କେରଳ ନିର୍ବାଚନ: ୮୩ ପ୍ରାର୍ଥୀଙ୍କ ନାଁ ଘୋଷଣା କଲା ସିପିଆଇଏମ୍, ଥୋମାସ କହିଲେ ଲଢ଼ିବେନି
1 min read
କେରଳ: ପାଖେଇ ଆସୁଛି ନିର୍ବାଚନ । କ୍ଷମତାରେ ଥିବା ସିପିଆଇଏମ୍ ବୁଧବାର ୮୩ ଜଣଙ୍କ ପ୍ରାର୍ଥୀ ତାଲିକା ଘୋଷଣା କରିଛି । ମୁଖ୍ୟମନ୍ତ୍ରୀ ପିନାରାଇ ବିଜୟନ ସହ ଅନେକ ମନ୍ତ୍ରୀଙ୍କୁ ମିଳିଛି ପୁଣିଥରେ ଟିକେଟ୍ । ପାଞ୍ଚ ଜଣ ମନ୍ତ୍ରୀଙ୍କୁ ଟିକେଟ୍ ମିଳିଥିବା ବେଳେ ଅର୍ଥମନ୍ତ୍ରୀ ଥିବା ଥୋମାସ ଏଥର ନିର୍ବାଚନ ଲଢିବେ ନାହିଁ ବୋଲି ମନା କରିଦେଇଛନ୍ତି । ୧୨ ଜଣ ମହିଳା ପ୍ରାର୍ଥୀଙ୍କୁ ଟିକେଟ୍ ଦେଇଛି ସିପିଆଇଏମ । କେରଳରେ ସିପିଆଇଏମର ଦବଦବା କାଏମ୍ ରହିଛି । ଏଥର ମଧ୍ୟ ଦଳ ପିନାରାଇ ବିଜୟନଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ପ୍ରଜୋକ୍ଟ କରିଛି । ଚଳିତ ନିର୍ବାଚନରେ LDF ଓ UDF ମଧ୍ୟରେ ହେଉଛି କଡ଼ା ଟକ୍କର । ତେବେ କିଏ ବାଜି ମାରୁଛି ତାହା ନିର୍ବାଚନ ଫଳାଫଳ କହିବ । ନିର୍ବାଚନ ଯେତିକି ପାଖୋଉଛି ପ୍ରଚାର ପ୍ରସାର ସେତିକି ଜମୁଛି । ଗୋଟିଏ ପଟେ ବିରୋଧୀ ଦଳ ସରକାରଙ୍କ ଅପାରଗତା ବଖାଣୁଥିବା ବେଳେ ଅନ୍ୟପଟେ ସରକାରରେ ଥିବା ଦଳ ନିଜର ସଫଳତା ବଖାଣି ଭୋଟ ମାଗୁଛି ।
ସେପଟେ କଂଗ୍ରେସର ସଙ୍କଟ ବଢ଼ିବାରେ ଲାଗିଛି । କେରଳ କଂଗ୍ରେସର ଭେଟେରାନ୍ ଲିଡର ପିସି ଚାକୋ ବୁଧବାର ଦଳରୁ ଇସ୍ତଫା ଦେଇଥିବା ନେଇ ନିଜେ ଘୋଷଣା କରିଛନ୍ତି । ସେ ନିଜ ଇସ୍ତଫା ପତ୍ର ଦଳର ଅନ୍ତରୀଣ ସଭାପତି ସୋନିଆ ଗାନ୍ଧୀଙ୍କ ନିକଟକୁ ପଠାଇଛନ୍ତି । ଆଗକୁ ନିର୍ବାଚନ ଯେତିକି ପାଖେଇ ଆସୁଛି କଂଗ୍ରେସ କନ୍ଦଳ ସେତିକି ପଦାକୁ ଆସୁଛି । ଗୋଟିଏ ପଟେ ଜି-୨୩ ନେତା ଏକ ସିଣ୍ଡିକେଟ୍ ପ୍ରସ୍ତୁତ କରୁଥିବା ବେଳେ ଅନ୍ୟପଟେ ଭେଟେରାନ୍ ନେତାମାନେ ଦଳ ଛାଡ଼ୁଛନ୍ତି । ଯାହାକି ଆଗାମୀ ନିର୍ବାଚନରେ କଂଗ୍ରେସ ପାଇଁ ବଡ଼ ଘାଟା ବୋଲି କୁହାଯାଇପାରେ । ସେହିଭଳି କେରଳ ବିଧାନସଭା ନିର୍ବାଚନର ଅବ୍ୟବହିତ ପୂର୍ବରୁ ବରିଷ୍ଠ ନେତା ପିସି ଚାକୋଙ୍କ ଇସ୍ତଫା ଦଳ ପାଇଁ ଏକ ଶକ୍ତ ଧକ୍କା କୁହାଯାଉଛି । ଏହା ଦ୍ୱାରା କଂଗ୍ରେସକୁ ଏକ ବଡ଼ ପ୍ରାପ୍ୟ ଦେବାକୁ ପଡ଼ିପାରେ ଆଶଙ୍କା ରହିଛି ।
ତେବେ ଚାକୋ ନିଜ ଇସ୍ତଫା ପତ୍ରରେ ଲେଖିଛନ୍ତି ଯେ, ‘ମୁଁ ଦଳ ପାଇଁ କଠିନ ପରିଶ୍ରମ କରିଛି । କିନ୍ତୁ, ଏବେ କେରଳ କଂଗ୍ରେସ ତାଙ୍କୁ ଗୁରୁତ୍ୱ ଦେଉନାହିଁ । ଏଠାରେ ଗୋଷ୍ଠିବାଦ ରାଜନୀତି ଚାଲିଛି । ହାଇକମାଣ୍ଡଙ୍କ ବାରଣ ସତ୍ତ୍ୱେ ଏହା ଚାଲିଛି । ସୋନିଆ ଗାନ୍ଧି ଓ ରାହୁଲ ଗାନ୍ଧି ଏନେଇ ଅବଗତ ଥିଲେ ମଧ୍ୟ କୌଣସି ପଦକ୍ଷେପ ଗ୍ରହଣ କରିନାହାନ୍ତି । କେରଳ କଂଗ୍ରେସ ରାଜନୀତିରେ ଏବେ ଓମେନ ଚାଣ୍ଡି ଏବଂ ରମେଶ ଚେନ୍ନାଇଥାଲାଙ୍କ କଥାକୁ ଅଧିକ ଗୁରୁତ୍ୱ ଦିଆଯାଉଛି । ସେମାନେ ଏକ ଗୋଷ୍ଠି କରି ରାଜନୀତି କରୁଛନ୍ତି । ତେବେ ସବୁ ଜାଣି ମଧ୍ୟ ହାଇକମାଣ୍ଡ ଚୁପ୍ ରହିଥିବାରୁ ଦଳ ଏଭଳି ଦୁର୍ଦଶା ଭୋଗୁଛି ।
