ମିଛ ଭିଡିଓକୁ ନେଇ ମର୍ମାହତ ଚନ୍ଦ୍ରାଣୀ ମୁର୍ମୁ, କହିଲେ, ଓଟିଭି ସବୁ ଜାଣି ଲୁଚାଉଛି ସତ
ଭୁବନେଶ୍ୱର: ଦେଶର ସର୍ବକନିଷ୍ଠ ସାଂସଦ ଚନ୍ଦ୍ରାଣୀ ମୁର୍ମୁ ନ୍ୟାୟ ପାଇଁ ବାଚସ୍ପତିଙ୍କୁ ଗୁହାରି କରିଛନ୍ତି । ସ୍ୱାଧିକାର ନୋଟିସ୍ ଆଣି ଓଟିଭିର ଚେହେରା ପଦାରେ ପକାଇଦେବାକୁ ସେ ବାଚସ୍ପତି ଓମ୍ ବିର୍ଲାଙ୍କୁ ଚିଠି ଲେଖିଛନ୍ତି । କହିଛନ୍ତି, ଓଟିଭି ସାମ୍ବାଦିକ ଓ ଅନ୍ୟମାନେ ମିଶି ମିଛ ଅଶ୍ଲୀଳ ଭିଡିଓ ଭାଇରାଲ କରିଥିଲେ । ଏହା ତାଙ୍କୁ ବଦନାମ ଓ ମାନସିକ ନିର୍ଯାତନା ଦେଇଛି । ତାଙ୍କ ଚରିତ୍ର ପ୍ରତି ପ୍ରଶ୍ନବାଚୀ ଛାଡ଼ି ଯାଇଛି । ଘଟଣାରେ ପୋଲସ ଓଟିଭିର କନିଷ୍ଠସ୍ତରର ସାମ୍ବାଦିକଙ୍କୁ କେବଳ ଜେରା କରିଛି । ବରିଷ୍ଠ ସାମ୍ବାଦିକ ରମେଶ ରଥଙ୍କ ନାଁ ଆସିବା ପରେ ପୋଲିସ ଜେରା କରିଛି । ହେଲେ ଓଟିଭି ସତ ଲୁଚାଇବାକୁ ଚେଷ୍ଟା କରୁଥିବା ଚନ୍ଦ୍ରାଣୀ ସ୍ୱାଧିକାର ଭଙ୍ଗ ନୋଟିସରେ ଆରୋପ ଆଣିଛନ୍ତି ।
ଏଠି ପ୍ରଶ୍ନ ଉଠୁଛି କାହିଁକି ଓଟିଭି ସତ ଲୁଚାଉଛି ? ଏ ନେଇ ସେ ଓଟିଭିର ମାଲିକ ଦମ୍ପତି ଜଗି ମଙ୍ଗତ ପଣ୍ଡା ଓ ସ୍ୱାମୀ ବୈଜୟନ୍ତ ପଣ୍ଡାଙ୍କୁ ଦାୟୀ କରିଛନ୍ତି । ପଚାରିଛନ୍ତି ପ୍ରଶ୍ନ । ଯଦି ଜଗି ପଣ୍ଡା ଓ ବୈଜୟନ୍ତ ପଣ୍ଡାଙ୍କ ପରିବାରର ଜଣେ ମହିଳାଙ୍କର ଏଭଳି ମିଛ ଓ ଅଶ୍ଲୀଳ ଭି଼ଡିଓ ଭାଇରାଲ୍ ହୋଇଥାନ୍ତା, ତେବେ କ’ଣ ସେମାନେ ସାମ୍ବାଦିକ ରମେଶ ରଥଙ୍କୁ ସୁରକ୍ଷା ଦେଇଥାନ୍ତେ ? ଜଗି ପଣ୍ଡା ଜଣେ ମହିଳା । ତାଙ୍କ ବିବେକ କୁଆଡ଼େ ଗଲା ? ତାଙ୍କୁ ନ୍ୟାୟ ନମିଳିଲେ ଭାରତୀୟ ଗଣତନ୍ତ୍ର ପ୍ରତି ଅନ୍ୟାୟ ହେବ ବୋଲି କହିଛନ୍ତି ଚନ୍ଦ୍ରାଣୀ ।
ଚନ୍ଦ୍ରାଣୀଙ୍କ ସମର୍ଥନରେ ବାହାରିଛନ୍ତି ରାଜ୍ୟର ବିଭିନ୍ନ ଆଦିବାସୀ ସଂଗଠନ । ଏପରି ଚରିତ୍ର ସଂହାରକୁ ସମସ୍ତେ ନାପସନ୍ଦ କରିବା ସହିତ ଏହାର ଦୃଢ଼ ବିରୋଧ କରିଛନ୍ତି । କହିଛନ୍ତି, ବୈଜୟନ୍ତ ଓ ଜଗିଙ୍କ ପରି ରାଜ୍ୟର ଏକ ନମ୍ବର ବୈଦ୍ୟୁତିକ ଗଣମାଧ୍ୟମ ମାଲିକ କିପରି ଏହାକୁ ପ୍ରଶୟ ଦେଲେ । ଦୀର୍ଘ ସମୟ ବିତି ଥିଲେ ସୁଦ୍ଧା ଓଟିଭି ସତ ପ୍ରକାଶ ନକରି ନିଜ ସାମ୍ବାଦିକଙ୍କୁ ଘଣ୍ଟ ଘୋଡାଇବା ଆଦୌ ଯୁକ୍ତିଯୁକ୍ତ ନୁହେଁ ।
ଗତ ଗୁରୁବାର ଜନପ୍ରତିନିଧିଙ୍କ ଭିଡିଓ ଭାଇରାଲ ମାମଲାରେ ଓଟିଭିର ବରିଷ୍ଠ ସାମ୍ବାଦିକ ରମେଶ ରଥଙ୍କୁ ଅଟକ ରଖି ତିନି ଘଣ୍ଟା ଜେରା କରିଥିଲା ପୋଲିସ । ଆସନ୍ତା ୨୧ ତାରିଖରେ ପୁଣି ହାଜର ହେବାକୁ କେନ୍ଦୁଝର ପୋଲିସର ନିର୍ଦ୍ଦେଶ ଦେଇଛି ।
