ନୂଆଦିଲ୍ଲୀ: ଅଷ୍ଟ୍ରେଲିଆର ମହାନ୍ କ୍ରିକେଟର ଷ୍ଟିଭ ସ୍ମିଥ୍ ଓ ବିରାଟ କୋହଲିଙ୍କୁ ପଛରେ ପକାଇ ବିଶ୍ୱର ନମ୍ବାର ୱାନ୍ ବ୍ୟାଟ୍ସ ମ୍ୟାନ ହୋଇଯାଇଛନ୍ତି କେନ୍ ୱିଲିୟମସନ୍ । ଆଇସିସି ଟେଷ୍ଟ ରାଙ୍କିଙ୍ଗରେ ବ୍ୟାଟ୍ସମ୍ୟାନ୍ ତାଲିକାରେ ନ୍ୟୁଜିଲ୍ୟାଣ୍ଡର ଅଧିନାୟକ କେନ୍ ୱିଲିୟମସନ ପ୍ରଥଛମ ସ୍ଥାନ ଅଧିକାର କରିଛନ୍ତି। ପାକିସ୍ତାନ ବିପକ୍ଷ ପ୍ରଥମ ଟେଷ୍ଟରେ ୱିଲିୟମସନ ୧୨୯ ଓ ୨୧ ରନ ସ୍କୋର କରିଥିଲେ ଯାହା ତାଙ୍କୁ ଶୀର୍ଷକୁ ନେଇଥିଲା। ପାଞ୍ଚ ବର୍ଷ ପରେ କେନ୍ ୱିଲିୟମସନ୍ ଶୀର୍ଷ ସ୍ଥାନ ଅଧିକାର କରିଛନ୍ତି।
ଅନ୍ୟପଟେ ଭାରତ ବିପକ୍ଷ ଗତ ଚାରିଟି ଟେଷ୍ଟ ଇନିଂସରେ ମାତ୍ର ୧୦ ରନ୍ ସ୍କୋର କରିଥିବା ଷ୍ଟିଭ୍ ସ୍ମିଥ୍ ଶୀର୍ଷରୁ ତୃତୀୟ ସ୍ଥାନକୁ ଖସି ଆସିଛନ୍ତି। ଏଥି ସହିତ ମେଲବର୍ଣ୍ଣରେ ଦ୍ୱିତୀୟ ଟେଷ୍ଟ ଖେଳି ନଥିଲେ ମଧ୍ୟ ବିରାଟ କୋହଲି ଦ୍ୱିତୀୟ ସ୍ଥାନରେ ରହିଛନ୍ତି। ଶ୍ରେଷ୍ଠ ଦଶ ଜଣ ବ୍ୟାଟ୍ସମ୍ୟାନଙ୍କ ତାଲିକାରେ ମାର୍ନୁସ୍ ଲାବୁଶେନ୍ ଚତୁର୍ଥ, ବାବର ଆଜାମ ପଞ୍ଚମ, ଅଜିଙ୍କ୍ୟ ରାହାନେ ଷଷ୍ଠ, ଡେଭିଡ ୱାର୍ଣ୍ଣର ସପ୍ତମ, ବେନ ଷ୍ଟୋକ୍ସ ଅଷ୍ଟମ, ଜୋଏ ରୁଟ୍ ନବମ ଏବଂ ଦଶମ ସ୍ଥାନରେ ଚେତେଶ୍ୱର ପୂଜାରା ରହିଛନ୍ତି।
ସେପଟେ ଆଡିଲେଡରେ ବିରାଟ୍ କୋହଲିଙ୍କ ଅନୁପସ୍ଥିତିରେ ଆଜିଙ୍କ୍ୟ ରାହାଣେଙ୍କ ଭାରତକୁ ବିଜୟ ଭେଟିଦେଇଛନ୍ତି । ତାଙ୍କ କ୍ୟାପଟେନ୍ସିରେ ଟିମ୍ ଇଣ୍ଡିଆ ଦମ୍ ଦେଖାଇଛି ଏବଂ ବକ୍ସିଂ ଡେ’ ଟେଷ୍ଟରେ କଙ୍ଗାରୁ ଟିମକୁ ଧୂଳି ଚଟାଇଛି। ଏହି ମ୍ୟାଚ୍ରେ ଅଧିନାୟକ ରାହାଣେ ୧୧୨ ଏବଂ ନଟଆଉଟ୍ ୨୭ ରନ୍ ସ୍କୋର କରିଥିଲେ, ଯାହା ତାଙ୍କୁ ଷଷ୍ଠ ନମ୍ବରରେ ପହଞ୍ଚିବାରେ ସାହାଯ୍ୟ କରିଥିଲା ଅନ୍ୟପକ୍ଷରେ ଟପ୍-୧୦ ବୋଲରଙ୍କ ମଧ୍ୟରେ ଭାରତର ଷ୍ଟାର୍ ସ୍ପିନର ରବିଚନ୍ଦ୍ରନ୍ ଅଶ୍ୱିନ୍ ଏକମାତ୍ର ସ୍ପିନର ଅଛନ୍ତି। ମେଲବର୍ଣ୍ଣ ଟେଷ୍ଟରେ ପାଞ୍ଚଟି ୱିକେଟ୍ ନେଇଥିବା ଅଶ୍ୱିନ୍ ର଼୍ୟାଙ୍କିଙ୍ଗରେ ସପ୍ତମ ସ୍ଥାନ ହାସଲ କରିଛନ୍ତି। ତାଙ୍କ ବ୍ୟତୀତ ଭାରତୀୟ ବୋଲର ଜସପ୍ରୀତ ବୁମ୍ରା ୯ ନମ୍ବର ଏବଂ ରବିନ୍ଦ୍ର ଜାଡେଜା ୧୪ ନମ୍ବର ସ୍ଥାନ ହାସଲ କରିଛନ୍ତି।
ଶ୍ରେଷ୍ଠ ୧୦ ବୋଲର ତାଲିକା: ପ୍ୟାଟ୍ କମିନ୍ସ , ଷ୍ଟୁଆର୍ଟ ବ୍ରଡ୍, ନିଲ୍ ୱାଗନର୍, ଟିମ୍ ସାଉଥୀ, ମିଚେଲ ଷ୍ଟାର୍କ, କାଗିଶୋ ରାବାଡା,
ରବିଚନ୍ଦ୍ରନ୍ ଅଶ୍ୱିନ୍, ଜୋସ୍ ହେଜଲଉଡ୍, ଜସପ୍ରୀତ ବୁମ୍ରା, ଜେମ୍ସ ଆଣ୍ଡର୍ସନ୍।
