କରୋନା ନ କମୁଣୁ କେରଳରେ ଆତଙ୍କ ଖେଳାଇଲାଣି ଜିକା ଭାଇରସ୍
ନୂଆଦିଲ୍ଲୀ: କେରଳରେ କାୟା ମେଲାଉଛି ଜିକା। ଦିନକୁ ଦିନ ସ୍ଥିତି ହେଉଛି ଚିନ୍ତାଜନକ। କୋଭିଡ ସଂକଟ ଦୂର ନ ହେଉଣୁ ଜିକା ଭାଇରସ ଆତଙ୍କ ଯୋଗୁ ଚିନ୍ତାରେ କେରଳ ସରକାର। ରାଜ୍ୟରେ ୧୪ଟି ଜିକା ଭାଇରସ ସଂକ୍ରମଣ ଚିହ୍ନଟ ହେବା ପରେ ଏହାକୁ ଗୁରୁତର ସହ ନେଇଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ। କେନ୍ଦ୍ର ଯୁଗ୍ମ ସ୍ୱାସ୍ଥ୍ୟ ସଚିବ ଲବ୍ ଅଗ୍ରଓ୍ୱାଲ କହିଛନ୍ତି, କେରଳରେ ଜିକା ସ୍ଥିତିକୁ ନେଇ କେନ୍ଦ୍ର ସ୍ୱତନ୍ତ୍ର ଧ୍ୟାନ ଦେଇଛନ୍ତି। ଏବଂ ଅନୁଧ୍ୟାନ ପାଇଁ ରାଜ୍ୟକୁ ଏକ ୬ ଜଣିଆ କେନ୍ଦ୍ରୀୟ ପ୍ରତିନିଧି ପଠାଯାଉଛି। ଏହି ଟିମରେ ଅଛନ୍ତି ସାଧାରଣ ସ୍ୱାସ୍ଥ୍ୟ ବିଶେଷଜ୍ଞ, ଭେକ୍ଟର ବାହିତ ରୋଗ ବିଶେଷଜ୍ଞ ଓ ଏମସର କିଛି ଗବେଷକ। ଏହି ଟିମ ରାଜ୍ୟ ସରକାରଙ୍କୁ ଭାଇରସ ମୁକାବିଲା ଦିଗରେ ସହଯୋଗ କରିବ। ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ବୀଣା ଜର୍ଜ କହିଛନ୍ତି, ଅଧିକରୁ ଅଧିକ ନମୁନା ପରୀକ୍ଷା କରିବା ଲାଗି ସ୍ୱାସ୍ଥ୍ୟ ବିଭାଗକୁ ନିର୍ଦ୍ଦେଶ ଦିଆଯାଇଛି। ଏଡେସ ମଶାର ନିୟନ୍ତ୍ରଣ ଲାଗି ସରକାର ପଦକ୍ଷେପ ନେଉଛନ୍ତି ବୋଲି ସେ କହିଛନ୍ତି।
