ନନ୍ଦିଘୋଷ ବ୍ୟୁରୋ: ପୁଣି କର୍ଣ୍ଣାଟକ କଂଗ୍ରେସରେ କେଁ। ସମାଧାନ ହୋଇପାରିଲା ନାହିଁ ମୁଖ୍ୟମନ୍ତ୍ରୀ ସଙ୍କଟ। ଶନିବାର ଦିଲ୍ଲୀରେ ହାଇକମାଣ୍ଡଙ୍କ ହାଇଲେବଲ ବୈଠକ ପରେ ବି ଦୂର ହୋଇପାରିଲାନି ବିବାଦ। ଆଜି ବି ଦିଲ୍ଲୀରେ ଉଚ୍ଚସ୍ତରୀୟ ବୈଠକ ବସିବ ବୋଲି ସୂଚନା ମିଳିଛି। ଏହି ବୈଠକ ପରେ ବି ଅନ୍ୟ ଏକ ବୈଠକ ବସିବ। ଏଥିରେ ସୋନିଆ ଗାନ୍ଧୀ ସାମିଲ ହେବେ ବୋଲି କୁହାଯାଉଛି। ବୈଠକରେ ଯୋଗ ଦେବାକୁ ଉଭୟ ସିଦ୍ଦରମୈୟା ଓ ଶିବକୁମାରଙ୍କୁ ଦିଲ୍ଲୀ ଯିବା ଲାଗି ସମନ ହୋଇପାରେ ବୋଲି ସୂଚନା ମିଳିଛି। ଶନିବାର ଦିଲ୍ଲୀ ବୈଠକରେ ନେତୃତ୍ବ ପରିବର୍ତ୍ତନ, ପ୍ରଦେଶ କଂଗ୍ରେସ କମିଟିରେ ପରିବର୍ତ୍ତନ ଆଦି ପ୍ରସଙ୍ଗରେ ଆଲୋଚନା ହୋଇଥିଲେ ବି ସମାଧାନର ସୂତ୍ର ବାହାରି ପାରି ନଥିଲା। ଆସନ୍ତା ଦିନେ ଦୁଇ ଦିନ ଭିତରେ ହାଇକମାଣ୍ଡ ଏକ ବଡ଼ ନିଷ୍ପତ୍ତି ନେଇପାରନ୍ତି। ଦିଲ୍ଲୀ ବୈଠକରେ ଉଭୟ ଏଆଇସିସି ଅଧ୍ଯକ୍ଷ ମଲ୍ଲିକାର୍ଜୁନ ଖଡଗେ ଓ ବିରୋଧୀ ଦଳ ନେତା ରାହୁଲ ଗାନ୍ଧୀ ବିଭିନ୍ନ ଦିଗ ସମ୍ପର୍କରେ ଆଲୋଚନା କରିଥିଲେ ବି ଚୂଡ଼ାନ୍ତ ଘୋଷଣା ହୋଇପାରି ନଥିଲା। ଦିଲ୍ଲୀ ନେତୃତ୍ବ ଯାହା କିଛି ନିଷ୍ପତ୍ତି ନେବେ ୨୦୨୮ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ନେବେ ବୋଲି ସୂଚନା ମିଳିଛି।
