ସାରସକଣାରେ ବିଜେଡି ନେତା କାର୍ତ୍ତିକ ପାଣ୍ଡିଆନ, ଜନତାଙ୍କୁ ଦେଲେ ବିକାଶର ହିସାବ
1 min read![](https://nandighoshatv.com/wp-content/uploads/2024/05/ଆପଣଙ୍କ-ପିଲାଙ୍କ-କଥା-ବୁଝିବେ-ମୁଖ୍ୟମନ୍ତ୍ରୀ-1024x576.jpg)
ସାରସକଣା: କିଏ ଆଦିବାସୀଙ୍କ ପାଇଁ କାମ କରୁଛନ୍ତି, କିଏ ଆପଣଙ୍କ ସମାଜର ବିକାଶ ପାଇଁ କାମ କରିବେ, ଆଉ କିଏ ଆପଣଙ୍କୁ ଭୋଟ ବ୍ୟାଙ୍କ ବୋଲି ଭାବୁଛନ୍ତି ସେମାନଙ୍କୁ ଚିହ୍ନନ୍ତୁ । ବିରୋଧୀ ନିର୍ବାଚନ ଆସିଲେ ମିଛ କଥା କହି ଭୋଟ ମାଗିବେ। ନିର୍ବାଚନ ସରିଲେ ଖୋଜିଲେ ବି ମିଳିବେନି। ସେମାନଙ୍କୁ ଭୋଟରେ ଜବାବ ଦେବାକୁ ସାରସକଣାରେ ଅପିଲ କରିଛନ୍ତି 5T ଅଧ୍ୟକ୍ଷ ତଥା ବରିଷ୍ଠ ବିଜେଡି ନେତା କାର୍ତ୍ତିକ ପାଣ୍ଡିଆନ।
ବିରୋଧୀ ଦଳ ଜାତୀୟ ରାଜପଥର ବିକାଶ କରୁନାହାନ୍ତି କି ଆଦିବାସୀଙ୍କ ପିଲା ଛୁଆଙ୍କ ଉନ୍ନତି ପାଇଁ କାମ କରୁନାହାଁନ୍ତି। କେବଳ ମିଛ କହି ଭୋଟ ହାତେଇବାକୁ ଉଦ୍ୟମ କରୁଛନ୍ତି ବୋଲି କହିଛନ୍ତି। ହେଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସବୁବେଳେ ଆଦିବାସୀଙ୍କ ବିକାଶ ପାଇଁ କାମ କରୁଛନ୍ତି । ଆଦିବାସୀଙ୍କ କଳା, ସଂସ୍କୃତି ଓ ଭାଷା ଯାହା ସେମାନଙ୍କ ପରିଚୟ ତାର ସୁରକ୍ଷା ସହ ସେମାନଙ୍କ ଆର୍ଥିକ ଓ ସାମାଜିକ ବିକାଶକୁ ମଧ୍ୟ ସମାନ ଗୁରୁତ୍ବ ଦିଅନ୍ତି ମୁଖ୍ୟମନ୍ତ୍ରୀ। ଏଥିପାଇଁ ସେ ସ୍ବତନ୍ତ୍ର ଉନ୍ନୟନ ପରିଷଦ ଗଠନ କରିଛନ୍ତି। ଆଦିବାସୀଙ୍କ ବିରୋଧରେ ଥିବା ୫୦ ହଜାର ପୋଲିସ କେସ୍, ଜଙ୍ଗଲ ଓ ଅବକାରୀ ସମ୍ପର୍କିତ ମାମଲାକୁ ରଦ୍ଦ କରିଛନ୍ତି ମୁଖ୍ୟମନ୍ତ୍ରୀ।
ଆଦିବାସୀ ହଷ୍ଟେଲ ଜରିଆରେ ଲକ୍ଷ ଲକ୍ଷ ଛାତ୍ରଛାତ୍ରୀ ମାଗଣା ପାଠ ପଢୁଛନ୍ତି । ଅନ୍ବେଶା, ଆକାଂକ୍ଷା ଓ ଆଦର୍ଶ ବିଦ୍ୟାଳୟ ଜରିଆରେ ଆଦିବାସୀ ଛାତ୍ରଛାତ୍ରୀଙ୍କୁ ଇଂରାଜୀ ମିଡିୟମରେ ପଢିବାର ସୁଯୋଗ ସୃଷ୍ଟି କରିଛନ୍ତି ମୁଖ୍ୟମନ୍ତ୍ରୀ। ଏହି ଅବସରରେ ସାରସକଣାବାସୀଙ୍କ ଅନୁରୋଧରେ ମୁଖ୍ୟମନ୍ତ୍ରୀ ନେଇଥିବା ପଦକ୍ଷେପର ହିସାବ ଦେଇଛନ୍ତି କାର୍ତ୍ତିକ ପାଣ୍ଡିଆନ। ଚନ୍ଦନପୁର ଘାଟି ରାସ୍ତା ସହ ପିଇବା ପାଣି ସମସ୍ୟାର ସମାଧାନ ହୋଇଛି। ନୂଆ-ଓ ସ୍କଲାରସିପ ସହ ଆଦିବାସୀ ଛାତ୍ରଛାତ୍ରୀଙ୍କୁ ମିଳିଛି ସ୍ବତନ୍ତ୍ର ଛାତ୍ରବୃତ୍ତି। ଅନ୍ୟ କୌଣସି ରାଜ୍ୟ ଓ ଦଳ ଏଭଳି ଯୋଜନା କରିନାହାଁନ୍ତି ବୋଲି ସେ କହିଛନ୍ତି ।