କାମାକ୍ଷାନଗର: ଲକଡାଉନରେ ପ୍ରେମ, ହୋଲିରେ ବିବାହ । ହେଲେ ମାସଟିଏ ବି ତିଷ୍ଠି ପରିଲାନି ସାତ ଜନ୍ମର ବନ୍ଧନ। ବିବାହର ୨୦ ଦିନ ପରେ ହେଲା ପ୍ରେମର ଦି ଏଣ୍ଡ। ନବବଧୂର ମୃତ୍ୟୁ ପରେ ଏବେ ଚାଞ୍ଚଲ୍ଯ। ଢେଙ୍କାନାଳ ପରଜଙ୍ଗ ଥାନା ଲୋଧଣୀ ଗାଁରେ ଅଭାବନୀୟ ଘଟଣା। ନବବଧୂର ମୃତ୍ୟୁ ପରେ ପରିବାର ଆଣିଲେ ହତ୍ଯା ଅଭିଯୋଗ। ମୃତକ ଜଣଙ୍କ ହେଉଛନ୍ତି ଲୋଧଣୀ ଗାଁର ୧୯ ବର୍ଷୀୟା ସୁପ୍ରିୟା ସାହୁ ଓରଫ ଶିଖା । ଶିଖା ନିଜ ଗାଁର ଦୁଃଶାସନ ରାଉତଙ୍କୁ ପ୍ରେମ ବିବାହ କରିଥିଲେ। ଉଭୟେ ଭିନ୍ନ ଜାତିର ହୋଇଥିବାରୁ ପରିବାର ଲୋକେ ବିବାହରେ ସମ୍ମତି ଦେଇନଥିଲେ। ହୋଲି ଦିନ ଘରୁ ଲୁଚି ପଳେଇଯାଇଥିଲେ ଏବଂ ବିବାହ କରିଥିଲେ। ମାତ୍ର ୨୦ଦିନର ବିବାହ ଭିତରେ ସାମ୍ନାକୁ ଆସିଛି ଯୌତୁକ ଜନିତ ନିର୍ଯାତନା ଏବଂ ନବବଧୂଙ୍କୁ ହତ୍ୟା ଅଭିଯୋଗ। ପରଜଙ୍ଗ ଥାନାରେ ଶିଖାଙ୍କ ବାପା ରଞ୍ଜନ ସାହୁଙ୍କ ଅଭିଯୋଗ ପରେ ଘଟଣା ସ୍ଥଳରେ ପରଜଙ୍ଗ ପୋଲିସ ଏବଂ ଢେଙ୍କାନାଳ ଜିଲ୍ଲା ସାଇଣ୍ଟିଫିକ ଟିମ ପହଞ୍ଚି ତଦନ୍ତ ଆରମ୍ଭ କରିଛି। ଏହା ହତ୍ୟା ନା ଆତ୍ମହତ୍ୟା ତାହା ସସ୍ପେନସ ଭିତରେ ରହିଛି।
