ଆଇନ ଜାଲରେ ‘କାନ୍ତାରା’; କୋର୍ଟ କହିଲେ- ଥିଏଟରରେ ଚଲାଅନି ଫିଲ୍ମର ଗୀତ

ନୂଆଦିଲ୍ଲୀ: ରୂପେଲି ପରଦାରେ ଧମାଲ୍ କରୁଥିବା ଫିଲ୍ମ ’କାନ୍ତାରା’ ଆଇନଜାଲରେ ଫସିଛି । କେରଳର ଏକ ଲୋକପ୍ରିୟ ମ୍ୟୁଜିକ ବ୍ୟାଣ୍ଡ୍ ଥାଇକୁଦମ ବ୍ରିଜ୍ ଗୀତ ଚୋରି ନେଇ ଅଭିଯୋଗ କରିଛି ।

ରିଷଭ ସେଟ୍ଟୀଙ୍କ ଏହି ଫିଲ୍ମ କନ୍ନଡ ଭାଷାରେ ସୁପରହିଟ୍ ହେବାପରେ ତେଲୁଗୁ, ତାମିଲ, ମାଲୟାଲାମ୍ ଓ ହିନ୍ଦୀ ଭାଷାରେ ରିଲି ହୋଇଥିଲା । ଅକ୍ଷୟ କୁମାରଙ୍କ ‘ରାମ ସେତୁ’ ଓ ଅଜୟ ଦେବଗନଙ୍କ ‘ଥ୍ୟାଙ୍କ ଗଡ଼’କୁ ଏବେବି ଟକ୍କର ଦେଉଛି ‘କାନ୍ତାରା’ ।

ଜାଣନ୍ତୁ କ‘ଣ ବିବାଦ-

କେରଳର ଏକ ଲୋକପ୍ରିୟ ମ୍ୟୁଜିକ ବ୍ୟାଣ୍ଡ୍ ‘ଥାଇକୁଦମ ବ୍ରିଜ୍’ କିଛି ଦିନ ତଳେ ଗୀତ ଚୋରି ନେଇ ଅଭିଯୋଗ କରିଛି। ‘କାନ୍ତାରା’ର ମେକର୍ସ ଧୁନ୍ ଚୋରି କରିଥିବା ନେଇ ସୋସିଆଲ୍ ମିଡିଆରେ ଏକ ପୋଷ୍ଟ କରିଛି ଏହି ବ୍ୟାଣ୍ଡ୍। ବ୍ୟାଣ୍ଡର କହିବାନୁଯାୟୀ, ବ୍ୟାଣ୍ଡର ନିଜସ୍ୱ ଗୀତ ’ନବରସମ୍’ ସହ ଏକଦମ୍ ମିଶୁଛି ‘କାନ୍ତାରା’ର ‘ବରାହ ରୁପମ୍’ ।

ପୋଷ୍ଟରେ ଆହୁରି ଲେଖାଯାଇଛି, ‘କାନ୍ତାରା’ ସହ ‘ଥାଇକୁଦମ ବ୍ରିଜ୍’ କୌଣସି ପ୍ରକାର ଜଡିତ ନୁହେଁ ବୋଲି ଆମେ ଦର୍ଶକଙ୍କୁ କହିବାକୁ ଚାହୁଁଛୁ । ଆଉ ଗୀତ ଚୋରି କରିବା ନେଇ ଆମେ ଫିଲ୍ମର କ୍ରିଏଟିଭ୍ ଟିମ୍ ବିରୋଧରେ ଆଇନର ଦ୍ୱାରସ୍ତ ହେଉଛୁ । କାରଣ ଏହି କଣ୍ଟେଣ୍ଟ ଉପରେ ଆମର ରାଇଟସ୍ ନେଇ କୌଣସି ସୂଚନା ଦିଆଯାଇନଥିବା ବେଳେ କ୍ରିଏଟିଭ୍ ଟିମ୍ ଏହାକୁ ନିଜର ଧୁନ୍ ଭାବେ ପ୍ରଚାର କରୁଛି ।