ଦୁଃଖ ଦେଇଗଲା ତାରିଣୀ ଦର୍ଶନ, ଶୋକାକୁଳ ପରିବେଶରେ ୮ଜଣଙ୍କ ଶେଷକୃତ୍ୟ ସମ୍ପନ୍ନ

ଗଞ୍ଜାମ: ଶୋକାକୁଳ ପରିବେଶରେ ଶେଷ ହେଲା ଦୁର୍ଘଟଣାରେ ପ୍ରାଣ ହରାଇଥିବା ୮ ଜଣଙ୍କ ଶବଦାହ। ୭ ଜଣଙ୍କ ଶବ ସଂସ୍କାର କରାଯାଇଥିବା ବେଳେ, ଶିଶୁକୁ ପୋତି ଦିଆଯାଇଛି। ବିଳମ୍ବିତ ରାତିରେ ଗଞ୍ଜାମ ସାନଖେମୁଣ୍ଡି ବ୍ଲକ ପୋଡାମାରିରେ ୮ ଜଣଙ୍କ ଶବ ସଂସ୍କାର କରାଯାଇଛି।

ଗତକାଲି ଘଟଗାଁ ନିକଟରେ ଦୁର୍ଘଟଣାରେ ୮ ଜଣଙ୍କ ମୃତ୍ୟୁ ହୋଇଥିଲା। ପୋଡ଼ାମାରିରେ ଗଜେନ୍ଦ୍ର ପ୍ରଧାନଙ୍କ ସ୍ତ୍ରୀ ମିତା ପ୍ରଧାନ, ପୁଅ ଆକାଶ ପ୍ରଧାନ, ବୋହୂ ଲିଲି ପ୍ରଧାନଙ୍କ ମୃତଦେହକୁ ପ୍ରଥମେ ହସ୍ତାନ୍ତର କରାଯାଇଥିଲା। ମୃତଦେହ ପହଞ୍ଚିବା ପରେ କାନ୍ଦ ବୋବାଳିରେ ଫାଟି ପଡ଼ିଥିଲା ସାରା ଗାଁ। ତିନୋଟି କୋକେଇରେ ମୃତଦେହକୁ ଗାଁ ମଶାଣିକୁ ନିଆଯାଇଥିଲା।

ସେହିପରି ବତାଗଡ଼ ଗାଁରେ ବାୟାଘନ ଗୌଡ, ପୁଅ ମଦନ ଗୌଡ ନାତି ରୁଦ୍ର ଗୌଡଙ୍କର ଶବ ସତ୍କାର କରାଯାଇଥିଲା। ପରେ ବାୟା ଘନଙ୍କ ଜ୍ବାଇଁ ବାବୁଲା ଗୌଡଙ୍କ ମୃତଦେହକୁ ଦେଖାଳି ନିଆଯାଇଥିବା ବେଳେ, ଅନ୍ୟ ଜଣେ ଝିଅ ପାପିନି ଗୌଡ ମୃତଦେହକୁ ପାଳଝାଡି ନିଆଯାଇ ଶବ ସଂସ୍କାର କରାଯାଇଥିଲା । ସମସ୍ତ ୮ ମୃତକ ଗୁରୁବାର ରାତିରେ ଘଟଗାଁ ତାରିଣୀ ମନ୍ଦିର ଦର୍ଶନ ପାଇଁ ଯାଇଥିଲେ। ହେଲେ ଘଟଗାଁ ବଳିଝୋଡ଼ିରେ ଦୁର୍ଘଟଣା ଘଟିବାରୁ ୮ ଜଣଙ୍କ ଜୀବନ ଚାଲି ଯାଇଥିଲା । କେନ୍ଦୁଝରରେ ଶବ ବ୍ୟବଚ୍ଛେଦ ପରେ ଜିଲ୍ଲା ପ୍ରଶାସନ ଆମ୍ବୁଲାନ୍ସ ଯୋଗେ ସମସ୍ତ ମୃତଦେହକୁ ଆଣି ପରିବାର ଲୋକଙ୍କୁ ହସ୍ତାନ୍ତର କରିଥିଲେ।