ସୁଶାନ୍ତଙ୍କ ଜନ୍ମଦିନରେ କଙ୍ଗନାଙ୍କ ଟୁଇଟ୍, କେବେ ଭୁଲନି, କ୍ଷମା ଦିଅନି
ମୁମ୍ବାଇ: ଆଜି ବଲିଉଡର ଦିବଙ୍ଗତ ଅଭିନେତା ସୁଶାନ୍ତ ସିଂ ରାଜପୂତଙ୍କ ୩୫ ତମ ଜନ୍ମ ବାର୍ଷିକୀ । ଜନ୍ମ ବାର୍ଷିକୀ ଉପଲକ୍ଷେ ସୁଶାନ୍ତଙ୍କ ପରିବାର, ପ୍ରଶଂସକ ଏବଂ ବଲିଉଡ ସେଲିବ୍ରିଟୀ ତାଙ୍କୁ ଖୁବ୍ ମନେ ପକାଉଛନ୍ତି । ସୁଶାନ୍ତଙ୍କ ଜନ୍ମଦିନରେ ବଲିଉଡ କୁଇନ୍ କଙ୍ଗନା ରନୌତ ଏକାଧିକ ଟ୍ୱିଟ କରିଥିଲେ । ଟ୍ୱିଟ୍ ଦ୍ୱାରା ସେ ସୁଶାନ୍ତଙ୍କୁ ମନେ ପକାଇବା ସହ ମୁଭି ମାଫିଆକୁ ବି କରିଥିଲେ ଟାର୍ଗେଟ୍ । କଙ୍ଗନାଙ୍କ ନିଶାନାରେ ଥିଲେ ୟଶରାଜ୍ ଫିଲ୍ମସଠାରୁ କରଣ ଜୋହର ।
କଙ୍ଗନା ତାଙ୍କ ପ୍ରଥମ ଟୁଇଟରେ ସୁଶାନ୍ତଙ୍କ ଫଟୋ ଶେୟାର କରି ଲେଖିଛନ୍ତି , ପ୍ରିୟ ସୁଶାନ୍ତ, ମୁଭି ମାଫିଆ ତୁମକୁ ବ୍ୟାନ କଲେ, ତୁମକୁ ସମସ୍ୟାରେ ପକାଇଲେ ଏବଂ ମାନସିକ ନିର୍ଯାତନା ଦେଲେ । ତୁମେ ଅଧିକାଂଶ ସମୟ ସୋଶଲ ମିଡିଆରେ ସାହାଯ୍ୟ ପାଇଁ କହିଲ, ମୁଁ ଅନୂତାପ କରୁଛିଯେ ମୁଁ ତୁମ ପାଇଁ କିଛି କରିପାରିଲିନି । ମୋତେ ଲାଗିଥିଲା ଯେ ତୁମେ ନିଜ ଦମରେ ମୁଭି ମାଫିଆକୁ ସାମ୍ନା କରିବାକୁ ସକ୍ଷମ ।
ଅନ୍ୟ ଏକ ଟୁଇଟରେ ସେ ଲେଖିଛନ୍ତି, କେବେ ମଧ୍ୟ ଏହା ଭୁଲିବା ନାହିଁ ଯେ ମୃତ୍ୟୁ ପୂର୍ବରୁ ସୁଶାନ୍ତ, ମୁଭି ମାଫିଆ ତାଙ୍କୁ ଇଣ୍ଡଷ୍ଟ୍ରିରୁ ବାହାର କରିଦେବାକୁ ଚାହୁଁଥିବା କଥା ଲେଖିଥିଲେ । ଏହା ସହିତ ନିଜ ଫିଲ୍ମକୁ ସଫଳ କରାଇବା ପାଇଁ ସେ ତାଙ୍କ ଫ୍ୟାନ୍ସଙ୍କୁ ସାହାଯ୍ୟ ମାଗିଥିଲେ । ସାକ୍ଷାତକାରରେ ସେ ନେପୋଟିଜମକୁ ବିରୋଧ କରୁଥିଲେ । ତାଙ୍କ ବ୍ଲକବଷ୍ଟର ଫିଲ୍ମକୁ ଫ୍ଲପ ବୋଲି ଘୋଷଣା କରାଗଲା ।
ଟ୍ୱିଟ୍ ଥ୍ରେଡକୁ ଜାରି ରଖି କଙ୍ଗନା ଆଉ ଗୋଟିଏ ଟ୍ୱିଟ୍ କରିଥିଲେ । ଲେଖିଥିଲେ, କେବେ ମଧ୍ୟ ଭୁଲନ୍ତୁ ନାହିଁ ଯେ ୟଶରାଜ୍ ଫିଲ୍ମସ ତାଙ୍କୁ ବ୍ୟାନ କରିଥିବା କଥା ସୁଶାନ୍ତ ଲେଖିଥିଲେ । କରଣ ଜୋହର ତାଙ୍କୁ ବଡ଼ ସ୍ୱପ୍ନ ଦେଖାଇ ଠକିଛନ୍ତି । ଏହା ସହିତ ସୁଶାନ୍ତ ଜଣେ ଫ୍ଲପ ଆକ୍ଟର ବୋଲି କହି ବୁଲିଲେ । କେବେ ମଧ୍ୟ ଭୁଲନ୍ତୁନି ମହେଶ ଭଟ୍ଟଙ୍କ ସମସ୍ତ ପିଲା ଡିପ୍ରେସ୍ଡ । ସମସ୍ତେ ମିଶି ସୁଶାନ୍ତଙ୍କ ମାରି ଦେଇଛନ୍ତି । ସବୁକିଛି ସୁଶାନ୍ତ ମୃତ୍ୟୁ ପୂର୍ବରୁ ସୋଶଲ ମିଡିଆରେ ଲେଖିଥିଲେ । ଶେଷରେ କଙ୍ଗନା ସୁଶାନ୍ତ ଡେ’ ହ୍ୟାଶଟ୍ୟାଗ୍ ଦେଇଛନ୍ତି ।
କେବଳ କଙ୍ଗନା ନୁହଁନ୍ତି ବରଂ ସୁଶାନ୍ତଙ୍କ ଜନ୍ମଦିନ ପୂର୍ବରୁ ଏହି ଟ୍ରେଣ୍ଡ ଚାଲିଛି । ସୁଶାନ୍ତଙ୍କ ଭଉଣୀ ଶ୍ୱେତା ସିଂ କୀର୍ତ୍ତି ଲେଖିଛନ୍ତିଯେ, ଭାଇ ମୁଁ ତୁମକୁ ଭଲପାଏ, ତୁମେ ମୋର ଏକ ଅଂଶ ଏବଂ ସବୁବେଳେ ଏମିତି ରହିବ । ଏହା ସହିତ ସୁଶାନ୍ତ ଡେ’ର ହ୍ୟାଶଟ୍ୟାଗ୍ ଦେଇଛନ୍ତି ଶ୍ୱେତା ।
ସୋଶଲ ମିଡିଆରେ କଙ୍ଗନାଙ୍କ ଟୁଇଟ ଖୁବ୍ ଭାଇରାଲ ହେଉଛି ଏବଂ ରିଟୁଇଟ ମଧ୍ୟ ହେଉଛି । ଲୋକ ତାଙ୍କ ପ୍ରତିକ୍ରିୟାକୁ ଖୁବ ପସନ୍ଦ କରୁଛନ୍ତି ।
