ରଶ୍ମିକାଙ୍କ ପରେ DeepFake ଭିଡିଓର ଶିକାର ହେଲେ କ୍ୟାଟ୍ରିନା
1 min read
ମୁମ୍ବାଇ: ଅଭିନେତ୍ରୀ ରଶ୍ମିକା ମନ୍ଦାନାଙ୍କ ପରେ ଡିପଫେକ୍ ଭିଡିଓର ଶିକାର ହେଲେ କ୍ୟାଟ୍ରିନା । କ୍ୟାଟ୍ରିନାଙ୍କ ଅପକମିଂ ଫିଲ୍ମ ଟାଇଗର-ଥ୍ରୀର ଏକ ସିନକୁ ଡିପଫେକ୍ କରାଯାଇଥିବା ଅଭିଯୋଗ । ଫିଲ୍ମରେ କ୍ୟାଟ୍ରିନା ଏକ ଟାଓ୍ବାଲ ପିନ୍ଧିଥିବାର ସିନ୍ ରହିଛି । ମାତ୍ର ଡିପଫେକ ଭିଡିଓରେ ତାଙ୍କୁ ଲୋ-କଟ୍ ହ୍ବାଇଟ ଟପରେ ଦେଖିବାକୁ ମିଳୁଛି । ନିଜର ଅରଜିନାଲ ଫଟୋକୁ କ୍ୟାଟ୍ରିନା ୬ ନଭେମ୍ବରରେ ସୋସିଆଲ୍ ମିଡିଆରେ ପୋଷ୍ଟ କରିଥିଲେ । କ୍ୟାପସନରେ ଲେଖିଥିଲେ ଏହି ଫିଲ୍ମ ପାଇଁ ତାଙ୍କୁ କଠିନ ପରିଶ୍ରମ କରିବାକୁ ପଡ଼ୁଛି । ଫଟୋ ସହିତ ସେ ଓ୍ବାର୍କ ଆଉଟ କରୁଥିବା କିଛି ଭିଡିଓ କ୍ଲିପ୍ସ ମଧ୍ୟ ପୋଷ୍ଟ କରିଥିଲେ । ଉଭୟ ରଶ୍ମିକା ଓ କ୍ୟାଟ୍ରିନାଙ୍କ ଡିପଫେକ ଭିଡିଓ ଭାଇରାଲ ହେବା ପରେ AIକୁ ନେଇ ବଢିଛି ଚିନ୍ତା ।
ଡିପଫେକ ଟେକ୍ନୋଲୋଜି ବିରୋଧରେ କାର୍ଯ୍ୟାନୁଷ୍ଠାନ ପାଇଁ ବଲିଉଡରୁ ଉଠିଛି ସ୍ବର । ସେପଟେ ରଶ୍ମିକାଙ୍କ ସମର୍ଥନରେ ନାଗା ଚୈତନ୍ୟଙ୍କ ସମେତ ବହୁ ଦକ୍ଷିଣ ଭାରତୀୟ କଳାକାର ମଧ୍ୟ ସ୍ବର ଉଠାଇଛନ୍ତି । ବିଟିଶ-ଇଣ୍ଡିଆ ଯୁବତୀ ଜାରା ପଟେଲଙ୍କ ଭିଡିଓରେ ରଶ୍ମିକାଙ୍କ ଚେହେରା ମର୍ଜ କରି ପ୍ରସ୍ତୁତ ଡିପଫେକ ଭାଇରାଲ ହୋଇଥିଲା । ଯାହାକୁ ନେଇ ସୁପରଷ୍ଟାର ଅମିତାଭ ବଚ୍ଚନ ମଧ୍ୟ ପ୍ରତିବାଦ କରିଥିଲେ । ଏମିତିକି ଦେଶର ସୂଚନା ପ୍ରସାରଣ ମନ୍ତ୍ରୀ ମଧ୍ୟ ଚିନ୍ତା ବ୍ୟକ୍ତ କରିଥିଲେ । ଏହି ଭିଡିଓକୁ ନେଇ ଆସିଛି ଜାରା ପଟେଲଙ୍କ ପ୍ରତିକ୍ରିୟା । ଜାରା ସୋସିଆଲ ମିଡିଆରେ ଲେଖିଛନ୍ତି ଯେ ଏଭଳି ଡିପଫେକ ଭିଡିଓକୁ ନେଇ ସେ ମର୍ମାହତ ଓ ଦୁଃଖିତ । ମହିଳା ଓ ଯୁବତୀମାନଙ୍କ ଭବିଷ୍ୟତକୁ ନେଇ ଚିନ୍ତା ବଢୁଛି । ଏଣିକି ମହିଳାମାନେ ସେସିଆଲ ମିଡିଆରେ ନିଜର ଫଟୋ ପୋଷ୍ଟ କରିବାକୁ ଭୟ କରିବେ । ଇଣ୍ଟରନେଟରେ ସବୁକିଛି ସତ ନୁହେଁ । ଏଣୁ ଯାହା ଦେଖୁଛନ୍ତି ତାହା ସତ କି ମିଛ ତଦାରଖ କରିବା ଲାଗି ଥରେ ପଛକୁ ଫେରି ଫ୍ୟାକ୍ଟ ଚେକ କରନ୍ତୁ ।
