କାଲି କୋଣାର୍କ ମହୋତ୍ସବ; ଶାସ୍ତ୍ରୀୟ ସଙ୍ଗୀତ ଓ ବାଲୁକାକଳାରେ ଚମକିବ ଚନ୍ଦ୍ରଭାଗା….

କୋଣାର୍କ: କୋଣାର୍କ ମୁକ୍ତାକାଶ ରଙ୍ଗମଞ୍ଚ ଆଉ ବେଶୀ ସମୟ ନୁହେଁ । ଆସନ୍ତାକାଲି କୋଣାର୍କ ନୃତ୍ୟ ଉତ୍ସବ ଓ ଚନ୍ଦ୍ରଭାଗାର ବାଲୁକା କଳା ମହୋତ୍ସବ ଆରମ୍ଭ ହେଉଛି । ଏଥିପାଇଁ ପ୍ରସ୍ତୁତି ଶେଷ ପ୍ରର୍ଯ୍ୟାୟରେ ପହଞ୍ଚିଛି । ପ୍ରତିଦିନ ସନ୍ଧ୍ୟାରେ ଓଡିଶୀ ନୃତ୍ୟ ସହ କୁଚୁପୁଡ଼ି, ଭରତନାଟ୍ୟମ୍ ଓ ଶାସ୍ତ୍ରୀୟ ନୃତ୍ୟ ପରିବେଷଣର କାର୍ଯ୍ୟକ୍ରମ ରହିଛି । ସେହିପରି ଚନ୍ଦ୍ରଭାଗା ବେଳାଭୂମିରେ ନବମ ଥର ପାଇଁ ଆୟୋଜିତ ହେବ ବାଲୁକା କଳା ମହୋତ୍ସବ ।

ଏହି କାର୍ଯ୍ୟକ୍ରମ ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ଆୟୋଜିତ ହୋଇଛି । ତେବେ ପ୍ରଥମ ଥର ପାଇଁ କୌଣସି ଅନ୍ତର୍ଜାତୀୟ ବାଲୁକାଶିଳ୍ପୀଙ୍କୁ କାର୍ଯ୍ୟକ୍ରମରେ ଅଂଶଗ୍ରହଣ ନକରିବାର ଦେଖିବାକୁ ମିଳିବ । ପ୍ରାୟ ୭୦ ଭାରତୀୟ ବାଲୁକା ଶିଳ୍ପୀ ନିଜ ନିଜ କଳା ପ୍ରଦର୍ଶନ କରିବେ । ସେହିଭଳି ସବୁ କାର୍ଯ୍ୟକ୍ରମ ଓ ଉତ୍ସବ କୋଭିଡ୍ କଟକଣା ମଧ୍ୟରେ ପାଳିତ ହେଉଥିବା ହେତୁ କୋଣାର୍କ ମହତ୍ସୋବ ମଧ୍ୟ ଏଥିରୁ ବାଦ ପଡ଼ିବ ନାହିଁ । ଗ୍ୟାଲେରୀରେ ସାମାଜିକ ଦୂରତ୍ୱ ରହିବ ।

ବାଲୁକା କଳା ଦେଖିବାକୁ ଆସୁଥିବା ଦର୍ଶକମାନେ ନାମ ପଞ୍ଜିକରଣ କରାଇବେ । ମାସ୍କ ଓ ସାନିଟାଇଜର ବ୍ୟବହାର ଭଳି ପ୍ରାବଧାନକୁ ମାନିବେ । ଏଥିପାଇଁ ପ୍ରସ୍ତୁତିଜନିତ କାର୍ଯ୍ୟକଳାପର ପରିଚାଳନା କରିବା ପାଇଁ ସ୍ଥିତି ସମୀକ୍ଷା ହୋଇଛି ।ଆଜି ପର୍ଯ୍ୟଟନ ସଚିବ ଵିଶାଲ ଦେବ, ପର୍ଯ୍ୟଟନ ନିର୍ଦ୍ଦେଶକ ସଚିନ ରାମପାଲ ଯାଦବ, ପୁରୀ ଜିଲ୍ଲା ପାଳ ବଲବନ୍ତ ସିଂ ଓ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ କୋଣାର୍କ ମୁକ୍ତାକାଶ ରଙ୍ଗମଞ୍ଚ ଓ ଚନ୍ଦ୍ରଭାଗା ବାଲୁକା କଳା ସ୍ଥାନ ବୁଲିବା ସହିତ ଉତ୍ସଵର ସ୍ଥିତି ସମୀକ୍ଷା କରିଛନ୍ତି ।