କରୋନା ସଂକ୍ରମିତଙ୍କୁ ସାହାଯ୍ୟର ହାତ ବଢ଼ାଇଲେ କନିକା କପୁର, ଦାନ କରିବେ ନିଜ ପ୍ଲାଜମା
ମୁମ୍ବାଇ: ବଲିଉଡ୍ ସିଙ୍ଗର କନିକା କପୁର କରୋନା ଭାଇରସ ଦ୍ୱାରା ସଂକ୍ରମିତ ହେବା ପରେ ପ୍ରତିଦିନ ତାଙ୍କ ସ୍ୱାସ୍ଥ୍ୟକୁ ନେଇ କିଛି ନା କିଛି ଖବର ସାମ୍ନାକୁ ଆସୁଥିଲା। ସବୁଠାରୁ ବଡ କଥା ହେଲା ସେ ବିଦେଶରୁ ଫେରି କ୍ୱାରେଣ୍ଟାଇନରେ ନ ରହି କିଛି ପାର୍ଟିରେ ଯୋଗ ଦେଇଥିବାରୁ ଅନେକେ ତାଙ୍କୁ ସମାଲୋଚନା କରିଥିଲେ। ଏହା ତାଙ୍କର ଖାମଖିଆଲ ନୀତି ବୋଲି କେହି କେହି କହିଥିଲେ। ଯେବେ କନିକା କରୋନାରେ ସଂକ୍ରମିତ ଥିବା ଜଣାପଡିଥିଲା ସେତେବେଳେ ସେ ପୁରା ଭାଙ୍ଗି ପଡିଥିଲେ। ଏବେ ସେ ସମ୍ପୂର୍ଣ୍ଣ ସୁସ୍ଥ ହେବା ସହ ଲକ୍ଷ୍ନୌ ସ୍ଥିତ ଘରେ ନିଜ ପରିବାର ସହ କ୍ୱାଲିଟି ଟାଇମ୍ ସ୍ପେଣ୍ଡ କରୁଛନ୍ତି ବୋଲି ସୋସିଆଲ ମିଡିଆ ମାଧ୍ୟମରେ ଜଣାଇଛନ୍ତି।
ତେବେ ସୋମବାର ଦିନ କରୋନା ସଂକ୍ରମିତ ରୋଗୀଙ୍କ ଚିକିତ୍ସା ପାଇଁ ତାଙ୍କ ପ୍ଲାଜମା ଦେବାକୁ ନିଷ୍ପତ୍ତି ନେଇଛନ୍ତି। ଏଥିପାଇଁ ସେ ସୋମବାର ସନ୍ଧ୍ୟାରେ କିଙ୍ଗ ଜର୍ଜ ମେଡିକାଲ ୟୁନିଭରସିଟିରେ ରକ୍ତ ପରୀକ୍ଷା କରିଥିଲେ। ଯଦି ତାଙ୍କର ଏହି ପରୀକ୍ଷା ସଫଳ ହୁଏ, ତେବେ ସୋମବାର କିମ୍ବା ମଙ୍ଗଳବାର ସକାଳେ ତାଙ୍କର ୫୦୦ ମିଲି ପ୍ଲାଜମା କେଜିଏମୟୁ କଢ଼ାଯିବ । କେଜିଏମୟୁ ବ୍ଲଡ ଟ୍ରାନ୍ସଫ୍ୟୁଜନ୍ ମେଡିସିନ୍ ବିଭାଗର ଚେୟାରମ୍ୟାନ୍ ଡକ୍ଟର ତୁଲିକା ଚନ୍ଦ୍ର କହିଛନ୍ତି ଯେ ଗାୟକ କନିକା କପୁର ତାଙ୍କ ପ୍ଲାଜମା ଦାନ କରିବାକୁ ଇଚ୍ଛା ପ୍ରକାଶ କରିଛନ୍ତି। ଏହା ପରେ ତାଙ୍କୁ ରକ୍ତ ନମୁନା ପରୀକ୍ଷା କରିବାକୁ ଡକାଯାଇଥିଲା।
