ପିଜି ଛାତ୍ରୀଙ୍କୁ ଦୁଷ୍କର୍ମ ପରେ ହତ୍ଯା ଘଟଣା, ସାରା ଦେଶରେ କାର୍ଯ୍ଯବନ୍ଦ ଆନ୍ଦୋଳନ କରିବେ ଆବାସିକ ଡାକ୍ତର ସଂଘ

କୋଲକାତା : କୋଲକାତାର ଆରଜି କର ମେଡିକାଲ କଲେଜରେ ପିଜି ଛାତ୍ରୀଙ୍କୁ ହତ୍ଯା ଘଟଣା। ପ୍ରତିବାଦରେ ଆଜି ସାରା ଦେଶରେ କାର୍ଯ୍ଯବନ୍ଦ ଆନ୍ଦୋଳନ କରିବେ ଆବାସିକ ଡାକ୍ତର ସଂଘ ବା ଫୋର୍ଡା। ଗତ ଅଗଷ୍ଟ ୯ ତାରିଖରେ କଲେଜରେ ୩୧ ବର୍ଷ ବୟସ୍କା ଜଣେ ପୋଷ୍ଟଗ୍ରାଜୁଏଟ ଡାକ୍ତରଙ୍କ ମୃତଦେହ ମିଳିଥିଲା। ସେହିପରି କେରଳର ସମସ୍ତ ସରକାରୀ ମେଡିକାଲ କଲେଜରେ ପ୍ରତିବାଦ ଆନ୍ଦୋଳନ କରାଯିବ ବୋଲି କୁହାଯାଇଛି। ସରକାରୀ ମେଡିକାଲ କଲେଜ ଶିକ୍ଷକ ସଂଘ ପକ୍ଷରୁ ଏହି ଆନ୍ଦୋଳନ କରିବାକୁ ଘୋଷଣା କରାଯାଇଛି। ରାତ୍ରୀକାଳୀନ ଡ୍ଯୁଟିରେ ମହିଳା ଡାକ୍ତରଙ୍କ ସୁରକ୍ଷା ଲାଗି ସେମାନେ ଦାବି କରିଛିନ୍ତି। ଏହା ସହ ମେଡିକାଲ କଲେଜ ପରିସରରେ ଅଧିକ ସିସିଟିଭି ଲଗାଇବା ଲାଗି ଦାବି କରିଛନ୍ତି ଆବାସିକ ଡାକ୍ତର ସଂଘ। ସେପଟେ ମେଡିକାଲ କଲେଜର ଅଧ୍ଯକ୍ଷ ଡାକ୍ତର ସଞ୍ଜୟ ବଶିଷ୍ଠଙ୍କୁ ପଦଚ୍ଯୁତ କରିଛନ୍ତି ପଶ୍ଚିମବଙ୍ଗ ସ୍ବାସ୍ଥ୍ଯ ବିଭାଗ। ତାଙ୍କ ସ୍ଥାନରେ ବୁଲବୁଲ ମୁଖୋପାଧ୍ଯାୟଙ୍କୁ ନିଯୁକ୍ତି ଦିଆଯାଇଛି। ସାରା ଦେଶରେ ଏହି ହତ୍ଯାକୁ ନେଇ ପ୍ରତିକ୍ରିୟା ପ୍ରକାଶ ପରେ ପଦକ୍ଷେପ ନେଇଛନ୍ତି କର୍ତ୍ତୃପକ୍ଷ। ତେଣେ ଏହି ଘଟଣାର ତ୍ବରିତ ତଦନ୍ତ ଲାଗି ଚେତାବନୀ ଦେଇଛି ଇଣ୍ଡିଆନ ମେଡିକାଲ ଆସୋସିଏସନ। ଅଭିଯୁକ୍ତ ସଞ୍ଜୟ ରୟ ବିରୋଧରେ ଭାରତୀୟ ନ୍ୟାୟ ସଂହିତାର ଧାରା ୬୪ ଓ ଧାରା ୧୦୩ ଅନୁସାରେ ମାମଲା ରୁଜୁ କରାଯାଇଛି। ତେଣେ ଅଭିଯୁକ୍ତ ସଞ୍ଜୟ ପୂର୍ବରୁ ୪ ଥର ବିବାହ କରିଥିବାବେଳେ ତନ୍ମଧ୍ଯରୁ ୩ ଜଣ ସଞ୍ଜୟକୁ ଛାଡି ଚାଲିଯାଇଥିବା ସୂଚନା ମିଳିଛି।