କର୍ଣ୍ଣାଟକରେ ‘ହିଜାବ’, ତେଲଙ୍ଗାନାରେ ‘ବୁର୍ଖା’ ବିବାଦ କାହିଁକି ?
ହାଇଦ୍ରାବାଦ: କର୍ଣ୍ଣାଟକରେ ହିଜାବକୁ ନେଇ ତେଜିଥିବା ବିବାଦ ଥମିନି । ଏବେ ଆଉ ଏକ ବିବାଦ ତେଲଙ୍ଗାନାରେ ମୁଣ୍ଡ ଟେକିଲାଣି । ତେଲଙ୍ଗାନାରେ ବୁର୍ଖାକୁ ନେଇ ଅସନ୍ତୋଷ ଦେଖାଦେଇଛି । ସିକନ୍ଦରାବାଦରେ ଦିବ୍ୟାଙ୍ଗଙ୍କ ଲାଗି କାମ କରୁଥିବା ଏକ ସଂସ୍ଥା ମହିଳାଙ୍କୁ ବୁର୍ଖା ପିନ୍ଧି ଆସିବାକୁ ମନା କରିଛି । ଏନେଇ ଫାତିମା ନାମକ ଜଣେ ମହିଳା ଟ୍ୱିଟ୍ କରି ଲେଖିଛନ୍ତି, ‘ଫେବ୍ରୁଆରୀ ୫ରେ ମୌଖିକ ଭାବେ କୁହାଯାଇଥିଲା ସଂସ୍ଥା ପରିସରରେ ବୁର୍ଖା କିମ୍ବା ହିଜାବ ପିନ୍ଧିବାକୁ ଅନୁମତି ନାହିଁ । ତେଣୁ ସମସ୍ତ ମହିଳା କେବଳ ଶାଢ଼ି ପିନ୍ଧି ଆସିବେ ।’
ଫାତିମା ଆହୁରି ଲେଖିଛନ୍ତି, ‘ସଂସ୍ଥାରେ ଭର୍ତ୍ତି ହେବା ଦିନ ଫର୍ମରେ ପୋଷାକ ସମ୍ବନ୍ଧିତ ସ୍ଥାନ ପୂରଣ କରିଥିଲୁ । ସେଥିରେ କେଉଁଠି ବି ଲେଖା ନଥିଲା କି ବୁର୍ଖା କାଢ଼ିବାକୁ ପଡ଼ିବ । କିନ୍ତୁ ଏବେ ଏହି ନୂଆ ଆଦେଶ ଆସିବା ପରେ କେହି ଆମକୁ ସାଥ୍ ଦେଉ ନାହାଁନ୍ତି । ଏନେଇ ଫାତିମା ମୁସଲିମ୍ ସଂଗଠନ ମଜଲିସ୍ ବଞ୍ଚାଅ ତହରିକକୁ ସାହାଯ୍ୟ ମାଗିଛନ୍ତି ।’
ସେ ଆହୁରି କହିଛନ୍ତି, ଫେବ୍ରୁଆରୀ ୮ ତାରିଖରେ ସଂସ୍ଥାରେ ଜଣେ କନିଷ୍ଠଙ୍କ ଠାରୁ ବୁର୍ଖା କାଢ଼ି ନିଆଯାଇଛି । ଏହାପରେ ଅନ୍ୟ ଶିକ୍ଷାର୍ଥୀ ସଂସ୍ଥାକୁ ଯିବା ବନ୍ଦ କରି ଦେଇଛନ୍ତି । ଏହି ଆଦେଶ ପରେ ଅନେକ ଯୁବତୀ ଆଉ ସଂସ୍ଥାକୁ ଯାଉ ନାହାଁନ୍ତି । ଡିସେମ୍ବର ଦ୍ୱିତୀୟ ସପ୍ତାହରେ କର୍ଣ୍ଣାଟକ ଉଡ୍ଡପିରୁ ଆରମ୍ଭ ହୋଇଥିବା ହିଜାବ ବିବାଦ ଅନ୍ୟ ରାଜ୍ୟକୁ ଡେଉଁଥିବା ବେଳେ ତେଲଙ୍ଗାନାରେ ବୁର୍ଖା ବିବାଦ ତେଜିଛି ।
