ଗୁଣିଗାରେଡି ସନ୍ଦେହରେ ବୃଦ୍ଧଙ୍କୁ ନିସ୍ତୁକ ମାଡ଼

କେନ୍ଦ୍ରାପଡା : ଗୁଣିଗାରେଡି ସନ୍ଦେହରେ ବୃଦ୍ଧଙ୍କୁ ନିସ୍ତୁକ ମାଡ଼ । କେନ୍ଦ୍ରାପଡ଼ା ମାର୍ଶାଘାଇ ଥାନା ଅଧିନ ବରେଇ ରାଜସ୍ୱ ଗାଁରେ ଘଟିଛି ଅଭାବନୀୟ ଘଟଣା। ଗୁରୁତର ଅବସ୍ଥାରେ ବୃଦ୍ଧ ଜଣଙ୍କୁ କେନ୍ଦ୍ରାପଡ଼ା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଗଣେଷ ପୂଜାଦିନ ଇଚ୍ଛାପୁର ବଳଦେବଜୀଉଙ୍କ ମନ୍ଦିରରୁ କାମ ସାରି ଉମେଶ ଜାତି ରାତି ୧୦ଟାରେ ଘରକୁ ଫେରିଥିଲେ । ଘରେ ଖାଇ ପିଇ ବୃଦ୍ଧା ମା ଓ ପୁଅ ଉମେଶ ଶୋଇଥିବା ବେଳେ ପଡୋଶୀ ମିଟୁ ଓ ତାର ଦୁଇ ଭାଇ ଓ ବାପା ଚାରିଜଣ ଘର କବାଟ ଭାଙ୍ଗି ଘରେ ପଶିଥିଲେ । ୬୫ ବର୍ଷର ବୃଦ୍ଧ ଉମେଶଙ୍କୁ ରାତି ଅଧରେ ଘରୁ ଟେକି ନେଇ ନିସ୍ତୁକ ମାଡ଼ ମାରିଥିବା ଅଭିଯୋଗ ହୋଇଛି। ମରିଯାଇଥିବା ଭାବି ଘର ଆଗରେ ଫୋପାଡ଼ି ଦେଇଥିଲେ। ପରିବାରର ଅଭିଯୋଗ ଅନୁଯାୟୀ, ସେହି ଗାଁର ଜଣେ ଯୁବକଙ୍କ ପତ୍ନୀଙ୍କୁ ଗୁଣି ହୋଇଥିବାର ସନ୍ଦେହ କରିଥିଲେ ଆକ୍ରମଣକାରୀ। ଗୁଣିଆ ସନ୍ଦେହରେ ଘରୁ ଉଠାଇ ନେଇ, ରଡ୍ ଓ ବାଡି ସାହାଯ୍ୟରେ ବୃଦ୍ଧଙ୍କୁ ରାତି ତମାମ ଉଲଗ୍ନ କରି ପିଟିଥିଲେ। ଏ ନେଇ ମାର୍ଶାଘାଇ ଥାନାରେ ବୃଦ୍ଧଙ୍କ ଝିଅ ଏତଲା ଦେବା ପରେ ପୋଲିସ ତଦନ୍ତ ଜାରି ରଖିଛି।