ବଡ଼ପୁଅର ଆକ୍ରମଣରେ ଚାଲିଗଲା ବାପାର ଜୀବନ

କେନ୍ଦୁଝର: ପାରିବାରିକ କଳହର କରୁଣ ପରିଣତି । ପୁଅର ଆକ୍ରମଣରେ ବାପା ମୃତ । କେନ୍ଦୁଝର ରାମଚନ୍ଦ୍ରପୁର ଥାନା ମଦନପୁର ଗାଁରେ ଏଭଳି ଅଭାବନୀୟ ଘଟଣା ଘଟିଛି । ଗତକାଲି ରାତିରେ ଗାଁର ପ୍ରମୋଦ ଓଝାଙ୍କୁ ତାଙ୍କ ବଡ଼ପୁଅ ରଂଜନ ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ । ଫଳରେ ପ୍ରମୋଦଙ୍କ ମୃତ୍ୟୁ ହୋଇଛି ।

ସୂଚନା ଅନୁସାରେ, ରଞ୍ଜନ ଅରୁଣାଚଳ ପ୍ରଦେଶରେ ଆଇଟିବିପି ଯବାନ ଭାବେ କାର୍ଯ୍ୟ କରୁଥିବା ବେଳେ ଗତ ୧୦ ଦିନ ପୂର୍ବରୁ ଛୁଟିରେ ଗାଁକୁ ଆସିଥିଲେ । ପୂର୍ବରୁ ଭଉଣୀ ବାହାଘର ଖର୍ଚ୍ଚ ପାଇଁ ହୋଇଥିବା କରଜ ଟଙ୍କା ନେଇ ପରିବାରରେ କଳହ ଲାଗି ରହୁଥିଲା । ଗତକାଲି କଳହ ଉଗ୍ରରୂପ ଧାରଣ କରିଥିଲା। ପ୍ରଥମେ ରଞ୍ଜନ ଏବଂ ତାଙ୍କ ଭାଇଙ୍କ ମଧ୍ୟରେ ଝଗଡା ଲାଗିଥିଲେ । ବାପା ପ୍ରମୋଦ ସେମାନଙ୍କୁ ଛଡାଇବାକୁ ଯାଇଥିବା ବେଳେ ରଞ୍ଜନ ଉତ୍ୟକ୍ତ ହୋଇ ଗୋଟିଏ ଭୁଜାଲିରେ ବାପାଙ୍କୁ ଆକ୍ରମଣ କରିଥିଲେ। ଫଳରେ ଘଟଣାସ୍ଥଳରେ ବାପା ପ୍ରମୋଦଙ୍କର ମୃତ୍ୟୁ ହୋଇ ଯାଇଥିଲା । ରଞ୍ଜନ ଏବଂ ତାଙ୍କ ଭାଇ ଗୁରୁତର ହୋଇ କଟକ ମେଡିକାଲକୁ ସ୍ଥାନାନ୍ତର ହୋଇଛନ୍ତି । ପୋଲିସ ଘଟଣାସ୍ଥଳରୁ ମୃତଦେହ ଜବତ କରିବା ସହ ରଞ୍ଜନଙ୍କ ଭାଇଙ୍କୁ ଅଟକ ରଖି ପଚରାଉଚରା ଚଳାଇଛି ।