ଜାଣନ୍ତୁ ଆରୋଗ୍ୟ ସେତୁ ଆପ୍ କ’ଣ, କାହିଁକି ଓ କିପରି କରିବେ ଏହାକୁ ଡାଉନଲୋଡ

ନୂଆଦିଲ୍ଲୀ: ଆଜି କରୋନାଭାଇରସ୍ ସହ ଲଢ଼ିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସମଗ୍ର ଦେଶରେ ଲକଡାଉନକୁ ମେ ୩ ଯାଏଁ ବଢ଼ାଇଛନ୍ତି । ଆଜି ସକାଳ ୧୦ ଟାରେ ଦେଶକୁ ସମ୍ବୋଧିତ କରୁଥିବାବେଳେ ପ୍ରଧାନମନ୍ତ୍ରୀ ଏହି ଘୋଷଣା କରିଛନ୍ତି। ଏହା ସହିତ କରୋନାଭାଇରସ୍ ରୋଗ (COVID-19) ର ପ୍ରସାରକୁ ରୋକିବାରେ ଆରୋଗ୍ୟ ସେତୁ ମୋବାଇଲ୍ ଆପ୍ ଡାଉନଲୋଡ୍ କରିବାକୁ ପ୍ରଧାନମନ୍ତ୍ରୀ ମୋଦୀ ଜନସାଧାରଣଙ୍କୁ ନିବେଦନ କରିଛନ୍ତି । ଅନ୍ୟମାନଙ୍କୁ ଏହି ଆପ୍ ଡାଉନଲୋଡ୍ କରିବାକୁ ଉତ୍ସାହିତ କରିବାକୁ ମଧ୍ୟ ପ୍ରଧାନମନ୍ତ୍ରୀ କହିଛନ୍ତି । ତେବେ ଆସନ୍ତୁ ଜାଣିବା ଆରୋଗ୍ୟ ସେତୁ ମୋବାଇଲ୍ ଆପ୍ କଣ ଏବଂ ଏହାକୁ କାହିଁକି ଏବଂ କିପରି ଡାଉନଲୋଡ୍ କରିବା ।

ଆରୋଗ୍ୟ ସେତୁ ମୋବାଇଲ୍ ଆପ୍ କ’ଣ ?

ଆରୋଗ୍ୟ ସେତୁ ହେଉଛି ଭାରତ ସରକାରଙ୍କ ଦ୍ୱାରା ପ୍ରସ୍ତୁତ ଏକ ମୋବାଇଲ୍ ଆପ୍ | COVID-19 ମାମଲାର ଅନୁସନ୍ଧାନ, କରୋନା ଜୀବାଣୁ ସଂକ୍ରମଣର ବିପଦ ଏବଂ ବିପଦକୁ ଆକଳନ କରିବା, ଏହା ଉପରେ ସଚେତନତା ସୃଷ୍ଟି କରିବା ଏବଂ ଲୋକଙ୍କୁ ସଂକ୍ରମଣ ସମ୍ବନ୍ଧୀୟ ସୂଚନା ଦେବା ପାଇଁ ଏହି ଆପ୍ ସରକାରଙ୍କ ଦ୍ୱାରା ଡିଜାଇନ୍ କରାଯାଇଛି। ସୂଚନା ଅନୁଯାୟୀ, ଏହି ଆପ୍ ଲଞ୍ଚ ହେବାର ଅଳ୍ପ ସମୟ ମଧ୍ୟରେ ଏକ କୋଟିରୁ ଅଧିକ ଲୋକ ଏହାକୁ ଡାଉନଲୋଡ୍ କରିଛନ୍ତି ।

କିପରି ଡାଉନଲୋଡ କରିବେ ଆରୋଗ୍ୟ ସେତୁ ମୋବାଇଲ୍ ଆପ୍ –  

ଭାରତ ସରକାରଙ୍କ ଆରୋଗ୍ୟ ସେତୁ ମୋବାଇଲ୍ ଆପ୍ ଉଭୟ ଆଣ୍ଡ୍ରଏଡ୍ ଏବଂ ଆଇଫୋନରେ ଉପଲବ୍ଧ । ଏହି ଆପ୍ ଆପଣଙ୍କ ଅବସ୍ଥାନ ଏବଂ ଆପଣଙ୍କ ଚାରିପାଖରେ ଥିବା କରୋନା ପଜିଟିଭ୍ ଲୋକ ଏବଂ ଆପଣଙ୍କ ଦ୍ୱାରା ପଚରାଯାଇଥିବା କିଛି ପ୍ରଶ୍ନ ସହ ସଂକ୍ରମଣର ବିପଦ ବିଷୟରେ ଜାଣିବାରେ ସାହାଯ୍ୟ କରିବ ।

ଆପ୍ ଡାଉନଲୋଡ୍ କରିବା ସମୟରେ ଆପଣଙ୍କୁ ନିଜର ମୋବାଇଲ୍ ନମ୍ବର, ବ୍ଲୁଟୁଥ୍ ଏବଂ ଲୋକେସନ ସୂଚନା ଦେବାକୁ ପଡିବ । ଆରୋଗ୍ୟ ସେତୁ ଆପ୍ ଇଂରାଜୀ ବ୍ୟତୀତ ଅନେକ ଭାରତୀୟ ଭାଷାରେ ସୂଚନା ପ୍ରଦାନ କରିବ ।