ଆସୁଛି କଣ୍ଟ୍ରୋଭର୍ସି କୁଇନ୍ କଙ୍ଗନା ରଣାୱାତଙ୍କ ନୂଆ ଫିଲ୍ମ ‘ଏମରଜେନ୍ସି’ । ଯାହାର ଟିଜର ରିଲିଜ୍ ହୋଇସାରିଛି। ଏଥିରେ କଙ୍ଗନା ଏକ ଦମଦାର ଚରିତ୍ରରେ ନଜର ଆସିଛନ୍ତି । କଙ୍ଗନା ଏହି ଫିଲ୍ମରେ ଆଇରନ ଲେଡି ତଥା ଭାରତର ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧିଙ୍କ ଭୂମିକାରେ ନଜର ଆସିଛନ୍ତି। କଙ୍ଗନା ଫିଲ୍ମର ଫାଷ୍ଟ ଲୁକ୍ ଓ ଟିଜର ନିଜ ଇନଷ୍ଟା ଆକାଉଣ୍ଟରେ ସେୟାର କରିଛନ୍ତି। ଟିଜରଟିକୁ ଦର୍ଶକ ବେଶ୍ ପସନ୍ଦ କରିଛନ୍ତି ।
View this post on Instagram
ଦେଶର ମହିଳାଙ୍କ ପାଇଁ ଉଦାହରଣ ପାଲଟିଥିବା ଇନ୍ଦିରା ଗାନ୍ଧୀଙ୍କ ଭୂମିକାରେ କଙ୍ଗନାଙ୍କୁ ଦେଖି ଦର୍ଶକ ବେଶ୍ ଉତ୍ସାହିତ ଅଛନ୍ତି । ଟିଜରରେ କଙ୍ଗନାଙ୍କ ଲୁକ୍ ଦେଖି ସମସ୍ତେ ଅବାକ୍ । କାରଣ ଏଥିରେ ଅବିକଳ ଇନ୍ଦିରାଙ୍କ ପରି ଦେଖାଯାଉଛନ୍ତି କଙ୍ଗନା। ତାଙ୍କର ଏହି ମେକଅପକୁ ବେଶ୍ ପ୍ରଶଂସା ମିଳୁଥିବା ବେଳେ ଏହାକୁ କରିଛନ୍ତି ଡାଭିଡ୍ ମାଲିନୋସ୍କି । ଯିଏ କି ନିଜ କାମ ପାଇଁ ଅନ୍ତର୍ଜାତୀୟ ପୁରସ୍କାର ମଧ୍ୟ ପାଇଛନ୍ତି । କେବଳ ଲୁକ୍ ନୁହେଁ ଟିଜରରେ କଙ୍ଗନା ପୂରା ଇନ୍ଦିରାଙ୍କ ଭଳି କଥା କହିୁଥିବା ମଧ୍ୟ ଦେଖିବାକୁ ମିଳିଛି।
ଏହି ଟିଜରର ଆରମ୍ଭରେ ତାଙ୍କ ପିଏ ତାଙ୍କୁ କହୁଛନ୍ତି ଯେ ‘ଆମେରିକାର ରାଷ୍ଟ୍ରପତି ତାଙ୍କୁ ମ୍ୟାଡାମ୍ ବୋଲି କହି ସମ୍ବୋଧନ କରିପାରିବେ କି ବୋଲି ପଚାରିଛନ୍ତି। ଯେଉଁଥିରେ ଅଭିନେତ୍ରୀ ଉତ୍ତର ଦିଅନ୍ତି- ‘ଠିକ ଅଛି, କିନ୍ତୁ ସେମାନଙ୍କୁ କୁହ ମୋ ଅଫିସରେ ସମସ୍ତେ ମୋତେ ମ୍ୟାଡମ୍ ନୁହଁ ସାର୍ ବୋଲି ସମ୍ୱୋଧନ କରନ୍ତି।’ କଙ୍ଗନାଙ୍କର ଏହି ଗୋଟିଏ ଡାଇଲଗ ଦର୍ଶକଙ୍କୁ କିମିଆ କରିଦେଇଛି । ଟିଜରଟି ରିଲିଜ ହେଉ ହେଉ ଏହାକୁ ଲକ୍ଷେରୁ ଅଧିକ ଲାଇକ ମିଳିସାରିଲାଣି। କଙ୍ଗନାଙ୍କ ଦମଦାର ଅଭିନୟ ଦର୍ଶକଙ୍କୁ ବେଶ୍ ପସନ୍ଦ ଆସିଛି । ‘ଏମରଜେନ୍ସି’ର କାହାଣୀ ରିତେଶ ଶାହା ଲେଖିଥିବା ବେଳେ ନିଜେ କଙ୍ଗନା ଏହାର ନିର୍ଦ୍ଦେଶନା ଓ ପ୍ରଯୋଜନାର ଭାର ସମ୍ଭାଳିଛନ୍ତି। ତେବେ ଫିଲ୍ମରେ କଙ୍ଗନାଙ୍କ ବ୍ୟତୀତ ଅନୁପମ ଖେର ମଧ୍ଯ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି। ଏହି ଫିଲ୍ମ କଙ୍ଗନାଙ୍କୁ ଜାତୀୟ ପୁରସ୍କାର ଭେଟିଦେବ ବୋଲି ଦର୍ଶକ କହିଛନ୍ତି ।
