଥିବା ଗାଁ ଗୁଡିକ ପାଇଁ ବିଧାନସଭା ଗୃହ କମିଟି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି । ଦୀର୍ଘଦିନ ପରେ କୋଟିଆବାସୀଙ୍କ ଏକ ବଡ଼ ସମସ୍ୟା ସମାଧାନ କରିବାକୁ ଯାଉଛନ୍ତି ରାଜ୍ୟ ସରକାର । କୋଟିଆ ଓଡ଼ିଶାର ହୋଇଥିବା ବେଳେ କୋଟିଆବାସୀଙ୍କୁ ଥାନା ଫାଣ୍ଡି ମାମଲାରେ ଆନ୍ଧ୍ର ପ୍ରଦେଶ ପୋଲିସ ଥାନାକୁ ଯିବାକୁ ପଡୁଥିଲା । ତେଣୁ କୋଟିଆରେ ପୋଲିସ ଥାନା ସ୍ଥାପନ କରିବାକୁ ସୀମା ବିବାଦ ଗୃହ କମିଟି ଅଧ୍ୟକ୍ଷ ତଥା ବାଚସ୍ପତି ସୂର୍ଯ୍ୟ ପାତ୍ର ଗୃହ ବିଭାଗକୁ ନିର୍ଦ୍ଦେଶ ଦେଇଛନ୍ତି।

ସତ କଥା ହେଉଛି, କୋଟିଆବାସୀଙ୍କୁ ଓଡ଼ିଶାର ଥାନା ବହୁ ଦୂର ପଡ଼ୁଥିବାରୁ କୋଟିଆ ଲୋକେ ଆନ୍ଧ୍ର ଥାନା ଯାଉଥିଲେ । କୋଟିଆରେ ଥାନା ସ୍ଥାପନ ହେଲେ କୋଟିଆବାସୀଙ୍କ ସବୁ ମାମଲାର ତଦନ୍ତ କରିବ ଓଡ଼ିଶା ପୋଲିସ। ତା’ ଛଡ଼ା କୋଟିଆରେ ଓଡ଼ିଶା ସଂସ୍କୃତି ଓ ପରମ୍ପରାକୁ ରକ୍ଷା କରିବା ପାଇଁ କାର୍ଯ୍ୟକ୍ରମ ମଧ୍ୟ କରିବେ ରାଜ୍ୟ ସରକାର।

ଓଡ଼ିଶାର ପ୍ରାୟ ୧୦୦ଟି ଗାଁକୁ ନେଇ ଆନ୍ଧ୍ର ପ୍ରଦେଶ, ଛତିଶଗଡ, ଝାଡଖଣ୍ଡ ଓ ପଶ୍ଚିମବଙ୍ଗ ପରି ୪ଟି ରାଜ୍ୟ ସହ ସୀମା ବିବାଦ ଲାଗି ରହିଛି। ଆନ୍ଧ୍ର ସହ ବିବାଦୀୟ ରହିଛି କୋରାପୁଟ କୋଟିଆର ୨୧ଟି, ଗଜପତିର ୧୬ଟି, ଗଞ୍ଜାମର ୧୩ଟି, ରାୟଗଡାର ୫ଟି ଓ ନବରଙ୍ଗପୁରର ୪ଟି ସୀମାନ୍ତ ଗାଁ । ସେହିପରି ଝାଡ଼ଖଣ୍ଡ ସହ ସୁନ୍ଦରଗଡର ୬ଟି, କେନ୍ଦୁଝରର ୫ଟି ଓ ମୟୁଭଞ୍ଜର ୬ଟି ଗାଁ ମଧ୍ୟରେ ସୀମା ବିବାଦ ରହିଛି। ପଶ୍ଚିମବଙ୍ଗ ସହ ବାଲେଶ୍ୱରର ୬ଟି ଓ ମୟୁରଭଞ୍ଜର ୨ଟି ଗାଁ ବିବାଦ ରହିଛି । ଛତିଶଗଡ ସହ ଝାରସୁଗୁଡାର ଗୋଟାଏ ଗାଁରେ ସୀମା ବିବାଦ ଲାଗି ରହିଛି।

ସୀମା ବିବାଦରେ ଥିବା ଅନ୍ୟ ଗାଁ ଗୁଡିକ ପାଇଁ ମଧ୍ୟ ବିଧାନସଭା ଗୃହ କମିଟି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି । ସେ ଗୁଡିକ ହେଉଛି:

– କମ୍‌ ଛାତ୍ରଛାତ୍ରୀ ଥିଲେ ବି ସୀମାନ୍ତର ୫ କିଲୋମିଟିର ଭିତରେ ଥିବା ସ୍କୁଲ, କଲେଜ ବନ୍ଦ ହେବନି । ଏପରିକି ଦୂର ହେଲେ ବି ସରକାରୀ ଅଫିସ ବନ୍ଦ ନ ହୋଇ କାମ ଜାରି ରଖିବ । ଏମାନଙ୍କ ଉନ୍ନତିକରଣ କରିବା ପାଇଁ ପଦକ୍ଷେପ ନିଆଯିବ ।

– ସୀମାନ୍ତ ଥାନା ଗୁଡିକୁ ଅଧିକ କ୍ଷମତା ଦିଆଯିବ ।

– ସରକାରୀ ଅଧିକାରୀ ନିୟମିତ ଭାବେ ସୀମାନ୍ତ ଗାଁ ପରିଦର୍ଶନ କରିବେ ।

– ମୋରମ, ବାଲି ଉଠାଣ ନେଇ ୨୪ ଘଣ୍ଟା ଭିତରେ ରାଜସ୍ୱ ବିଭାଗ ବୈଠକ କରି ସମାଧାନର ବାଟ ଖୋଜିବ ।

– ଗଞ୍ଜାମ ଓ ଗଜପତିର ଯେଉଁ ଗାଁକୁ ଆନ୍ଧ୍ର ପ୍ରଦେଶ ଦେଇ ଯିବାକୁ ପଡୁଛି, ସ୍ଥାନୀୟ କ୍ଷେତ୍ରରେ ସେ ବିବାଦର ସମାଧାନ କରାଯିବ ।

ଖୁବ୍ ଶୀଘ୍ର ଗୃହ କିମିଟିର ନିର୍ଦ୍ଦେଶ କାର୍ଯକାରୀ କରିବା ପାଇଁ ଜିଲ୍ଲାପାଳମାନଙ୍କ ସହ ଭିଡିଓ କନଫରେନସିଂ ଜରିଆରେ ଆଲୋଚନା କରାଯିବ ବୋଲି ବାଚସ୍ପତି ସୂଚନା ଦେଇଛନ୍ତି ।

ଆବଶ୍ୟକ ପଡିଲେ, ସୀମାନ୍ତ ଗାଁ ପରିଦର୍ଶନ କରିବ ସୀମା ବିବାଦ ଗୃହ କମିଟି। ହେଲେ ଅନ୍ତଃରାଜ୍ୟ ଆଲୋଚନା ନେଇ କୈାଣସି ନିଷ୍ପତ୍ତି ହୋଇନଥିବା ସୀମା ବିବାଦ ଗୃହ କମିଟି ଅଧ୍ୟକ୍ଷ ତଥା ବାଚସ୍ପତି କହିଛନ୍ତି । ')}

[DISPLAY_ULTIMATE_SOCIAL_ICONS]
Opn Commnet Area

Leave a Reply

Your email address will not be published.