କୋଲକାତା ଡାକ୍ତର ଦୁଷ୍କର୍ମ-ହତ୍ୟା ମାମଲା: ଜୁନିଅର ଡାକ୍ତରଙ୍କ ଆନ୍ଦୋଳନ ଜାରି

ନନ୍ଦିଘୋଷ ବ୍ୟୁରୋ: କୋଲକାତା ଟ୍ରେନି ଡାକ୍ତର ଦୁଷ୍କର୍ମ-ହତ୍ୟା ମାମଲା। ଏବେବି ଜୁନିଅର ଡାକ୍ତରଙ୍କ ଆନ୍ଦୋଳନ ଜାରି ରହିଛି। ତୁରନ୍ତ କାର୍ଯ୍ଯକ୍ଷେତ୍ରରେ ଯୋତଗଦେବାକୁ ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ଅମାନ୍ଯ କରିଥିବାବେଳେ ଆଲୋଚନା ପାଇଁ ମୁଖ୍ଯମନ୍ତ୍ରୀ ମମତା ବାନାର୍ଜୀଙ୍କ ପ୍ରସ୍ତାବକୁ ମଧ୍ଯ ଏଡାଇ ଦେଇଛନ୍ତି ଡାକ୍ତର । ପଶ୍ଚିମବଙ୍ଗ ମୁଖ୍ଯ ଶାସନ ସଚିବ ଆଲୋଚନା ପାଇଁ ୧୦ରୁ ୧୫ ଜଣିଆ ପ୍ରତିନିଧି ଦଳକୁ ଡାକିଥିବାବେଳେ ଏଥିପାଇଁ ସର୍ତ୍ତ ରଖିଛନ୍ତି ଡାକ୍ତର । ଆଲୋଚନା ସମୟରେ ମୁଖ୍ଯମନ୍ତ୍ରୀ ମମତା ବାନାର୍ଜୀ ଉପସ୍ଥିତ ରହିବା ସହ ଏହାର ସିଧାପ୍ରସାରଣ କରାଯାଉ ବୋଲି ଦାବି ରଖିଛନ୍ତି ।

ଡାକ୍ତରମାନେ ଆହୁରି ମଧ୍ୟ କହିଛନ୍ତି, ସେମାନେ ବୈଠକକୁ ୩୦ ଜଣିଆ ପ୍ରତିନିଧି ଦଳ ପଠାଇବାକୁ ଚାହାନ୍ତି। ଅନ୍ୟ କାହା ସହ ନୁହେଁ ବରଂ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ଆଲୋଚନା କରିବେ। ସେହିପରି ବୈଠକରେ ସେମାନଙ୍କ ୫ ସୂତ୍ର ଦାବି ଉପରେ ଗୁରୁତ୍ବ ଦିଆଯିବ। ମୁଖ୍ଯ ଦାବି ଗୁଡ଼ିକ ମଧ୍ଯରେ ରହିଛି ସନ୍ଦୀପ ଘୋଷଙ୍କ ବିରୋଧରେ ତୁରନ୍ତ ଯାଞ୍ଚ ଶେଷ କରି କାର୍ଯ୍ଯାନୁଷ୍ଠାନ ନେବା ସହ କୋଲକାତା ପୋଲିସ କମିଶନର ବିନିତ ଗୋଏଲଙ୍କୁ ବରଖାସ୍ତ କରିବା, ନର୍ଥ ଏବଂ ସେଣ୍ଟ୍ରାଲ ଡିସିପିଙ୍କ ବିରୋଧରେ କାର୍ଯ୍ଯାନୁଷ୍ଠାନ, ରାଜ୍ଯର ସବୁ ସରକାରୀ ହସ୍ପିଟାଲରେ ଡାକ୍ତର ଏଭଂ ସେବିକାଙ୍କ ପାଇଁ ଦୃଢ ନିରାପତ୍ତା ବ୍ଯବସ୍ଥା କରିବାକୁ ଦାବି ହୋଇଛି ।