ପ୍ରଧାନମନ୍ତ୍ରୀଙ୍କ ସହ କାଶ୍ମୀର ନେତାଙ୍କ ଆଲୋଚନା ପୂର୍ବରୁ ହାଇସ୍ପିଡ୍ ଇଣ୍ଟରନେଟ୍ ସେବା ବନ୍ଦ, ୪୮ ଘଣ୍ଟା ପାଇଁ ହାଇ ଆଲର୍ଟ
1 min read
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହିତ କାଶ୍ମୀର ନେତାଙ୍କ ଆଲୋଚନା ପୂର୍ବରୁ ନିୟନ୍ତ୍ରଣରେଖାରେ ୪୮ ଘଣ୍ଟା ପାଇଁ ହାଇ ଆଲର୍ଟ ଜାରି ହୋଇଛି । ଏହା ସହିତ ରାଜ୍ୟରେ ହାଇ ସ୍ପିଡ୍ ଇଣ୍ଟରନେଟକୁ ବନ୍ଦ କରି ଦିଆଯାଇଛି । ଆସନ୍ତାକାଲି ଅର୍ଥାତ ୨୪ ତାରିଖ ଦିନ ପ୍ରଧାନମନ୍ତ୍ରୀ କାଶ୍ମୀର ପ୍ରସଙ୍ଗରେ ବିଭିନ୍ନ ଦଳର ନେତାଙ୍କ ସହିତ ଆଲୋଚନା କରିବେ । ଏହି ବୈଠକରେ ଜମ୍ମୁକାଶ୍ମୀରର ବିଭିନ୍ନ ଦଳର ନେତା ମଧ୍ୟ ଯୋଗ ଦେଉଛନ୍ତି । ଏହି ବୈଠକରେ ଯୋଗ ଦେବାକୁ ଜମ୍ମୁ-କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ତଥା ପିଡିପି ମୁଖ୍ୟ ମେହବୁବା ମୁଫତି ଦିଲ୍ଲୀ ଅଭିମୁଖେ ଯାତ୍ରା ଆରମ୍ଭ କରିଛନ୍ତି । ସୂଚନାଯୋଗ୍ୟ ଯେ,ବୈଠକ ପୂର୍ବରୁ ମେହବୁବା କାଶ୍ମୀର ପ୍ରସଙ୍ଗରେ ଆଲୋଚନା ବେଳେ ପାକିସ୍ତାନକୁ ସାମିଲ କରିବାକୁ କହିଥିଲେ । ଜମ୍ମୁକାଶ୍ମୀରର ବିଜେପି ନେତା ମଧ୍ୟ ବୈଠକରେ ଯୋଗ ଦେବାକୁ ଦିଲ୍ଲୀ ଆସୁଛନ୍ତି । ସୂଚନାଯୋଗ୍ୟ ଯେ, ଏହି ବୈଠକରେ ଜମ୍ମୁ-କାଶ୍ମୀରର ରାଜ୍ୟ ପାହ୍ୟକୁ ନେଇ ବିଶେଷ ଆଲୋଚନା ହେବାର ସମ୍ଭାବନା ରହିଛି । ଜମ୍ମୁ କାଶ୍ମୀରକୁ ପୁଣିଥରେ ରାଜ୍ୟ ମାନ୍ୟତା ଦେବାକୁ ଦାବି ହେଉଥିବା ବେଳେ ଏହି ବୈଠକ ଗୁରୁତ୍ୱପୂର୍ଣ୍ଣ ଅଟେ । ଏହି ବୈଠକ ଏଥିପାଇଁ ମଧ୍ୟ ମହତ୍ୱପୂର୍ଣ୍ଣ ଯେ, ମଙ୍ଗଳବାର ଦିନ ଗୁପକାର ଗ୍ରୁପର ସବୁଦଳର ନେତା କାଶ୍ମୀରରେ ଏକାଠି ହୋଇ ନିଜ ଆଗାମୀ ରଣନୀତି ଉପରେ ଆଲୋଚନା କରିଥିଲେ ।
